1 God,

mi mi wantem tumas

blong yu yu kam long laef blong mi,

olsem wan anamol we i tosta tumas

i wantem dring long springwota.

2 God,

yu yu laef

we yu no save ded.

Mi mi wantem yu tumas,

olsem we mi tosta,

mi wantem tumas blong dring wota.

?Wetaem bambae mi save kam stanap

long fes blong yu,

blong mekem wosip long yu?

3 Mi mi stap krae long dei mo long naet,

wota blong ae blong mi nomo

i kakae blong mi.

Oltaem ol enemi blong mi

oli stap jikim mi, oli talem se,

"?Wehem God ya blong yu?"

4 God,

bifo, mi stap wokbaot wetem olgeta man

blong go long haos* blong yu.

Mi stap lidim olgeta i go,

we oli hapi tumas, oli singsing,

oli stap singsingaot blong presem yu.

Be taem mi tingbaot ol samting ya,

tingting blong mi i stap kam nogud olgeta.

5 ?From wanem mi mi sore tumas olsem?

?From wanem tingting blong mi i trabol tumas?

Bambae mi mi putum tingting blong mi

i stap long yu nomo,

mo bakegen,

bambae mi stap presem yu

we yu yu God blong mi,

yu sevem mi.

6,7 Long ples ya,

afsaed long kantri blong mi,

tingting blong mi i kam nogud,

ale, mi putum tingting blong mi

i stap long yu bakegen.

Yu yu stap sanem trabol

i kam long laef blong mi

olsem ol wef blong bigfala solwota.

Ol bigfala trabol ya

oli kam long mi olsem wota

we i ron bigwan, i draonem mi.

Oli kam olsem ol wotafol ya

we oli kamaot long tufala hil ya Hemon mo Mijara,

oli godaon long Jodan Reva,

we oli bigfala tumas,

oli stap mekem noes olsem tanda.

8 Hae God,

yu yu God blong laef blong mi.

Mi mi wantem we long dei,

bambae yu soemaot fasin blong yu,

we oltaem yu lavem man tumas,

nao long naet,

bambae mi save singsing

blong mekem prea long yu.

9 God,

oltaem yu yu stap blokem ol enemi blong mi,

oli no kam faet long mi.

?From wanem yu fogetem mi?

?From wanem mi stap harem nogud

long han blong ol enemi blong mi

we oli stap spolem mi?

10 Ol rabis tok blong olgeta i stap stikim mi tumas.

Oltaem ol enemi blong mi oli stap talem long mi se,

"?Wehem God ya blong yu?"

11 ?From wanem mi mi sore tumas olsem?

?From wanem tingting blong mi i trabol tumas?

Bambae mi putum tingting blong mi

i stap long yu nomo,

mo bakegen,

bambae mi stap presem yu

we yu yu God blong mi,

yu sevem mi.