1 Manase akedo isua duob mme iba idaha anye akedooho adidem, ndin anye amaakara ke Yeruselem isua aba mme duob mme ition. Anyịñ eka amọ akedo Hefsiba. 2 Anye amaanam idiọọkñkpọ ke iso Abọọñ, akeene mme abʌd-abʌd mbubiam ido ake mme idịd Abọọñ akebịnne asio anọ mbon Isrel. 3 Anye amaamaana abọp mme ñkoñ-ñkoñ itie ake ete amọ Hesikaiya amaakewuut; ñko anye amaabọp mme akpokoro uwa anọ Baal anyʌñ anam abai Asera, kpa naña Ehab adidem Isrel akenam. Anye amaatuak iwuod anọ afịd mme udịmanyọñ anyʌñ akpono ammọ. 4 Anye amaabọp mme akpokoro uwa ke tembịd Abọọñ, a-adooho Abọọñ amaabobo, "Ke Yeruselem ke ami ndiinịm Anyịñ mmi." 5 Ke naña akwere iba ke tembịd Abọọñ, anye amaabọp mme akpokoro uwa anọ afịd mme udịmanyọñ. 6 Anye amaawa ayịn amọ awodeen ke ikañ, abre idiọñ, aduuñọ ñkpọ, anyʌñ akaa abịne mbon useñkpọ ye mbiamfa. Anye amaanam uwak mbubiam ndiọiñkpọ ke iso Abọọñ, anam iyadesịd amọ ademme.

7 Anye amaaben ukakab eto Asera ake anye akenamma akewuuk ke esịd tembịd, a-adooho Abọọñ amaabo Defid ye ayịn amọ Sọlọmọn, "Ke tembịd ami ye ke Yeruselem, ake ami mmekke nsio ke atu mme esiin Isrel, ke ndiinịm Anyịñ mmi ke nsi-nsi. 8 Ami ndiinamma aba ukod nditọ Isrel eyooñ ekpọñ isọñ ami ñkenọọhọ mme eteete ammọ, adieke ammọ ediikpeme edinam afịd se ñkewuuk ammọ nnọ ammọ enam enyʌñ enịm afịd Mbed afʌnadeen mmi Moses akenọọhọ ammọ." 9 Ado mbon awo ikikpañña utọñ. Manase amaadat ammọ atịn usʌñ, anam ammọ emaenam idiọọkñkpọ a-akekanna ake mme idịd Abọọñ akesoboke mbemiso mbon Isrel.

10 Abọọñ amaatañ ato inua isʌñutom amọ mme prọfed: 11 "Manase adidem Yuda anam mme mbubiam ndiọiñkpọ. Anye anam ndiọiñkpọ awak akan mbon Amọọ e-ekebaññake mbemiso anye anyʌñ aben Yuda asịn ke idiọọkñkpọ ye mme ubobodñkpọ amọ. 12 Ke ntoro se Abọọñ, Abasi Isrel abo ado ami: Ami ñyaadat nsobo nsọk Yeruselem ye Yuda, utọ a-adooho utọñ afịd awo e-ekoppo ebaña anye eyaekpaaña nsa. 13 Ami ñyaanekke udʌk udomoñkpọ ekekamake ke Sameria ke Yeruselem ye ndoppo udʌk ekekamake ke ufọk Ehab. Ami ñyaakwokko Yeruselem naña awo akwokko usan, awọññọ anọ umi awọññọ asuuk ke isọñ. 14 Ami ñyaafre mme nsʌhọ udeeme mmi ñnyʌñ ñyaak ammọ nsịn ke ubọk mme asua. Mme asua ammọ eyaebịme enyʌñ esuan ammọ; 15 ammọ emaenam idiọọkñkpọ ke anyen mmi emaenyʌñ edemme ifiobesịd mmi tọọñọ ke usen ammọ ekekpọññọ Iyib tutu usen mfịn."

16 Ñko, Manase amaaduọk uwak iyiib mbon i-imiidueghe tutu ayọhọ Yeruselem tọọñọ ke edem keed akewuọ edem uko, ke amaaboiyo idiọọkñkpọ ake anye akenamma yak Yuda anam, ndin ammọ emaenam idiọọkñkpọ ke iso Abọọñ.

17 Amaado mme ñkpọ mfen se ikitịppe ke ukara Manase, ye afịd se anye akenam, dian ye idiọọkñkpọ anye akenamma, ado nte awo iwette isịn ke mme ñwed mbʌkutom ndidem Yuda? 18 Manase amaakeduọk adudu ye mme eteete amọ enyʌñ ebuuk anye ke inwañ ufọkadidem, inwañ Usa. Ndin Amọn ayịn amọ amaadat itie amọ nte adidem.

19 Amọn akedo isua edịb mme iba idaha anye akedooho adidem, ndin anye amaakara ke Yeruselem isua iba. Anyịñ eka amọ akedo Mesulemed ayịn awonwaan Harus; anye aketo Yọtba. 20 Anye amaanam idiọọkñkpọ ke iso Abọọñ, kpa naña ete amọ Manase akenam. 21 Anye amaakeene usʌñ ete amọ afịd-afịd, akpono mme usọsọi ñkpọ ake ete amọ akekponoke, anyʌñ atuak iwuod anọ ammọ. 22 Anye amaadiañña akpọñ Abọọñ, Abasi mme eteete amọ, inyʌññọ isaña ke ñkobitem inọ anye.

23 Mme adaaha Amọn emaedʌk idiọọk adu ebaña anye enyʌñ ewot adidem ke ufọkubọọñ amọ. 24 Akem mbon abio emaewot afịd mbon se ikidʌk idiọọk adu ibaña Adidem Amọn, ndin ammọ emaenam Yosaiya ayịn amọ adidem ke itie amọ.

25 Amaado mme ñkpọ mfen ke ukara Amọn, ye se anye akenam, ado nte awo iwette ke ñwed mbʌkutom mme ndidem Yuda? 26 Anye akebʌhọ ke udi ke inwañ Usa. Ndin Yosaiya ayịn amọ amaadat itie amọ nte adidem.