1 Ado, Adidem Sọlọmọn amaama uwak ibaan asenidịd ke aboiyoke ayịn awonwaan Fero, mbon Mọb, mbon Amọn, mbon Edọm, mbon Sidọn ye mbon Hed. 2 Ammọ eketo mme idịd a-adooho Abọọñ amaabo mbon Isrel, "Inaaha ndufo edudọiyọ ye ammọ, sia ammọ idiitreke ediwọññọ esịd ndufo ñkeene mme abasi ammọ." Kpayeado, Sọlọmọn amaakpa adiana ammọ ke ima. 3 Anye akenie ibaan ndọ ikie itiaba (700) e-eketooho ubon ubọọñ ye ibaan esa ikie ita (300), ndin ibaan ndọ amọ emaeben anye etịn usʌñ. 4 Sọlọmọn aketọọñọ ikpon awo ke isua, mme ibaan amọ emaewọññọ anye esịd ekeene mme abasi mfen, ndin esịd amọ ikinekkeke ikpono Abọọñ Abasi amọ aba, naña esịd Defid ete amọ akeba. 5 Sọlọmọn amaakeene Astọred abasianwaan mbon Sidọn, ye Molek mbubiam abasi mbon Amọn. 6 Ke ntoro Sọlọmọn amaanam idiọọkñkpọ ke anyen Abọọñ; anye ikikeeneke Abọọñ ke afịd esịd, naña Defid ete amọ akenam.

7 Ke abod ke usakkautịn Yeruselem, Sọlọmọn amaabọp ñkoñ-ñkoñ itie anọ Kemos mbubiam abasi Mọb, ye Mọlek mbubiam abasi mbon Amọn. 8 Anye amaanam ntom anọ afịd mme isen ibaan amọ, e-ekefọppọ insensi enyʌñ enam uwa enọ mme abasi ammọ.

9 Abọọñ amaayat esịd ye Sọlọmọn ke ntak a-adooho esịd amọ amaawọññọ akpọñ Abọọñ, Abasi Isrel, a-akeyaarake idem awọt anye akañ iba. 10 Akpesʌkado anye amaakpan Sọlọmọn adikeene mme abasi mfen, Sọlọmọn ikinamma item Abọọñ. 11 Ndin Abọọñ amaabo Sọlọmọn, "Sia afo abaaha ntom ndin afo unịmme edioomo mmi ye mme ewʌhọ mmi, ake ami ñkuwuuhọ fiin, ami ñyaawaak abioubọọñ ado ñnyʌñ nnọ keed ke atu awo mfo. 12 Kpayeado, ke ntak Defid ete mfo, ndiinamma ke ayio uwem mfo. Ñyaawaak nsio ke ubọk ayịn mfo. 13 Ado ndiiwaaha afịd abioubọọñ nto anye, ado ñyaanọ anye esiin keed ke ntak Defid afʌnadeen mmi ye ke ntak Yeruselem, ake ami mmekke."

14 Ndin Abọọñ amaanam asua anọ Sọlọmọn, ato ke Hadad awo Edọm, ke ufọkubọọñ Edọm. 15 Idaha Defid akenwanake ye Edọm, Yoab adaiso udịmekọñ, a-akekaaha edibuuk mme akpañkpa, amaawot afịd ideen ke Edọm. 16 Yoab ye afịd mbon Isrel emaebañña do afịd afiọñ itiokeed, tutu ammọ esobo afịd ideen ke Edọm. 17 Ado Hadad, akesʌkkọ ado etək akparawa, amaafeghe akaa Iyib ye usʌk mme adaaha Edọm e-ekenamma utom enọ ete amọ. 18 Ammọ emaeto Midian ekaa Paran. Ndin ammọ emaekoono mbon awo ke Paran edian idem, emaekaa Iyib, ebịne Fero adidem Iyib, a-akenọọhọ anye ufọk ye isọñ anyʌñ anọ anye ndidia.

19 Fero amaanem esịd eti-eti ye Hadad tutu anye anọ anye ataa ayịneka anwaan amọ, Abọọñanwaan Tapenes, ke ndọ. 20 Ayịneka Tapenes amaaman ayịn a-akekereke Kenubad, ake Tapenes akebọọhọ ke ufọkubọọñ adidem. Kenubad amaadʌñ do ye nditọ Fero.

21 Idaha anye akebaaha ke Iyib, Hadad amaakop ke Defid amaakebọ nduọkadudu ye mme ete amọ ndin ñko ke Yoab adaiso ekọñ amaakpa. Ndin Hadad ate Fero, "Yak ami ñka, nọ ami ntịme ñnyọñ ñka idịd mmi."

22 Fero amaabịp. "Nsoo ñkpọ ke afo anana ke umi a-anamma yak ayem itịmme ñka idịd ndufo?"

Hadad amaabọọrọ, "Ñkpọ ibaaha, ado yak ami ñka!"

23 Ndin Abasi amaasio asua mfen anọ Sọlọmọn, Resọn ayịn Eliada, a-akefegheke akpọñ eteufọk amọ, Hadadesa adidem Soba. 24 Idaha Defid akesoboke udịmekọñ Soba, Resọn ayịn Eliada amaakoono udịm awo adian idem amọ ndin akappa ado adaiwuod ammọ; ndin ammọ emaedaaña ekaa Damaskọs, ekedʌñọ do enyʌñ edat ukara. 25 Resọn akedo asua Isrel adaña nte Sọlọmọn akeduuho uwem, adat adian ye mfịna Hadad akenamma. Ndin Resọn amaakara ke Aram anyʌñ anie usua abaña Isrel.

26 Ñko, Yerobuam ayịn Nebad amaadakka ada anwana ye adidem. Anye akedo keed ke atu mme adaaha Sọlọmọn, awo Ifrem a-aketooho Sereda, ndin eka amọ akedo ebekpa a-akekereke Serua.

27 Kop mbʌk naña anye akenwana mi ye adidem: Sọlọmọn amaabọp mme esa anyʌñ asiit mme ufañ ke ndibene abio Defid ete amọ. 28 Ndin Yerobuam akedo awuọiso awo, ndin Sọlọmọn akekịt naña anye anam utom mfọn-mfọn, anye amaaben anye anịm adise ñkpọ mbaña afịd mbon utom ake mme ubon Yosef.

29 Ke ini ado Yerobuam akewuọhọ akpọñ Yeruselem, ndin Ahiya prọfed Silo asoobo anye ke usʌñ, asịne ufa afọñidem. Ammọ awo iba ekeba ikpọọñ ke abioinwañ, 30 ndin Ahiya amaaben ufa afọñidem ake anye akesịneke awai anye ke mbai duob mme iba. 31 Ndin anye abo Yerobuam, "Dat mbai duob nọ idem mfo, sia se Abọọñ, Abasi Isrel abo ado ami: ‘Sese, ami ñyaawaak abioubọọñ nsio ke ubọk Sọlọmọn ndin unọ fiin esiin duob. 32 Ado ke ntak afʌnadeen mmi Defid ye abio Yeruselem, ami mmaakemek ke atu mme esiin Isrel, anye ayaanie esiin keed. 33 Ami ñyaanam ntom sia ammọ ediañña eñkpọñ miin enyʌñ ekekpono Astọred abasianwaan mbon Sidọn, Kemos abasi mme Mọb, Molek abasi mbon Amọn, ndin isañake ke ñkobitem mmi, inyʌññọ inam se inen ke iso mmi, inyʌññọ inịm mme ewʌhọ ye mme mbed mmi, naña Defid, ete Sọlọmọn, akenam.

34 " ‘Ado ndiibọọhọ afịd abioubọọñ ke ubọk Sọlọmọn; ami mmenam anye adaukara ke afịd ayio uwem amọ ke ntak Defid afʌnadeen mmi, ake ami ñkemekke a-akenyʌññọ anịm mme item ye mme ewʌhọ mmi. 35 Ami ñyaabọ ayịn amọ abioubọọñ ke ubọk ñnyʌñ unọ fiin mme esiin duob. 36 Ami ñyaanọ ayịn amọ esiin keed nọ Defid afʌnadeen mmi asʌk anie utuenikañ ke iso mmi ke Yeruselem, abio ake ami ñkemekke adinịm Anyịñ mmi. 37 Ado, amaado afo, ami ñyauben fiin, ndin afo ayaakaara ke afịd se ido udọñ esịd mfo, afo ayaado adidem ke Isrel. 38 Adieke afo uduunam se adodo ake ami mbo yak afo anam ndin asaña ke ñkobitem mmi anyʌñ anam se inen ke anyen mmi ke adinịm mme ewʌhọ ye mme item mmi, naña Defid afʌnadeen mmi akenam, ami ñyaaba ye afo. Ami ñyaabọp ubon ubọọñ mfo asọọñọ ada nte anye añkebọppọ nnọ Defid ñnyʌñ unọ fiin Isrel. 39 Ami ñyaasuuhọ ubon Defid ke ntak ami, ado idiidooho ke nsi-nsi.’ "

40 Sọlọmọn amaanwana adiwot Yerobuam, ado Yerobuam amaafeghe akaa Iyib, abịne adidem Sisak, anyʌñ atie do tutu ñkpa Sọlọmọn.

41 Amaado mme edinam mfen ke ini ukara Sọlọmọn, afịd se anye akenam ye aniọñ ake anye akewọttọ ado nte awo iwette isịn ke ñwed mme ubọkutom Sọlọmọn? 42 Sọlọmọn amaatie ke Yeruselem akara ke afịd Isrel ke isua aba. 43 Ndin Sọlọmọn amaakeduọk adudu ye mme eteete amọ emaenyʌñ ebuuk anye ke abio Defid ete amọ. Ndin Rehoboam ayịn amọ amaadat itie amọ nte adidem.