OL SAM 110

King we Hae God i jusumaot

(Sing ya, Deved i wokem.)

(Tok i go long king.)

1 ✝ 110.1: Mat 22.44; Mak 12.36; Luk 20.42,43; Wok 2.34,35; 1 Kor 15.25; Efes 1.20-22; Kol 3.1; Hib 1.13; 8.1; 10.12,13 King.

Yu yu Masta blong mi.

Hae God i talem long yu se,

"King.

Yu sidaon long raet saed blong mi,

yu wet.

Bambae mi mekem ol enemi blong yu

oli stap aninit long paoa blong yu,

oli slef* blong yu."

2 Hae God i stap long Saeon,*

mo hem bambae i mekem

paoa blong yu i kam bigwan moa.

Hem i talem se,

"Yu bambae yu rulum ol enemi blong yu."

3 Long dei ya we bambae yu go faet

long ol enemi blong yu,

ol man blong yu bambae oli glad

blong kam joen long yu.

Olsem we wota blong naet

i stap mekem gras i gru gud,

long sem fasin,

yu bambae yu kasem ol nambawan man blong faet

oli kam joen long yu long ol hil ya we oli tabu.

4 ✝ 110.4: Hib 5.6; 6.20; 7.17,21 Hae God i bin mekem wan strong promes* long yu,

mo bambae hem i no save jenisim tingting blong hem.

Hem i talem se, "Yu yu pris*

olsem pris ya Melkisedek bifo,

mo bambae yu holem wok blong pris oltaem

gogo i no save finis."

5 King.

Masta* blong yumi i stap long raet saed blong yu,

mo taem hem i kros,

bambae hem i save daonem ol narafala king.

6 Hem bambae i jajem

ol man blong ol narafala kantri,

mo bambae i mekem ples blong faet

i kam fulap long ol dedman.

Hem bambae i daonem ol king

long olgeta ples long wol.

7 Yu bambae yu dring

long smol wota ya klosap long rod,

nao bambae yu yu strong,

gogo yu win.