OL SAM 105

Hae God i stap givhan gud long ol man blong hem

(Tok i go long ol man.)

1 !Yumi talem tangkiu long Hae God!

!Yumi talemaot hae nem blong hem!

Yumi go long olgeta man blong ol narafala kantri,

yumi talemaot ol samting ya we hem i bin mekem.

2 Yumi sing, yumi presem hem.

Yumi talemaot ol bigbigfala samting ya

we hem i bin mekem.

3 Yumi evriwan ya

we yumi stap mekem wosip long hem,

yumi mas glad,

from we tabu nem blong hem

i stap long yumi.

4 Yumi mas luk long Hae God

blong hem i givhan long yumi,

mo oltaem,

yumi mas mekem wosip long hem.

5,6 Yumi ya,

yumi laen* blong Ebraham,

we i man blong wok blong Hae God,

mo yumi laen blong Isrel,*

we Hae God i jusumaot hem.

Oltaem yumi mas tingbaot ol merikel

we hem i mekem,

mo ol rul blong hem

we hem i givim blong jajem man.

7 Hae God,

hem i God blong yumi.

Ol tok we hem i talem

i blong olgeta man long wol.

8 Promes* ya we hem i mekem wetem yumi

bambae hem i no save fogetem samtaem.

Oltaem bambae hem i stap holem promes ya

we i mekem wetem yumi,

mo wetem olgeta we bambae oli kamaot biaen long yumi,

gogo i no save finis.

9 ✝ 105.9 a: Jen 12.7; 17.8; b: Jen 26.3 Promes ya,

hem i mekem fastaem wetem Ebraham bifo,

mo biaen, i mekem bakegen wetem Aesak,

mo i givim strong tok long hem

blong mekem promes ya i stanap.

10 ✝ 105.10: Jen 28.13 Mo biaen bakegen,

hem i mekem promes ya wetem Jekob,*

we promes ya i kam olsem wan loa

we bambae i no save lus samtaem.

11 Hem i talem se,

"Bambae mi givim kantri ya Kenan* long yu,

mo kantri ya bambae i blong yufala

oltaem nomo."

12 Be long taem ya,

ol bubu ya blong yumi oli no plante,

namba blong olgeta i smol nomo,

mo oli strenja nomo long kantri ya.

13 Oltaem oli stap muvum ples blong olgeta.

Oltaem, oli aot long wan ples,

oli go long narafala ples,

oli lego wan kingdom

oli go long narafala kingdom.

14 ✝ 105.14: Jen 20.3-7 Be Hae God i no letem

ol man long ol ples ya oli spolem olgeta.

Hem i tok long ol king from olgeta,

15 i talem se, "!Yufala i lukaot!

Yufala i no spolem ol man blong mi

we mi mi jusumaot olgeta,

mo yufala i no tajem

ol profet ya blong mi."

16 ✝ 105.16: Jen 41.53-57 Hae God i sanem hadtaem i kam

we i no gat kakae nating long ples blong olgeta,

mo hem i tekemaot

olgeta kakae blong olgeta.

17 ✝ 105.17: Jen 37.28; 45.5 Be hem i sanem wan long olgeta

i go long Ijip fastaem

blong mekem rod blong olgeta.

Man ya, nem blong hem Josef,

we ol brata blong hem oli salemaot

hem blong i go wok slef.*

18 ✝ 105.18: Jen 39.20—40.23 Hem i stap long Ijip,

i stap harem nogud tumas,

we ol jen oli fasemtaet leg blong hem,

mo bigfala aean i holemtaet nek blong hem.

19 Hem i stap olsem gogo

tok we hem i talemaot i kamtru.

Tok blong Hae God i soemaot

we man ya i stret nomo.

20 ✝ 105.20: Jen 41.14 Nao king blong Ijip

we i rulum plante kantri,

hem i tekemaot hem long kalabus,

i letem hem i go fri.

21 ✝ 105.21: Jen 41.39-41 King ya i givim wan wok long hem

blong i gavman long ples ya,

i putumap hem

blong i rul long olgeta ples.

22 Nao Josef i gat paoa moa,

i winim ol narafala haeman blong king,

mo hem i gat raet

blong tijim ol advaesa blong king.

23 ✝ 105.23 a: Jen 46.6; b: Jen 47.11 Nao biaen,

Jekob wetem ol pikinini blong hem

oli go stap longtaem long kantri ya Ijip,

we i ples blong ol laen blong Ham.

24 ✝ 105.24: Eks 1.7-14 Nao Hae God i mekem

we ol man ya blong hem oli kam plante,

mo i mekem olgeta oli strong moa,

i winim ol enemi blong olgeta.

25 Nao hem i mekem we ol man Ijip

oli no moa laekem ol man blong hem,

oli agens long olgeta,

mo oli stap ravem olgeta.

26 ✝ 105.26: Eks 3.1—4.17 Nao Hae God i jusum tu man,

Moses we i man blong wok blong hem

mo Eron we hem i bin jusumaot hem finis,

nao i sanem tufala i go long Ijip.

27 Nao tufala i mekem ol bigbigfala wok

long nem blong hem,

tufala i stap mekem ol merikel

long ples ya.

28 ✝ 105.28: Eks 10.21-23 Hae God i sanem tudak

i kam kavremapgud kantri ya,

be ol man Ijip oli no obei

long tok blong hem.

29 ✝ 105.29: Eks 7.17-21 Hem i mekem ol reva blong olgeta i kam blad,

mo i kilim olgeta fis oli ded.

30 ✝ 105.30: Eks 8.1-6 Kantri blong olgeta i kam fulap

long ol frog.

Nating we haos blong king,

be oli fulap gud long hem.

31 ✝ 105.31 a: Eks 8.20-24; b: Eks 8.16,17 Hae God i tok,

nao ol flae mo ol mostik

oli kam kavremap olgeta ples long kantri ya.

32 ✝ 105.32: Eks 9.22-25 Hem i mekem we oli no moa save kasem ren,

ston blong aes* nomo i stap folfoldaon,

mo laetning i stap laet bigwan

olbaot long ples blong olgeta.

33 Hem i spolem ol rop ya grep*

mo i brebrekem ol figtri* blong olgeta.

Hem i spolemgud olgeta tri long ples blong olgeta

long tufala samting ya.

34 ✝ 105.34: Eks 10.12-15 Hem i tok,

nao olgeta lokis* oli kam.

Oli plante we i plante,

we man i no save kaontem olgeta,

35 nao oli kakae olgeta samting

we man i planem long garen,

wetem ol narafala samting

we oli stap gru olbaot.

36 ✝ 105.36: Eks 12.29 Nao hem i kilim

olgeta fasbon pikinini boe blong ol man Ijip oli ded*105.36: God i mekem olsem blong panisim ol man Ijip, from we oli givim ol fasbon pikinini boe blong olgeta long ol narafala god. Yu luk Eksodas 12.12.

37 ✝ 105.37: Eks 12.33-36 Nao hem i lidim ol laen blong Isrel

oli aot long kantri ya oli go,

we oli karem ol silva mo gol,

mo olgeta evriwan oli stap gud,

oli no sik, oli stap strong oltaem.

38 Ol man Ijip oli stap fraet long olgeta,

mo taem oli luk olgeta oli go,

oli harem gud tumas.

39 ✝ 105.39: Eks 13.21,22 Hae God i putum klaod antap long ol man blong hem

blong kavremap olgeta,

mo long naet, hem i putum faea

blong givim laet long olgeta.

40 ✝ 105.40: Eks 16.2-15 Oli askem kakae long hem

nao hem i sanem ol pijin i kam long olgeta

blong oli kakae,

mo i sanem kakae blong heven i kam,

i givim long olgeta

blong oli kakae, oli harem gud.

41 ✝ 105.41: Eks 17.1-7; Nam 20.2-13 Hem i brekem wan bigfala ston,

nao wota i ron i kamaot,

i ron i gotru long draeples

olsem wan reva.

42 Oltaem hem i stap tingbaot promes ya blong hem

we i mekem bifo wetem Ebraham,

man blong wok blong hem,

se promes ya i tabu,

i no save brekem.

43 Hae God,

hem i lidim ol man blong hem

we hem i bin jusumaot olgeta,

oli goaot we oli stap singsing,

oli glad,

oli stap singsingaot from.

44 ✝ 105.44: Jos 11.16-23 Nao hem i givim graon blong ol narafala man

i go long olgeta,

mo i letem olgeta oli tekem ol garen blong olgeta,

45 blong ol man blong hem

bambae oli obei long ol loa blong hem,

mo oli folem ol tok blong hem.

!Oltaem yumi mas presem Hae God!