1 Ndin Elaiya awo Tisbe, a-atooho Tisbe ke Kilied, amaabo Ehab, "Adaña nte Abọọñ, Abasi Isrel, aduuho, a-ami nnamma ñkpọ nnọ, mbara me edịm idiibaaha ke isua ifañ adiighe ke iso ke imiibọhọke ke uyio mmi."

2 Ndin ikọ Abọọñ amaasịm Elaiya: 3 "Kpọñ itie ami, wọññọ kaa ke usakkautịn nyʌñ dịbe ke Abedeñ Kerịd, ke usakkautịn Yọdan. 4 Afo ayaanwọñ mmọọñ ato idịm ado, ndin ami mmedọñ mme ekọọñebʌkayob unọ fiin ndidia ke ndo."

5 Ndin anye amaanam se Abọọñ akebo anye anam. Anye amaakaa Abedeñ Kerịd, ke usakkautịn Yọdan, anyʌñ aba do. 6 Mme ekọọñebʌkayob emaeben uyo ye unam esọk anye ubakusen ye ndubiayio, ndin anye amaanwọñ mmọọñ ato idịm ado.

7 Akemaanako idịm ado amaadisat sia edịm ikideppe ke isọñ ado. 8 Ndin uyio Abọọñ amaasịm anye: 9 "Kaa Sarefad inikeed ke efaak Sidọn nyʌñ ba do. Ami mmebo yak ebekpa do unọ fiin ndidia." 10 Ndin anye amaakaa Sarefad. Anye akediwuọ inuaatob abio, ebekpa keed akesʌk atañña ifia. Anye amaakoot anye amaanyʌñ abịp, "Afo akpaadat etək mmọọñ ke atu annọ miin yak ñnwọñ?" 11 Naña anye akaaha adikidat idi, anye amaakoot, "Mbọk, nyʌñ dat etək ubaak uyo nsọk."

12 Anye amaabọọrọ, "Adaña nte Abọọñ Abasi mfo aduuho uwem, ami nnieghe uyo ndomokeed, sʌk ekpaubọk ndomuyo ke atu ye etək adan ọlif ke ikpəñ. Ami ntañ ntək ifia ami se mben ñnyọñ ufọk ñkenam ndidia nnọ idem mmi ye ayịn awodeen mmi, nọ ado ñnyịn imaidia ado ima ikpañña."

13 Elaiya amaabo anye, "Kuufeghe ndịk. Nyọñ ufọk nyʌñ kenam naña afo abo. Ado to nam etək efọk uyo nnọ miin ke atu se afo anie nyʌñ ben nsọk miin, ndin afo anam ñkpọ anọ idem mfo ye ayịn awodeen mfo. 14 Sia se Abọọñ, Abasi Isrel, abo ado ami: ‘Ndomuyo idiikweeñeke ke atu ñko adan idiisatta ke ikpəñ tutu usen Abọọñ amaanọ edịm yak adi isọñ.’ "

15 Anye amaadakka akenam naña Elaiya akebo anye. Ndin ndidia amaaba kwa usen anọ Elaiya ye awonwaan ado ye ufọk amọ. 16 Sia atu ndomuyo ikikweeñeke ndin adan ikinyʌññọ isat, kpa naña uyio Abọọñ aketañ ato Elaiya.

17 Akemaanako ayịn awonwaan a-akenieghe ufọk ado amaadidọñọ. Idem amọ amaakaaka iso adiọọk, ndin ke akpatre anye amaadop inweek. 18 Awonwaan ado amaabo Elaiya, "Nsoo mfịna ke afo anie ye ami awo Abasi? Afo akedi adintoiyo miin idiọọkñkpọ mmi ñnyʌñ ñwot ayịn mmi?"

19 Elaiya amaabọọrọ, "Nnọ ayịn mfo." Anye amaabọ anye ke ubọk amọ, aben anye akaa ubeed anyọñ a-anye akebaaha, anyʌñ ayaak anye anịm ke akwañ amọ. 20 Ndin anye amaatua akoot Abọọñ, "Abọọñ Abasi mmi, ado nte afo amedat ukuud asọk ebekpa ami ake ami mbaaha keed mi, ke adinam akparawa amọ akpa?" 21 Ndin anye amaanyanna idem amọ afʌk akparawa ado akañ ita anyʌñ atua anọ Abọọñ, "Abọọñ Abasi mmi, yak uwem akparawa atịmme abịne anye!"

22 Abọọñ amaakop ayịd Elaiya, ndin uwem akparawa ado amaatịmme adi, ndin anye amaadu. 23 Elaiya amaadịppe akparawa ado anyʌñ aben anye ato ubeed asọiyọ adʌk ufọk. Anye amaayaak anye anọ eka amọ ndin ate, "Se, ayịn mfo adu uwem!"

24 Ndin awonwaan ado amaabo Elaiya, "Idahami ami mmediọọñọ ke afo ado awo Abasi ndin ke ikọ Abọọñ a-awuọhọ ke inua mfo ado akpanikọ."