1 Akema Ehab amaadọkkọ Yesibeel afịd ñkpọ se Elaiya akenam ye naña anye akewot afịd mme prọfed ke akañkañ. 2 Ndin Yesibeel amaadọñ isʌñutom utom anọ Elaiya ate, "Yak mme abasi enam ye ami, akpọsọñ-akpọsọñ, akpedo awuọ ñkpọñ idaha ntom ami nnamma uwem mfo atie nte keed ke atu ammọ."

3 Elaiya amaakop ndịk anyʌñ afeghe ke ntak uwem amọ. Anye akediwuọ Beeseba ke Yuda, anye amaakpọñ ayịnufọk amọ ke udo, 4 ke ini anye ke idem amọ amaakesaña isañ usen keed akaa anaan. Anye amaadiwuọ itie eto ayañ, asuuk atie ke idak amọ anyʌñ abọñ akam ate yak ikpa. Anye amaabo, "Abọọñ, ami mmekpa mba. Dat uwem mmi; ami mfọnnọ ñkan mme eteete mmi." 5 Ndin anye amaasuuk anaa ke idak ikọd nsadañ anyʌñ adaiya.

Ndin inikeed enyere amaatuuk anye ndin abo, "Dakka da nyʌñ dia ñkpọ." 6 Anye amaase ñkanñkʌk, ndin ke mben iwuod amọ akedo uyo emaeketem ke ufiob ukañ, ye atu mmọọñ. Anye amaadia anyʌñ anwọñ ndin amaana asuuk anaa.

7 Ndin enyere Abọọñ amaatịmme adi ayọhọ akañ iba anyʌñ atuuk anye ndin ate, "Dakka da nyʌñ dia, sia isañ ayaukak fiin." 8 Ndin anye amaadakka ada ndin amaadia anyʌñ anwọñ. Ndidia ado amaanọ anye inweek, anye amaasaña usen aba ye akonayio aba tutu anye akewuọ Họreb, abod Abasi. 9 Ke udo anye amaadʌk abaitiad keed akedaiya akonayio ado.

Ndin uyio Abọọñ amaasịm anye: "Elaiya, nsoo ke afo anam ke mmi?"

10 Anye amaabọọrọ, "Ami mmenekke nsịn ifịk mbaña Abọọñ Abasi Andikponñkan. Mbon Isrel esịn edioomo mfo, ewuut mme akpokoro uwa mfo, enyʌñ ewot mme prọfed mfo ke akañkañ. Ami kpọd nsʌhọ, ndin idahami ammọ eyem ediñwot miin ñko."

11 Abọọñ amaabo, "Saña wuọ nyʌñ kaa keda ke anyọñ abod ke iso Abọọñ, sia Abọọñ ayaadiboiyo."

Ndin ekamba ye akpọsọñ ayobio amaaboom mme ikpọabod anyʌñ asuan mme ikpọitiad ke iso Abọọñ, ado Abọọñ ikisịneke ke ayobio ado. Ke ayobio amaakeboiyo unyekisọñ amaatịppe, ado Abọọñ ikisịneke ke unyekisọñ ado. 12 Ke unyekisọñ amaakeboiyo ikañ amaadi, ado Abọọñ ikisịneke ke ikañ ado. Ndin ke ikañ amaakeboiyo sʌñ-sʌñ uyio adu amaadi. 13 Elaiya akekop ami, anye amaatuut afọñ amọ afʌk iso amọ ndin amaawuọ akeda ke inuaatob abaitiad ado.

Ndin uyio amaabo anye, "Elaiya, nsoo ke afo anam ke mmi?"

14 Anye amaabọọrọ, "Ami mmenekke nsịn ifịk mbaña Abọọñ Abasi Andikponñkan. Mbon Isrel esịn edioomo mfo, ewuut mme akpokoro uwa mfo, enyʌñ ewot mme prọfed mfo ke akañkañ. Ami kpọd nsʌhọ, ndin idahami ammọ eyem ediñwot miin ñko."

15 Abọọñ amaabo anye, "Tịmme kaa usʌñ a-afo aketooho adi, nyʌñ kaa ke Akpautatan Damaskọs. Afo amaakesịm do, yet Hasel adan nte adidem Aram. 16 Ñko, yet Yehu ayịn Nimsi nọ ado adidem Isrel, ndin yet Elisa ayịn Safad ke Ebeel Mehola adidat itie mfo nte prọfed. 17 Yehu ayaawot awo ndomokeed a-abọkkọke eduad Hasel, ndin Elisa ayaawot awo akeedodo a-abọkkọke akañkañ Yehu. 18 Ado ami mmesʌhọ awo tọsịn itiaba (7,000) ke Isrel, afịd mbon ake imiitọọñọke edọñ ammọ inọ Baal ye mbon ake imiitʌmmọ anye inua."

19 Ndin Elaiya amaakpọñ do akekịt Elisa ayịn Safad. Anye akesʌk afʌñ isọñ ye mme akpọnọ abaakenañ utominwañ duob mme iba, anye ke idem amọ akewat ayọhọ duob mme iba ado. Elaiya amaasaña akpere anye ndin atop afọñ amọ afʌk anye. 20 Ndin Elisa amaadakka akpọñ ayaaraenañ amọ afeghe akeene Elaiya. Anye amaabo, "Yak ñkọọm ete ye eka mmi etie sʌñ, ndin ñyaadukeene fiin."

Elaiya amaabọọrọ, "Tịmme edem. Nsoo ke ami unam fiin?"

21 Ndin Elisa amaatịmme akpọñ anye anyʌñ anyọñ. Anye amaakoono mme akpọnọ ñyaaraenañ amọ anyʌñ awot ammọ. Anye amaafọp ñkpọ ufʌñ isọñ akama afọp unam ado anọ mbon awo, ammọ emaenyʌñ eta. Ndin anye amaadibeeñe idem adikeene Elaiya anyʌñ akappa ado ayịnufọk amọ.