1 Ato ke ikọ Abọọñ awo Abasi amaato Yuda adika Beteel, naña Yerobuam akedaaha ke mben akpokoro uwa adinọ enọ. 2 Ato ke ikọ Abọọñ anye amaasua anọ akpokoro uwa: "Akpokoro uwa, akpokoro uwa! Se Abọọñ abo ado ami: ‘Ayịn awodeen e-ekoodo Yosaiya ayaamana anọ ufọk Defid. Ke afo anye ayaawa mme aku ñkoñ-ñkoñ itie e-enamma uwa mi, ndin eyaefọp mme akpọ awo ke idem mfo.’ " 3 Kpasʌk ke usen ado awo Abasi ado amaanọ idiọọñọ: "Anyem ado idiọọñọ Abọọñ akeyaarake: Akpokoro uwa ayaabakka ke ikpeghe iba ndin eyaeduọk mme ntọñ a-adoroke ke anye."

4 Ke ini Adidem Yerobuam akekoppo se awo Abasi aketañ abaña akpokoro uwa ke Beteel, anye amaanyan ubọk amọ ato akpokoro uwa anyʌñ abo, "Imʌm anye!" Ado ubọk a-anye akesioho anyan awo Abasi ado amaadiappa, ndin anye ikikanna idʌt ubọk ado aba idat. 5 Ñko, akpokoro uwa amaasakka mbai-mbai ndin ntọñ amọ amaaduọkkọ kpa naña idiọọñọ awo Abasi akenọọhọ akedo ato ikọ Abọọñ.

6 Ndin adidem amaabo awo Abasi, "Kpe Abọọñ Abasi mfo ubọk nnọ nyʌñ bọñ akam nnọ miin yak ubọk mmi amaana anie uwem naña akeba akpa." Ndin awo Abasi amaakpe ubọk anọ Abọọñ, ndin ubọk amọ amaamaana anie uwem naña akeba akpa.

7 Adidem amaabo awo Abasi, "Di yak ika ufọk mmi ikidia ndidia ndin ami ñyaunọ fiin enọ."

8 Ado awo Abasi ado amaabọọrọ adidem, "Akpekọm ayem innọ mbakka iba inie mfo, ñkpukeeneke, ñnyʌññọ ndia ñkpọ me ñnwọñ mmọọñ mi. 9 Sia uyio Abọọñ amañkpan: ‘Inaaha adia ñkpọ me anwọñ mmọọñ me asaña usʌñ akesañake adi anyọñ.’ " 10 Ke ntoro anye amaasaña usʌñ mfen inyʌññọ isaña ke usʌñ a-anye aketooho adi Beteel.

11 Ndin amaaba prọfed keed a-akedʌññọ ke Beteel a-adooho amaasọñ, ake nditọ amọ ekedidọkkọke anye afịd ñkpọ se awo Abasi akenam usen ado. Ammọ emaenyʌñ edọkkọ anye se anye akebo adidem. 12 Ete ammọ amaabịp ammọ, "Usʌñ uke ke anye akedʌk?" Ndin nditọ ideen amọ emaewọt anye usʌñ awo Abasi a-aketooho Yuda akedʌkkọ. 13 Ndin anye amaabo nditọ amọ ate, "Ibeeñe dọñki idem innọ." Ke ammọ emaekebeeñe dọñki idem ima, anye amaadọọk anye 14 anyʌñ awat abịne awo Abasi ado. Anye amaakịt anye naña atie ke idak afriyo keed ndin amaabịp, "Afo ado awo Abasi a-aketooho Yuda adi?"

Anye amaabọọrọ, "Ami ke ado."

15 Ndin aku amaabo anye, "Di ika ufọk mmi ikidia ñkpọ."

16 Awo Abasi ado amaabo, "Ami ñkemeke ikanna iso ntịmme ukeene fiin, me edidia ñkpọ me edinwọñ mmọọñ ye afo ke itie ami. 17 Emaembo eto uyio Abọọñ: ‘Inaaha afo adia ñkpọ me anwọñ mmọọñ do me amaana asaña usʌñ akesañake adi anyọñ.’ "

18 Prọfed akesọññọ mi amaabọọrọ, "Ami ñko ndo aku, kpa naña afo ado. Ndin enyere amambo miin ato uyio Abọọñ: ‘Dat anye di ufọk mfo nọ anye adidia ñkpọ anyʌñ anwọñ mmọọñ.’ " (Ado anye akesʌhọ nsu anọ anye.) 19 Ndin awo Abasi ado amaatịmme akeene anye akedia anyʌñ anwọñ ke ufọk amọ.

20 Idaha ammọ ekesʌkkọ edia ñkpọ, uyio Abọọñ amaasịm akaan prọfed a-akedatta anye anyọñ adi. 21 Anye asio ñkpo adọkkọ awo Abasi a-aketooho Yuda adi, "Se Abọọñ abo ado ami: ‘Afo amesọñ iwuod ye uyio Abọọñ unyʌññọ unam item Abọọñ Abasi mfo unọọhọ fiin. 22 Afo amaatịmme adi adidia anyʌñ anwọñ ke itie a-anye akebooho kuudia kuunyʌñ unwọñ. Ke ntak ado akpo mfo idiibʌhọke ke udi mme eteete mfo.’ "

23 Ke awo Abasi ado amaakedia ñkpọ ima anyʌñ anwọñ ama, prọfed a-akedatta anye adi amaabeeñe dọñki amọ anọ anye. 24 Ke ini anye asʌkkọ aka ke usʌñ, ekpe amaasoobo anye anyʌñ awot anye, ndin akpo amọ amaanaa ke usʌñ, ndin dọñki ye ekpe eda ke mben ado. 25 Usʌk awo ekeboiyoke emaekịt akpo naña ana do, ndin ekpe ada ke mben akpo ado, ndin ammọ emaekaa ekedọkkọ ke abio ake akaan prọfed akedʌññọ.

26 Ke ini prọfed a-akedatta anye ke isañ amọ atịmme adi akekoppo abaña ami, anye amaabo, "Ado awo Abasi a-akesọññọ iwuod ye ikọ Abọọñ. Abọọñ a-ayaak anye anọ ekpe, ndin ekpe awot anye anyʌñ ata anye, kpa naña ikọ Abọọñ aketañ abaña."

27 Aku ado amaabo nditọ ideen amọ, "Idiọñ dọñki innọ," ndin ammọ emaenam ntoro. 28 Ndin anye amaawuọ akaa akekịt akpo amọ naña ana ke usʌñ, ekpe ye dọñki naña eda ke ñkañ amọ. Ekpe ikitaaha akpo inyʌññọ ikịm dọñki. 29 Ndin prọfed amaaben akpo awo Abasi ado, adot ke dọñki, ndin aben anye atịmme adi abio amọ adi adifʌhọ anye ñnyʌñ mbuuk anye. 30 Ndin anye amaanịm akpo amọ ke udi amọ, ndin ammọ efʌhọ anye enyʌñ ete, "O mbọm, ayịnete mmi!"

31 Ke emaekebuuk awo Abasi ado, anye amaabo nditọ ideen amọ, "Ami mmaakpa, imbuuk miin ke udi a-awo Abasi ami abʌhọke; ibon akpọ mmi idian akpọ amọ. 32 Sia etob anye akenọọhọ ato uyio Abọọñ abaña akpokoro uwa ke Beteel ye afịd mme ñkoñ-ñkoñ itie ke mme abio Sameria ayaasu ke akpanikọ."

33 Kpa ke ami amaakeboiyo, Yerobuam ikikpəhoke ndiọi usʌñ amọ, ado inikeed mfen anye amaamek mme aku ato mme nsio-nsio awo anọ mme ñkoñ-ñkoñ itie. Awo akeekeyeyem adido aku anye amaadiọñ anọ ñkoñ-ñkoñ itie. 34 Ami akedo idiọọkñkpọ u-ufọk Yerobuam akenamma nọ anye aduọ enyʌñ esobo anye esio ke iso isọñ.