1 Olgeta.

Mi mi lavem Hae God tumas,

from we oltaem hem i stap lesin long mi,

oltaem hem i stap harem prea blong mi.

2 Oltaem hem i stap lesin long mi,

mo from samting ya,

bambae mi stap prea long hem

oltaem long laef blong mi.

3 Bifo, bigfala trabol i kasem mi

we klosap mi ded from.

Mi mi luk ded i olsem wan trap

we klosap i kasem mi,

nao mi harem nogud tumas,

mi fraet we mi fraet.

4 Nao mi krae long hem,

mi talem se, "Hae God.

Plis yu sevem mi."

5 Hae God i God blong yumi,

mo hem i gud tumas.

Hem i kaen, mo i gat sore long man.

6 Hem i stap lukaot long olgeta

we oli no gat paoa.

Taem trabol i kasem mi,

hem i sevem mi.

7 Mo naoia mi mi save harem gud bakegen,

from we hem i stap mekem i gud tumas long mi.

8 Klosap mi mi ded,

be hem i sevem mi.

Hem i leftemap tingting blong mi,

nao mi no moa krae.

Klosap mi mi foldaon,

be hem i holem mi mi stap gud.

9 Nao from samting ya,

mi mi stap wokbaot wetem hem

oltaem long laef blong mi.

10,11 ✝Nating we mi harem

se olgeta oli flatemgud mi,

mo nating we mi fraet tumas,

mi ting se i no gat wan man nating

we mi save trastem hem,

be tingting blong mi i no foldaon,

mi mi stap bilif strong yet.

12 Hae God i stap mekem i gud tumas long mi.

?Bambae mi save givim wanem presen long hem?

13 Bambae mi tekem kap waen,

mi givim long hem

blong talem tangkiu long hem

from we hem i sevem mi.

14 Long fes blong olgeta man blong hem,

bambae mi givim olgeta samting ya long hem

we mi mi promes finis blong givim.

15 Hae God.

Taem wan long ol man blong yu i ded,

yu yu harem nogud tumas.

16 Mi mi man blong wok blong yu

olsem mama blong mi bifo,

mo yu yu sevem mi mi no ded.

17 Bambae mi mi mekem sakrefaes long yu

blong talem tangkiu long yu.

18,19 Long Jerusalem,*

long yad blong haos* ya blong yu,

long fes blong olgeta man blong yu,

bambae mi givim olgeta samting ya long yu

we mi mi promes finis blong givim.

!Oltaem yumi mas presem Hae God!