1 Hae God.

Yu yu God blong mi,

mo oltaem yu stap sevem mi.

Long dei mo long naet,

mi stap krae long yu,

blong yu yu halpem mi.

2 Plis yu harem prea blong mi.

Mi mi stap krae long yu

blong yu givhan long mi.

Plis yu lesin long mi.

3 Plante trabol tumas oli stap kasem mi,

we klosap mi mi ded from.

4 Naoia, paoa blong mi i lus olgeta,

oli stap kaontem mi wetem olgeta

we klosap oli ded.

5 Ol man oli luk mi olsem we mi mi ded finis.

Mi mi olsem ol man we oli ded long faet,

we oli stap finis long beregraon.

Yu yu fogetem olgeta finis,

yu no moa save givhan long olgeta.

6 Yu sakem mi finis insaed long hol

we i godaon we i godaon olgeta.

Hol ya i godaon we i godaon,

mo i tudak tu.

7 Yu yu kros tumas long mi,

Kros blong yu i flatem mi olgeta,

i olsem we bigsi i rolem mi,

i flatemgud mi.

8 Yu yu mekem we ol fren blong mi oli lego mi finis,

yu mekem mi mi kam olsem wan samting

we i nogud tumas long fes blong olgeta.

Yu blokemgud ol rod blong mi,

nao mi mi no save ronwe.

9 Mi mi harem nogud tumas,

mi krae gogo ae blong mi i kam nogud from.

Hae God.

Evri dei nomo,

mi mi stap singaot long yu,

mi stap leftemap han blong mi,

mi stap prea long yu.

10 ?Olsem wanem?

?Ol merikel we yu yu stap mekem,

be ol dedman oli save luk?

!Ol dedman oli no save girap bakegen

blong presem yu!

11 ?Oltaem yu yu lavem man tumas,

mo yu stap holem ol promes blong yu,

be olgeta we oli stap finis long beregraon

oli save talemaot ol fasin ya?

12 Olgeta ya oli stap long ples ya

we ol man oli fogetem olgeta finis,

mo oli no save luk ol gudgudfala fasin blong yu.

!Olgeta we oli stap finis long tudak ya,

oli no save luk ol merikel ya blong yu!

13 Hae God.

Evri moning mi stap prea long yu,

mi stap krae long yu blong yu givhan long mi.

14 Hae God.

?From wanem yu tanem baksaed long mi?

?From wanem yu tanem fes blong yu

i gowe long mi?

15 I stat long taem we mi mi yangfala,

kam kasem tede,

oltaem nomo,

mi mi stap harem nogud long bodi blong mi,

we klosap mi ded from.

Panis ya we yu stap givim long mi

hem i hevi tumas,

nao i mekem mi mi slak we mi slak.

16 Yu yu kros tumas long mi

nao tingting blong mi i foldaon.

Yu mekem i strong tumas long mi,

yu mekem mi mi kam nogud olgeta.

17 Oltaem nomo,

i stat long moning go kasem long sapa,

panis ya we yu stap givim long mi

i kam kavremap mi olsem wota we i ron bigwan,

i hivap raon long mi long evri saed.

18 Yu yu mekem olgeta man oli gowe long mi.

Nating we oli gudfala fren blong mi,

be yu mekem olgeta oli lego mi,

naoia tudak nomo i fren blong mi.