1 Ke ini ado Abiya ayịn Yerobuam amaadidọñọ, 2 ndin Yerobuam amaabo anwaan amọ, "Kaa, dịp idem mfo, mbaak edidiọọñọ ke ado anwaan Yerobuam. Ndin kaa Silo. Prọfed Ahiya aba do, anye a-akebooho ke ami ndiido adidem nnọọ ibon ami. 3 Ben idem uyo duob, mme kek ye atu adanakwọọk keed, nyʌñ kaa bịne anye. Anye ayaudọkkọ se idiitịppe inọ ayịn ado." 4 Ndin anwaan Yerobuam amaanam se anye akebo anyʌñ akaa ufọk Ahiya ke Silo.

Ndin Ahiya ikimọọnọke usʌñ; anyen amọ amaakappa nnan sia anye amaasọñ. 5 Ado Abọọñ amaadọkkọ Ahiya, "Anwaan Yerobuam asʌk adi adibịp mbaña ayịn amọ, sia anye adọdọñọ, ndin ana anọ anye ibọọrọ ntom. Anye amaadiwuọ, anye adiinam nte ido awo mfen."

6 Ndin ke ini Ahiya akekoppo uyio ikpadisañ amọ ke inuausʌñ, anye ate, "Dʌk di, anwaan Yerobuam. Nsoo ido ntak ñkara ami? Endọñ miin idiọọk etob unọ fiin. 7 Kaa, dọkkọ Yerobuam se Abọọñ, Abasi Isrel, abo: ‘Ami mmaudịppe fiin nsio ke atu mme awo ñnyʌñ umek fiin adaukara anọ mbon mmi Isrel. 8 Ami mmaawaak abioubọọñ nsio ke ufọk Defid ndin mmaaben unọ fiin, ado afo ubaaha nte afʌnadeen mmi Defid, a-akenịmme mme item mmi anyʌñ añkeene miin ke afịd esịd amọ, anam se inen ke iso mmi kpọd. 9 Afo amenam mme isen abasi anọ idem mfo, mme ubobodñkpọ e-ekamake ukwak enam; afo amenam esịd añyat miin ndin amewọññọ edem mfo añwọt miin.

10 " ‘Ke ntak ami, ami ñyaasịn nsobo ke ufọk Yerobuam. Ami ñyaawot afịd akpatre ayịn awodeen ke Isrel, ye ke adooho afʌn me amanaisọñ. Ami ñyaafọp ufọk Yerobuam nte awo afọp uduañ, tutu anye asop afịd. 11 Mme ewa eyaeta mbon Yerobuam e-ekpaaha ke abio, ndin mme inuen eyaeta mbon e-ekpaaha ke esịdidʌñ. Abọọñ atañ!’

12 "Amaado afo, tịmme nyọñ ufọk. Umaudodot ñkpad ke abio mfo, ayịn awodeen ado ayaakpa. 13 Afịd Isrel eyaefʌhọ anye ndin ebuuk anye, sia anye ikpọọñ ke ubon Yerobuam ke edibuuk, sia anye ikpọọñ ke ufọk Yerobuam ke Abọọñ, Abasi Isrel, akịt se ifọn.

14 "Abọọñ ayaasio adidem anọ idem amọ ke Isrel adiidiañña ubon Yerobuam isio. Atọtọọñọ aditịppe idahami. 15 Ndin Abọọñ ayaafʌnnọ Isrel, anye ayaatie nte ñnyanyaha anyeeñeke ke mmọọñ. Anye ayaawịppe Isrel asio ke eti isọñ ami ake anye akenọọhọ mme eteete ammọ anyʌñ asuan ammọ abọhọ Inyañ Yufretis, sia ammọ edemme ifiobesịd Abọọñ ke edinam mme abai Asera. 16 Ndin anye ayaasaana Isrel ayaak ke ntak ndiọiñkpọ Yerobuam anamma Isrel enam."

17 Ndin anwaan Yerobuam amaadakka ada akaa Tiasa. Anye akesʌk adodot ukod ke esaufọk, ayịn ado amaakpa. 18 Ammọ emaebuuk anye, ndin afịd Isrel emaefʌhọ anye, kpa naña Abọọñ aketañ ato afʌnadeen amọ prọfed Ahiya.

19 Mme ñkpọ mfen ke ukara Yerobuam, mme ekọñ ye naña anye akekara, ewet esịn ke ñwed mbʌkutom mme ndidem Isrel. 20 Yerobuam amaakara ke isua edịb mme iba ndin akeduọk adudu ye mme eteete amọ. Ndin Nadab ayịn amọ amaadat itie amọ nte adidem.

21 Rehoboam ayịn Sọlọmọn akedo adidem ke Yuda. Anye akedo isua aba mme keed idaha anye akedooho adidem, anyʌñ akara isua duob mme itiaba ke Yeruselem, abio ake Abọọñ akemekke asio ke atu afịd esiin Isrel nọ anịm Anyịñ Amọ. Anyịñ eka amọ akedo Naama; anye akedo awonwaan Amọn.

22 Yuda amaanam idiọọkñkpọ ke anyen Abọọñ. Ato ke idiọọkñkpọ a-ammọ ekenamma ammọ emaedemme iyadesịd ufịb amọ akan naña mbon usen edem ekenam. 23 Ammọ emaenyʌñ enam mme ñkoñ-ñkoñ itie enọ idem ammọ, mme asaña-asaña itiad ye abai Asera ke afịd abod ye ke idak eto a-atarake. 24 Mme akpara ideen emaekeene eba ke abio; mme awo emaenam nsio-nsio mbubiam ido ake mme idịd Abọọñ akebịnne asio ke iso mbon Isrel.

25 Ke ayọhọ isua ition ke ukara Adidem Rehoboam, Sisak adidem Iyib amaanwana ye Yeruselem. 26 Anye amaakoono mme ñkpọuto ke tembịd Abọọñ ye mme ñkpọuto ke ufọk adidem. Anye amaakoono afịd ñkpọ, wuọ mme atuekọñ kold Sọlọmọn akenaññake. 27 Ke ntak ado, Adidem Rehoboam amaanam mme atuekọñ ke akpoho nọ ekama ekpuuño mbon e-ekekoonoke do anyʌñ abakka ammọ anọ mme adaiso mbon ukpeme e-ebaaha ke utom ke inuaatob ufọkadidem. 28 Ini akeedodo adidem akesikaaha tembịd Abọọñ, mbon ukpeme ekesikama mme atuekọñ ado, emaema ekoono ammọ ekebono ke ufọk ukpeme.

29 Amaado mme ñkpọ mfen e-ekenamma ke ukara Rehoboam, ye afịd se anye akenam, ado nte awo iwette ammọ isịn ke ñwed mbʌkutom mme ndidem Yuda? 30 Ekọñ akekaaka iso aba ke ufọọd Rehoboam ye Yerobuam. 31 Ndin Rehoboam amaakeduọk adudu ye mme eteete amọ ndin emaebuuk anye ye ammọ ke Abio Defid. Eka amọ akekere Naama; anye akedo awonwaan Amọn. Ndin ayịn Rehoboam, Abiya, akedat itie amọ nte adidem.