1 Hae God.

Mi mi talem tangkiu long yu

long olgeta tingting blong mi.

Mi stap sing blong presem yu

long fes blong ol narafala god.

2 Oltaem yu yu lavem man tumas,

mo yu stap holem ol promes* blong yu.

Yu yu bin soemaot

we nem blong yu mo ol tok we yu yu putum,

tufala i hae we i hae,

i winim ol narafala samting.

From ol samting ya,

oltaem mi stap lukluk i go

long haos* blong yu we i tabu,

mi stap bodaon,

mi stap presem nem blong yu.

3 Taem mi mi krae i go long yu,

yu yu harem krae blong mi,

yu mekem mi mi strong moa

long paoa blong yu.

4 Hae God.

Olgeta king long wol

oli harem ol promes blong yu,

mo bambae oli presem yu.

5 Bambae oli singsing

blong talemaot ol fasin blong yu,

from we yu yu King,

mo yu hae we yu hae.

6 Be nating we yu yu hae olsem,

oltaem yu stap lukaot gud long ol man

we tingting blong olgeta i stap daon.

Be ol praod man oli no save haed

long fes blong yu.

7 Taem ol trabol i stap kam long mi

yu yu stap holem mi mi stap gud.

Yu stap agens long ol enemi blong mi

we oli stap kros tumas long mi,

mo yu stap sevem mi

long paoa blong yu.

8 Hae God.

Oltaem bambae yu yu lavem man

gogo i no save finis.

Bambae yu yu mekem evri samting

we yu bin promes blong mekem long mi.

Yu yu statem wok ya finis,

plis yu gohed long hem

gogo i finis.