1 Ke Sọlọmọn amaakekweeñe adibọp tembịd Abọọñ ye ufọkadidem, ke amaakenyʌñ anam afịd se anye akeduak adinam, 2 Abọọñ amaayaara idem awọt Sọlọmọn ayọhọ akañ iba, kpa naña anye akeyaara idem anọ anye ke Kibiọn. 3 Abọọñ amaabo anye:

"Ami mmekop akam ye ñkpeubọk ake afo anịmme ke iso mmi; ami mmediọñ tembịd ami, ake afo abọppọ, ke adinịm Anyịñ mmi ke ndo ke nsi-nsi. Anyen mmi ye esịd mmi ediiba do afịd-afịd ini.

4 "Amaado afo, adieke afo asañake ke iso mmi ke akpanikọ ke eti esịd ye adinenido, naña Defid ete mfo akenam, anyʌñ anam afịd item se unọọ anyʌñ anam mme ewʌhọ ye mme mbed mmi, 5 ami ñyaanam ebekpo ubọọñ mfo asọọñọ ada ke nsi-nsi, kpa naña ñkenwọñọ nnọ Defid ete mfo idaha añkebooho, ‘Afo uduunanake awo se idiitie ke ebekpo Isrel.’

6 "Ado adieke afo me ubon mfo ewọññọke eñkpọñ miin inyʌññọ inam mme item ye mme ewʌhọ ake ami unọọhọ fiin ndin ekaa ekenam ñkpọ enọ mme abasi mfen enyʌñ ekekpono ammọ, 7 ndin ami ñyaakpịkke Isrel nsio ke isọñ ami nnọọhọ ammọ ñnyʌñ nsịn tembịd ami ake ami ndiọññọ nnọ Anyịñ mmi asaña-asaña. Isrel ayaakappa ado ufiid ye ñkpọ ndọk ke atu mme awo. 8 Itieukpono ami ayaakappa ado itoon mbio. Afịd awo se iboiyo eyaenọ ñnyọọ enyʌñ ebo, ‘Nsoo ido nọ Abọọñ anam utọ ñkpọ ami ke idịd ami ye ke tembịd ami?’ 9 Mbon awo eyaebọọrọ, ‘Sia ammọ ewọññọ ekpọñ Abọọñ Abasi ammọ, a-akesioho mme ete ammọ ato Iyib, ndin ekanna efat mme abasi mfen, ekpono enyʌñ enam ñkpọ enọ ammọ, ntak ado anam Abọọñ anọ ammọ afịd ukuud ami.’ "

10 Ke utịd isua edịb, ini ake Sọlọmọn akedatta abọp mme ufọk iba ami: tembịd Abọọñ ye ufọk ubọọñ adidem, 11 Adidem Sọlọmọn amaanọ Hiram adidem Tai abio edịb ke Kalili, sia Hiram akenọọ anye afịd sida ye yunipa ye kold se anye akeyem. 12 Ado Hiram aketo Tai akese mme abio Sọlọmọn akenọọhọ anye, anye ikikoppo inemesịd ibaña ammọ. 13 Anye amaabịp abo, "Nsoo utọ mme abio idoñño ami ke afo annọ miin, ayịneka?" Ndin anye amaakoot mme abio ado Isọñ Kabul, anyịñ ammọ ekereke tutu usen mfịn. 14 Ndin Hiram amaanọ talen kold ikie mme edịb (120)* esọk adidem.

15 Anyem ado etob a-abañake utom ufiik ake Adidem Sọlọmọn akenyịkke mme awo nọ ebọp tembịd Abọọñ, ufọk ubọọñ amọ, mme ntondʌk esa, ndibene Yeruselem, ye ake Hasọ, Mekido ye Kesa. 16 (Fero adidem Iyib amaanwana anyʌñ adat abio Kesa. Anye amaakịm ikañ asịn do. Anye amaawot mbon Kenan ekedʌñọke do ndin amaaben anọ nte enọ ñkpọ ndọ ayịn awonwaan amọ, anwaan Sọlọmọn. 17 Ndin Sọlọmọn amaamaana abọp Kesa.) Anye amaabọp Usuuk Bed Họrọn, 18 Baalad, ye Tadmọọ ke akpautatan, ke isọñ amọ, 19 kpa ye afịd mme abio ubonoñkpọ ye mme abio ake mme sariọd ye mme enañmbakara Sọlọmọn, se anye akpekeyeyem adibọp ke Yeruselem, ke Lebanọn ye ke afịd itie se anye akekara.

20 Akesʌk ababa mbon awo ekesʌhọke ke atu mbon Amọọ, mbon Hed, mbon Peris, mbon Hif, ye mbon Yebus (mbon ami ikidoññoke mbon Isrel). 21 Sọlọmọn amaanyịk anyʌñ akoono afịd mbon ubon idịd ami se ikisʌhọ ke isọñ ake mbon Isrel imiikikanna isobo ima, nọ ammọ enam utom enọ ammọ nte ifʌn mbon utom, kpa naña asʌk aba tutu adiwuọ mfịn. 22 Ado Sọlọmọn ikidatta ifʌn ito mbon Isrel; ammọ ekedoñño mme anwana ekọñ, mme anam utom abio, mme adaiwuod, mme etubom ekọñ ye mme adaiso mme sariọd ye mme andiwad mme sariọd. 23 Ammọ ñko ekedoñño mme adaaha e-ekeseeghe ñkpọ ebaña mme utom Sọlọmọn, mme adaaha ikie ition mme aba mme duob (550) ekesise ñkpọ ebaña mbon e-ekenamma utom ado.

24 Ke ayịn awonwaan Fero amaaketo Abio Defid adi ufọkadidem Sọlọmọn akebọppọ anọ anye akpọ-akpọ, Sọlọmọn amaadibọp mme ntondʌk esa.

25 Sọlọmọn akesiwa ufọfọb uwa ye uwa ewuana ke akpokoro uwa a-anye akebọppọ anọ Abọọñ akañ ita ke isua, afọp insensi ye ammọ ke iso Abọọñ, ke ntoro anye amaanam se akpena nte anye anam nte ubiọñutom ke tembịd.

26 Adidem Sọlọmọn amaanyʌñ abọp mme ubom ke Esiọn Keba, a-akpereke Elad ke Edọm, ke esʌk Ndad-Ndad Inyañ. 27 Ndin Hiram amaadọñ ikọd amọ, mme awadinyañ e-ekediọọñọke akpainyañ, ekekeene ewat inyañ ye mbon Sọlọmọn. 28 Ammọ emaewat ekewuọ Ọfia enyʌñ edat talen kold ikie inaañ mme edịb (420)* enyọñ edi, ediyaak enọ Adidem Sọlọmọn.