1 Hae God.

Oltaem bambae mi stap singsing

from fasin ya blong yu

we oltaem yu yu lavem man tumas.

Fasin ya blong yu

we oltaem yu stap holem ol promes blong yu,

bambae mi stap talemaot oltaem nomo,

gogo i no save finis.

2 Mi mi save we fasin ya blong yu blong lavem man

bambae i stap oltaem nomo,

mo fasin ya blong yu blong holem ol promes blong yu

bambae i olsem skae, i no save lus.

3 Yu yu talem se,

"Mi mi mekem promes finis

wetem Deved,

man ya blong wok blong mi

we mi mi jusumaot hem bifo.

4 ✝Mi mi talem long hem se,

‘Oltaem ol king blong ol man blong mi

bambae oli stap kamaot long olgeta

we oli stap kamaot biaen long yu.

Olgeta ya,

mi bambae mi holem olgeta oli stap gud oltaem,

bambae mi stap lukaot gud long olgeta gogo i no save finis.’ "

5 Hae God.

Olgeta long heven oli stap singsing

blong talemaot ol gudgudfala fasin

we yu yu mekem,

oli stap sing from fasin ya

we yu yu stap holem ol promes blong yu.

6 I no gat man long heven we i olsem yu.

Long olgeta we oli stap long heven,

be i no gat wan man nating

we i sem mak long yu.

7 Olgeta enjel long heven oli tabu we i tabu,

be oli stap ona long yu.

Olgeta evriwan oli stap fraet long yu,

from we yu yu hae we yu hae.

8 Hae God, yu yu God blong mi,

mo yu gat olgeta paoa.

I no gat wan man nating we i strong olsem yu.

Long olgeta samting,

oltaem yu yu stap holem ol promes blong yu.

9 Solwota i strong tumas,

be yu yu stap rulum hem.

Taem we hem i raf tumas,

be yu yu stap mekem i kam kwaet bakegen.

10 Yu yu flatemgud Rahab,*

bigfala anamol ya blong solwota,

mo yu kilim hem i ded.

Yu yu stap winim ol enemi blong yu

long paoa blong yu we i strong tumas.

11 Skae i blong yu,

mo graon ya tu i blong yu.

Yu yu mekem wol ya

wetem olgeta samting we i stap long hem.

12 Yu yu mekem olgeta ples,

i stat long not, i go kasem long saot.

Hil ya Taboro mo hil ya Hemon tufala i glad tumas,

tufala i stap singsing blong presem yu.

13 !Yu yu gat paoa blong mekem olgeta samting!

!Paoa blong yu i bigwan tumas!

14 Yu yu King,

we fasin blong yu,

oltaem yu stap mekem i stret,

oltaem yu stap jajem ol man long stret rod.

Olgeta samting we yu stap mekem

oli stap soemaot

we oltaem yu stap lavem man tumas,

mo oltaem yu stap holem ol promes blong yu.

15 Olgeta we oli stap singsing blong presem yu,

oli glad tumas.

Oltaem yu yu kaen gud long olgeta,

nao i olsem we oli stap wokbaot long delaet.

16 Yu yu mekem olgeta oli harem gud,

i stat long moning go kasem long sapa.

Mo oltaem oli stap presem yu

from ol gudgudfala fasin blong yu.

17 Oltaem yu yu mekem mifala

i stap win gud long faet.

Yu stap mekem mifala i win

from we yu lavem mifala tumas.

18 Hae God, yu yu tabu we yu tabu.

Yu yu God blong mifala ol laen* blong Isrel,*

mo yu jusumaot king ya blong mifala,

we i stap lukaot long mifala,

yu putumap hem i kam king.

19 Longtaem bifo,

yu yu kamtru long ol man blong wok blong yu,

we tingting blong olgeta i stap strong long yu,

yu toktok long olgeta long vison.*

Yu yu talem se,

"Mi mi givhan long wan soldia

we i gat hae nem.

Mi jusumaot hem long olgeta man,

nao mi putumap hem i kam king.

20 ✝Soldia ya Deved ya,

we i man blong wok blong mi,

mo mi kafsaedem tabu oel

i go long hed blong hem,

mi mekem hem i king.

21 Mi bambae mi mekem hem i strong,

oltaem paoa blong mi bambae i stap wetem hem.

22 Ol enemi blong hem neva bambae oli winim hem,

ol man nogud bambae oli no save daonem hem samtaem.

23 Bambae mi flatem ol enemi blong hem,

mi kilim olgeta evriwan

we oli no laekem hem,

oli stap agens long hem.

24 Be hem,

bambae mi lavem hem tumas,

tingting blong mi

bambae i stap strong long hem oltaem,

mo bambae mi mekem we hem i stap win oltaem.

25 Bambae mi mekem kingdom blong hem i kam bigwan,

i stat long Mediterenean Si

go kasem Yufretes Reva.

26 Bambae hem i talem long mi se,

‘Yu yu papa blong mi,

mo yu yu God blong mi.

Oltaem yu stap lukaot gud long mi,

yu stap sevem mi.’

27 ✝Bambae mi mekem hem i fasbon pikinini blong mi,

mo bambae hem i hae we i hae,

i winim ol narafala king.

28 Oltaem bambae mi stap holem promes blong mi

we mi mekem wetem hem,

mo promes ya bambae i stap oltaem,

i no save finis.

29 Olgeta we bambae oli stap kamaot biaen long hem,

bambae mi mi holem olgeta

oli stap gud oltaem,

olsem we skae i stap oltaem nomo.

Oltaem ol king blong ol man blong mi

bambae oli stap kamaot biaen long olgeta ya.

30-32 "Be sipos olgeta ya

oli no obei long ol loa blong mi,

mo oli no stap folem ol tok we mi stap givim long olgeta,

bambae mi mi panisim olgeta

from ol sin ya blong olgeta.

Sipos olgeta oli no tingting long ol tok

we mi stap tijim olgeta long hem,

mo oli no stap holem ol tok blong mi,

bambae mi mekem

we olgeta oli harem nogud

from ol fasin nogud ya we oli mekem.

33 Be Deved,

bambae mi lavem hem oltaem nomo,

gogo i no save finis,

tingting blong mi bambae i stap strong long hem, we bambae i no save foldaon.

34 Bambae mi no save brekem promes ya blong mi

we mi mekem wetem hem,

bambae mi no save jenisim

wan tok blong promes ya nating.

35 "Mi mi tabu we mi tabu,

mo long nem blong mi,

mi talem long yufala finis,

se neva bambae mi save brekem promes ya we mi mekem wetem Deved.

36 Olgeta we bambae oli stap kamaot biaen long hem

bambae mi holem olgeta oli stap oltaem nomo.

Mi bambae mi stap lukaot long olgeta,

blong oli stap king oltaem

olsem we san i stap oltaem nomo.

37 Bambae oli stap king oltaem

olsem we mun i stap oltaem

long skae,

i stap witnes long mi."

38 Hae God.

Naoia, king ya we yu yu jusumaot hem,

yu yu kros long hem bakegen,

yu lego hem finis,

yu tanem baksaed long hem.

39 Yu yu brekem promes* ya finis we yu mekem bifo

wetem man ya blong wok blong yu.

I olsem we yu tekemaot hat blong king finis long hem,

yu sakem i go long sofmad.

40 Yu brekemdaon finis ol stonwol blong taon blong hem,

yu spolemgud ol strong sefples blong hem.

41 Ol man we oli stap kam pas long ples ya

oli stap stilim olting blong hem,

mo ol man we oli stap raonabaot long hem

oli stap laf nogud long hem.

42 Yu yu mekem we ol enemi blong hem

oli stap win,

nao olgeta oli stap harem gud tumas.

43 Yu mekem

we ol samting blong faet blong hem

oli kam nogud,

nao yu letem ol enemi blong hem

oli kam faet long hem,

oli winim hem.

44 Wokingstik blong king,

yu tekemaot long hem finis,

mo bigfala jea blong king,

yu yu tekemaot long hem,

yu sakem i go long graon.

45 Yu yu mekem we hem i kam olfala kwiktaem nomo,

mo yu mekem hem i sem we i sem.

46 Hae God.

Naoia mifala i no save luk yu.

?Bambae yu stap haed olwe nomo?

?Bambae kros blong yu i stap bon olsem faea

gogo kasem wetaem?

47 Plis yu no fogetem mi.

Mi mi man nomo,

mo laef blong mi i sotfala nomo.

Yu yu mekem mifala,

mo mifala evriwan i mas ded.

48 ?Hu man we i save stap oltaem,

we i no save ded?

I no gat man i save ronwe long beregraon.

49 ?Masta* long 35.22. blong mi,

wehem gudfala fasin ya blong yu

we yu stap soemaot bifo,

we oltaem yu stap lavem man tumas?

?Wehem ol promes ya

we yu yu mekem wetem King Deved bifo?

50 Mi mi man blong wok blong yu,

plis yu no fogetem mi.

Oltaem ol man oli stap tok nogud long mi,

mo ol hiten man oli stap singaot* trabol i kam long mi.

51 Hae God,

mi mi king we yu nomo yu jusumaot mi,

be ol enemi blong yu oli stap tok nogud long mi.

Long weples we mi mi pas long hem,

be olgeta oli stap laf nogud long mi.

52 !Oltaem bambae yumi mas presem Hae God,

gogo i no save finis!

!Amen!

!Amen!