OL SAM 137

Ol laen blong Isrel oli stap krae from trabol we i kasem olgeta long Babilon

(Tok i go long ol man.)

1,2 Taem mifala i stap long Babilon,

mifala i tingbaot Saeon,*

nao mifala i hangem ol gita blong mifala

long ol tri long ples ya,

nao mifala i sidaon klosap long wota,

mifala i stap krae.

3 Olgeta we oli tekem

mifala i go wok slef* long ples ya

oli talem long mifala

blong mifala i singsing.

Be oli stap jikim mifala nomo,

oli wantem blong mifala i singsing

blong mekem olgeta i harem gud.

Oli talem se,

"Yufala i singsing long wan sing blong Saeon

blong mifala i harem."

4 Be mifala i talem se,

"?Olsem wanem

bambae mifala i save singsing long Hae God

long narafala kantri olsem?"*137.4: Narafala rod blong tanem tok ya i olsem. ?Olsem wanem bambae yumi save singsing long Hae God long narafala kantri olsem?

(Tok i go long taon ya Jerusalem,* ples ya we haos blong Hae God i stap long hem.)

5 Jerusalem.

Sipos mi mi fogetem yu,

i gud raethan blong mi i kam nogud,

blong mi no moa save kilim gita blong mi bakegen.

6 Sipos mi no moa tingbaot yu,

no mi mekem we yu yu no moa nambawan samting

blong mekem mi mi glad,

i gud voes blong mi i kam nogud

we mi no moa save singsing bakegen samtaem.

(Tok i go long Hae God.)

7 Hae God.

Plis yu tingbaot ol samting ya

we ol man Edom oli mekem

long dei ya we ol man Babilon

oli kam faet agens long Jerusalem,

oli holem ples ya.

Ol man Edom ya oli stap talem se,

"!Brekemdaon taon ya!

!Flatemgud hem!"

(Tok i go long taon ya Babilon.)

8 ✝ 137.8: Rev 18.6 Babilon,

God bambae i spolem yu.

Man we bambae i givimbak long yu

ol samting ya we yu yu mekem long mifala,

hem bambae i harem gud.

9 Man we bambae i tekem ol smol pikinini blong yu,

i stap smasem olgeta long bigfala ston,

hem bambae i harem gud.