OL SAM 131

Man we i no moa praod, i prea long Hae God

(Sing ya, Deved i wokem. Hemia i blong ol man oli singsing long hem taem oli stap wokbaot blong go antap long Jerusalem* blong mekem lafet)

(Tok i go long Hae God.)

1 Hae God.

Fastaem mi mi praod tumas,

be mi lego fasin ya olgeta,

mo mi livim finis ol tok flas blong mi.

Mi no moa save tingbaot ol bigbigfala wok

mo ol samting we i strong tumas blong mi mekem.

2 Mo naoia, mi mi harem gud,

tingting blong mi i stap kwaet.

Tingting blong mi i kwaet we i kwaet,

olsem pikinini we i ledaon kwaet

long han blong mama blong hem.

(Tok i go long ol man.)

3 Yumi ol laen* blong Isrel,*

yumi mas trastem Hae God,

i stat naoia, gogo i no save finis.