1 Hae God.

Kantri ya Isrel* i kantri blong yu.

Bifo, yu yu bin gat sore long hem,

mo yu bin mekem hem i kam gud bakegen.

2 Yu yu bin fogivim mifala

yu tekemaot ol sin blong mifala,

mo yu bin tekemaot olgeta rong blong mifala.

3 Long taem ya, yu bin lego fasin ya

we yu stap kros long mifala,

mo yu bin livim kros blong yu,

yu no moa kros long mifala bakegen.

4 God, oltaem yu yu stap sevem mifala.

Plis yu tekem mifala i kambak long yu bakegen,

yu no moa tanem baksaed long mifala.

5 ?Olsem wanem?

?Bambae yu stap kros long mifala oltaem nomo?

?Bambae kros blong yu i no save finis samtaem?

6 Plis yu mekem mifala i strong bakegen,

nao bambae mifala i presem yu.

7 Hae God,

oltaem yu yu lavem man tumas.

Plis yu soemaot fasin ya long mifala,

yu halpem mifala, yu sevem mifala.

8 Hae God i God blong yumi,

mo mi mi stap lesin long ol tok ya

we hem i stap talem.

Hem i promes se sipos yumi no gobak

long ol krangke fasin blong yumi,

hem bambae i givim pis long yumi.

9 Tru, oltaem nomo hem i rere

blong sevem man we i stap ona long hem,

mo hem bambae i stap long ples blong yumi

long olgeta paoa blong hem,

nao bambae hem i stap sevem yumi.

10 Oltaem God bambae i stap lavem man tumas,

nao man bambae i putum tingting blong hem

i stap strong long God.

God bambae i soemaot stret fasin blong hem,

nao man bambae i kasem pis long hem.

11 Fasin ya we man i stap strong long God

bambae i go antap i kasem heven,

mo stret fasin ya blong God

bambae i kamdaon i kasem graon.

12 Hae God bambae i mekem

we yumi gat plante samting,

mo graon blong yumi

bambae i karem plante kakae.

13 Stret fasin blong Hae God

bambae i go fastaem long hem,

mo bambae i mekemrere rod blong hem.