1 Sọlọmọn amaanam edioomo ye Fero adidem Iyib anyʌñ adọ ayịn amọ awonwaan. Anye amaaben anye adi Abio Defid tutu anye akekweeñe adibọp ufọk amọ ye itieukpono Abọọñ, ye ndibene akannake Yeruselem. 2 Mbon awo ekesʌk ewawa uwa ke mme ñkoñ-ñkoñ itie, sia awo imiikibọppọ itieukpono inọ Anyịñ Abọọñ kaña. 3 Sọlọmọn amaawọt ima a-anye akenieghe anọ Abọọñ ke adisaña ke item ete amọ Defid akenọọhọ anye, ukweeñe ado ke anye akewa uwa ke mme ñkoñ-ñkoñ itie.

4 Adidem amaakaa Kibiọn adikiwa uwa, sia itie ado akedo ataa akpan ñkoñ-ñkoñ itieukpono, ndin Sọlọmọn amaawa ufọfọb uwa tọsịn keed (1,000) ke itieukpono ado. 5 Ke Kibiọn Abọọñ amaabiọññọ anọ Sọlọmọn ke ndab ke akonayio, ndin Abasi amaabo, "Beeñe ñkpọ akeedodo afo ayemme nọ ami unọ fiin."

6 Sọlọmọn amaabọọrọ, "Afo amefọn eti-eti ye afʌnadeen mfo, ete mmi Defid, sia anye amaanam akpanikọ unọ fiin anyʌñ asaña nnekke-nnekke anyʌñ anie eti esịd. Afo ameka iso afọn ekamba mfọn ami anọ anye anyʌñ anọ anye ayịn aditie ke ebekpo amọ ke usen mfịn ami.

7 "Idahami, Abọọñ Abasi mmi, Afo amenam afʌnadeen mfo adidem ke itie ete mmi Defid. Ado ami ndo ataa etəkayịn ñnyʌññọ ndiọọñọ naña ñkpenam mme utom ukara mmi. 8 Afʌnadeen mfo aba mi ke atu ikọd mfo ake afo amekke, uwak-uwak udịm awo, ewak ekan se ekpebat. 9 Ke ntoro nọ afʌnadeen mfo esịd ikike se adiidat ikara ikọd mfo anyʌñ adiọọñọ se ido eti ye idiọọk. Sia anie ikan ikara utọ udịm mbon mfo ami?"

10 Abọọñ amaanem esịd ke se Sọlọmọn akebeeñe ado ami. 11 Ndin Abasi amaabo anye, "Sia afo abeeñeke ami ado ubeeñeke anyan uwem me inie unọ idem mfo, unyʌññọ ubeeñe ñkpa unọ mme asua mfo ado abeeñe ikike se akara ke unen, 12 ami ñyaanam se afo abeeñe. Ami ñyaunọ esịd aniọñ ye ikike, nọ ato do awo ndomokeed ibaaha nte afo, inyʌññọ idiibaba. 13 Ñko, ami ñyaunọ fiin se afo umuubeeñeke, ke inie ye ke ukpono, nọ ato do ke ayio uwem mfo afo uduunieghe udian ke atu mme ndidem. 14 Ndin adieke afo asañake ke ñkobitem mmi anyʌñ anịm mme ewʌhọ mmi ye item mmi naña Defid ete mfo akenam, ami ñyaunọ anyan uwem." 15 Ndin Sọlọmọn amaademme adikịt ke ndab ke akedo.

Anye amaatịmme anyọñ Yeruselem, akeda ke iso akebe edioomo Abọọñ anyʌñ awa mme ufọfọb uwa ye uwa ewuana. Ndin anye amaanam usọrọ anọ afịd awo ke akwere amọ.

16 Akekem ibaan akpara iba emaedi ebịne adidem enyʌñ edida ke iso amọ. 17 Keed ke atu ammọ amaabo, "Mbọk ke ukpono abọọñ mmi. Awonwaan ami ye ami idʌñ ke ufọk keed, ndin ami mmaaman ayịn ke anye akebaaha ye ami. 18 Usen ita amaakeboiyo tọọñọ ayịn mmi akemana, awonwaan ami amaanyʌñ aman ayịn. Ñnyịn ikpọọñ ikiba; awo mfen ikibaaha ke ufọk ibọhọke ñnyịn awo iba.

19 "Ke akonayio ayịn mma ami amaakpa sia anye amaafiik anye anaa. 20 Ndin anye amaadakka ada ke ufọọd akonayio anyʌñ aben ayịn mmi adiañña ke ñkañ mmi idaha afʌnanwaan mfo amaakedaiya. Anye amaanịm anye adian eba amọ ndin aben adukpo ayịn amọ anịm adian eba mmi. 21 Ayio akesiere, ami mmaademme adinọ ayịn mmi eba, ndin anye amaakpa! Ado ñkesuuk anyen nnekke nse anye ke unwana usiere, ami ndidiọọñọ ke idooho ayịn añkemanna ke ado."

22 Mma anye ako amaabo, "Iyoo! Aduuwem ado ayịn mmi; adukpo ayịn ado ake mfo."

Ado akpa awo amaasọọñọ ayịre, "Iyoo! Adukpo ado ake mfo; aduuwem ado ake mmi." Ammọ emaekaa iso efaaña ntoro ke iso adidem.

23 Adidem amaabo, "Anye ami ate, ‘Ayịn mmi ado aduuwem ndin ayịn mfo ado adukpo,’ ndin anye ako ate, ‘Iyoo! Ayịn mfo amaakpa ndin ake mmi ado aduuwem.’ "

24 Ndin adidem amaabo, "Innọ miin akañkañ." Ndin emaeben akañkañ esọk adidem. 25 Adidem amaanọ uyio: "Kpịkke aduuwem ayịn ado ke itie iba nyʌñ nọ awo keed ubaak keed nyʌñ nọ awo anye ako ubaak."

26 Mma anye a-ayịn amọ akedooho aduuwem amaakop mbọm abaña ayịn amọ ato ke ima a-anye akenieghe anọ ayịn amọ ndin anye amaabo adidem, "Mbọk, abọọñ mmi, yaak aduuwem ayịn ado nọ anye! Kuuwot ayịn ado!"

Ado mma anye ako amaabo, "Ñnyịn ndomokeed idiinieghe anye. Bakka anye ke itie iba!"

27 Ndin adidem amaanọ ubiideikpe amọ: "Yaak aduuwem ayịn nọ akpa awonwaan. Kuuwot anye; anye ado eka amọ."

28 Ke ini afịd Isrel ekekoppo ubiideikpe adidem akenọọhọ, ammọ emaeteeñe adidem, sia emaekịt ke anye akebọ aniọñ ato Abasi adikpe unen.