1,2 !Jerusalem!

Taem ol man oli talem long mi se,

"Yumi go long haos* blong Hae God,"

mi mi glad tumas.

Mo naoia mifala i kamtru long yu finis,

mifala i stap stanap

insaed long ol doa* blong stonwol blong yu.

3 Olgeta.

Taon ya Jerusalem,

oli wokem i gud tumas.

Ol man blong hem oli stap joen gud

blong mekem wan gudfala taon.

4 Yumi ol man blong Hae God,

mo hemia ples we yumi stap kam

blong talem tangkiu long hem,

olsem we hem i talem.

5 Long ples ya nao,

oltaem, ol king blong yumi

oli stap mekem kot

blong jajem yumi long stret fasin.

6 Naoia yumi mas prea

blong taon ya bambae i gat pis.

Yumi mas talem se, "Hae God.

Plis yu mekem olgeta

we oli laekem taon ya tumas,

bambae oli save stap gud.

7 Plis yu mekem

we ol man blong taon ya

bambae oli stap long gudfala laef,

mo we ol king long ples ya

bambae oli stap gud

long ol haos blong olgeta."

8 Jerusalem,

mi mi stap tingbaot ol famle mo ol fren blong mi

we oli stap long yu,

mo mi prea blong oli gat gudfala laef.

9 Hae God i God blong mifala,

mo haos blong hem i stap long yu.

Mo from samting ya,

mi bambae mi prea

blong yu yu save stap gud oltaem.