1 !Yufala i kam,

yumi presem Hae God!

!Yumi glad, yumi singsing long hem!

!Hem i stap blokemgud yumi,

i stap sevem yumi!

2 Yumi kam long fes blong hem,

yumi talem tangkiu long hem.

Yumi presem hem,

yumi sing long hem

long ol singsing blong glad.

3 Hae God, hem i God we i gat paoa.

Hem i king, mo i gat paoa moa

i winim olgeta narafala god.

4 Graon ya i stap long han blong hem,

i stat daon long stamba blong hem

we i daon we i daon olgeta,

i go antap kasem ol hil

we oli hae we i hae.

5 Hem i mekem solwota,

mo i stap lukaot long hem.

Ol aelan tu, hem nomo i mekem olgeta,

mo oli stap long han blong hem.

6 Hae God, hem i mekem yumi.

Yufala i kam, yumi bodaon,

yumi nildaon long fes blong hem,

yumi mekem wosip long hem.

7 ✝ ✝Hem i God blong yumi.

Yumi ol man blong hem,

mo hem i stap lukaot gud long yumi.

Yumi ol sipsip blong hem,

mo yumi stap long han blong hem.

Tede, yufala i mas lesin long tok blong hem.

Hem i talem se,

8 ✝"Yufala i no mekem stronghed,

olsem we ol bubu blong yufala bifo

oli mekem long draeples ya Meriba,

we narafala nem blong hem Masaha.

9 Olgeta ya oli luk finis

ol samting we mi mi mekem long olgeta,

be long ples ya,

oli wantem traem mi,

oli wantem luk paoa blong mi bakegen.

10 Nao mi mi kros long olgeta foti yia,

mo mi talem se,

‘Ol man ya oli no holem promes

blong olgeta nating,

oli no wantem nating blong obei long ol tok blong mi.’

11 ✝Mi mi kros gud long olgeta,

nao mi mekem wan strong tok,

mi talem se, ‘Yufala ya,

neva bambae yufala i go insaed long graon ya

we mi mi wantem givim long yufala blong yufala i go spel long hem.’ "