1 Ke ini ado Hesikaiya amaadọñọ anyʌñ akpere ñkpa. Prọfed Aisaiya ayịn Emọs amaakaa abịne anye akebo, "Se Abọọñ atañ ado ami: Tịm ufọk mfo nịm, sia afo ayaakpa; uduukoppo nsọñidem."

2 Hesikaiya amaawọññọ iso ase ndibene amaanyʌñ abọñ akam anọ Abọọñ, 3 "Abọọñ toiyo naña ami nsisaña ke iso mfo ke akpanikọ ye ke afịd esịd ñnyʌñ nnam se inen ke iso mfo." Ndin Hesikaiya amaatua ataa idod-idod ayịd.

4 Mbemiso Aisaiya akpọkpọñ ufọọd akwere adidem, ikọ Abọọñ amaadisịm anye: 5 "Tịmme kaa kedọkkọ Hesikaiya, andikara mbon mmi, ‘Se Abọọñ Abasi ete mfo Defid, atañ ado ami: Ami mmekop akam mfo mmenyʌñ ñkịt mmọọñayịd mfo; ami ñyaukọk fiin. Ke ayọhọ usen ita tọọñọ ke idahami afo ayaakaa tembịd Abọọñ. 6 Ami ñyaadian isua duob mme ition ke uwem mfo. Ndin ami ñyaufak fiin ye abio ami nsio ke ubọk adidem Asiria. Ami ñyaakpeme abio ami ke ntak mmi ye ke ntak afʌnadeen mmi Defid.’ "

7 Ndin Aisaiya amaabo, "Inuakka fik." Ammọ emaenam ntoro enyʌñ edot ke ndufuud ado, ndin idem amaasọñ anye.

8 Hesikaiya amaabịp Aisaiya, "Nsoo idiido idiọọñọ ke Abọọñ ayañkọk miin ndin ke ñyaadọọk ñkaa tembịd Abọọñ ke ayọhọ usen ita tọọñọ ke mfịn?"

9 Aisaiya amaabọọrọ, "Ami ado idiọọñọ Abọọñ unọọhọ fiin ke Abọọñ ayaanam se anye akenwọñọ: Ayem ndukpọñ akaa iso ikpad duob me ayem atịmme edem ikpad duob?"

10 Hesikaiya amaabo, "Ado mmem-mmem ñkpọ ndukpọñ adika iso ikpad duob, utu ke ado, yak atịmme edem ikpad duob."

11 Ndin prọfed Aisaiya amaakoot Abọọñ, ndin Abọọñ amaanam ndukpọñ atịmme edem ikpad duob naña anye aketịmmeke ke utọukod Ahas.

12 Ke ini ado Maduk-Baladan ayịn Baladan adidem Babilọn amaanọ mme ñwedetob esọk Hesikaiya ye enọ, sia anye amaakop abaña udọñọ Hesikaiya. 13 Hesikaiya amaabọ mme isʌñutom ado anyʌñ awọọt ammọ afịd se ikidọñọ ke ufọk ubonoñkpọ amọ, mme silfa, mme kold, mme anemufịk mfiọññọ ye mme nti adan ọlif, itie ñkpọekọñ ye afịd ñkpọ se ikidọñọ ke atu mme inie amọ. Ibaaha ñkpọ ndomokeed ke ufọk adidem me ke afịd idak ukara amọ ake Hesikaiya imiikiwọttọ ammọ.

14 Akem prọfed Aisaiya amaakaa abịne adidem Hesikaiya akebịp, "Nsoo ke ideen ado ekebo, ñko ammọ eketo uke edi?"

"Eketo anyan idịd," Hesikaiya amaabọọrọ, "Ammọ eketo Babilọn edi."

15 Prọfed amaabịp, "Nsoo ke ammọ ekekịt ke ufọkadidem?"

Hesikaiya amaabo, "Ammọ emaekịt afịd ñkpọ ke ufọkadidem. Ibaaha ñkpọuto ke atu inie mmi ake ami mmeñkewọttọ ammọ."

16 Ndin Aisaiya amaabo Hesikaiya, "Kop ikọ Abọọñ: 17 Ke akpanikọ ini ayaadi ake afịd ñkpọ ke ufọkubọọñ mfo, ye afịd se mbon se ikubem fiin iso ikaara ekebono tutu awuọ usen mfịn, ediikoono inyọñ Babilọn. Ñkpọ ndomokeed idiisʌhọke, Abọọñ atañ. 18 Ndin ubaak mbon ubon mfo, abʌk ye iyiib mfo se ediiman unọ fiin, eyaeben ammọ esio, ndin ammọ eyaekedo mme itọ ke ufọk adidem Babilọn."

19 Hesikaiya amaabọọrọ Aisaiya, "Ikọ Abọọñ se afo atañ afọn." Sia anye amaakere, "Nte emem ye ifuuro idiibaaha ke ayio uwem mmi?"

20 Amaado mme ñkpọ mfen ke ukara Hesikaiya, afịd se anye akenam ye naña anye akenam ñkpọdiọhọ mmọọñ ye usʌñ ake anye akedọkkọ ke esịdisọñ asio mmọọñ asịn ke abio, ado nte awo iwette isịn ke ñwed mbʌkutom ndidem Yuda? 21 Hesikaiya amaakeduọk adudu ye mme eteete amọ. Ndin Manase ayịn amọ amaadat itie amọ nte adidem.