1 Anwaan awo ke atu mme nsaña mme prọfed amaatua abịne Elisa, "Afʌnadeen mfo ebe mmi akpa, ndin afo amediọọñọ ke anye amaateeñe Abọọñ. Ado idahami awo anye akekamake isọn adi adikoono nditọ ideen mmi iba nte ifʌn."

2 Elisa amaabọọrọ anye, "Die ke ami mbiikan unwam fiin? Ndọkkọ miin, nsoo ke afo anie ke ufọk mfo?"

Anye amaabo, "Afʌnanwaan mfo inieghe ñkpọ ndomokeed, ibọhọke etək atu adan ọlif."

3 Elisa amaabo anye, "Kaa ke saña beeñe mme mbọhọidʌñ mfo mme ukpọk atu. Kuubeeñe etək-etək. 4 Ndin dʌk esịd ufọk nyʌñ bet usʌñ baha idem mfo ye nditọ ideen mfo. Tọkkọ adan dọñ ke afịd mme atu, ndin naña ammọ keedekeed ayọhọ, tuut nịm ñkañ keed."

5 Anye amaakpọñ anye anyʌñ abet usʌñ asịn idem amọ ye nditọ ideen amọ. Ammọ emaekoono mme atu esọk anye ndin anye amaakaa iso atọi. 6 Ke ini afịd atu emaekeyọhọ, anye amaabo ayịn amọ awodeen, "Ben mfen nsọk."

Ado anye amaabọọrọ, "Atu mfen ibaaha aba." Ndin adan amaatre adiwuọ.

7 Anye amaakaa akedọkkọ awo Abasi, ndin anye amaabo, "Kaa, ke nyam adan ado nyʌñ kpe isọn mfo. Afo ye nditọ ideen mfo emekeme edidu uwem ke se isʌhọ."

8 Usen keed Elisa amaakaa Sunem. Ndin anieñkpọ awonwaan amaaba do, a-akenyịkke anye abo yak atie adia ñkpọ. Ndin ini akeedodo anye akediighe udo, anye amaawakka do adia ñkpọ. 9 Awonwaan ami amaabo ebe amọ, "Ami mmediọọñọ ke ete ami a-asidiighe ukañ ñnyịn mi ado adisana awo Abasi. 10 Yak ñnyịn inam etək ubeed ke akọm inyʌñ isịn akwañ, ye akpokoro, ñkpọitie ye utuenikañ inọ anye. Ndin anye akeme adiba do ini ake anye adedi ibịne ñnyịn."

11 Usen keed Elisa akedi, anye amaadọọk akaa ubeed amọ anyʌñ asuuk anaa do. 12 Anye amaabo ayịnufọk amọ Kehasi, "Koot awonwaan Sunem." Ndin anye amaakoot anye, ndin anye amaada ke iso Elisa. 13 Elisa amaabo anye, "Dọkkọ anye, ‘Afo amenam afịd ñkpọ ami inọ ñnyịn. Idahami nsoo ke ekpekan enam unọọ fiin? Ñnyịn imikeme editañ ikọ ubaña fiin nnọọ adidem me adaiso udịmekọñ?’ "

Anye amaabọọrọ, "Ami mmenie ufọk ke atu mbon mmi."

14 Elisa amaabịp, "Nsoo ke ekpenam enọ anye?"

Kehasi amaabo, "Anye inieghe ayịn awodeen, ndin ebe amọ asọñ."

15 Ndin Elisa amaabo, "Koot anye." Ndin anye amaakoot anye, ndin anye amaada ke inuausʌñ. 16 Elisa amaabo, "idaha ini ntom isua mfen, afo ayaakama ayịn awodeen ke ubọk mfo."

Anye amaafaaña, "Iyoo, abọọñ mmi! Mbọk, awo Abasi, kuutịn afʌnanwaan mfo usʌñ!"

17 Ado awonwaan ado amaayommo idịb, ndin isua mfen ke ukem idaha ini ado anye amaaman ayịn awodeen, kpa naña Elisa akedọkkọ anye.

18 Ayịn ado amaakpon, ndin usen keed anye amaawuọ abịne ete amọ, a-akebaaha ye mbon idọk. 19 Anye amaabo ete amọ, "Iwuod mmi! Iwuod mmi!"

Ete amọ amaabo ayịnufọk keed, "Ben anye sọk eka amọ." 20 Ayịnufọk amaadịppe anye aben anye asọk eka amọ, anye amaatie ke ifʌkkọ eka amọ tutu ufọọd uweemeayio, ndin anye amaakpa. 21 Eka amọ amaadọọk akaa akenịm anye ke akwañ awo Abasi, ndin abet usʌñ awuọ.

22 Anye amaakoot ebe amọ anyʌñ abo, "Mbọk dọñ ayịnufọk keed ye dọñki keed embịne nọ ñkekịt awo Abasi usọp-usọp ñnyʌñ ntịmme ndi."

23 Anye amaabịp, "Nsoo ido yak abiika ibịne anye mfịn?" "Mfịn idooho Ufa Afiọñ me usen Sabad."

Anye amaabo, "Mfịna ibaaha."

24 Anye amaadọọk dọñki ndin abo ayịnufọk amọ, "Saña iso; kuuteek isañ ke ntak mmi ibọhọke ami ubo fiin." 25 Ndin anye amaadakka akaa adikịt awo Abasi ke Abod Kamel.

Awo Abasi akeda akịt awonwaan ado ke anyan usʌñ, anye amaabo ayịnufọk amọ Kehasi, "Se! Awo Sunem ado ado ako! 26 Feghe bịne anye ndin bịp anye, ‘Ñkpọ afọn ye afo? Ñkpọ afọn ye ebe mfo? Ñkpọ afọn ye ayịn mfo?’ "

Anye amaabọọrọ, "Afịd ñkpọ afọn."

27 Anye akedisịm awo Abasi ke abod, anye amaamʌm anye ukod. Kehasi amaadi adinək anye nsio, ado awo Abasi amaabo, "Saana anye yaak! Anye aba ke ataa ntaeded, ado Abọọñ andịp miin inyʌññọ indọkkọ miin ntak."

28 Anye amaabo, "Anie nte ñkubeeñe fiin ayịn, abọọñ mmi? Ñkubooho fiin, ‘Kuudịppe idodanyen mmi ke anyọñ’?"

29 Elisa amaabo Kehasi, "Nuuk afọñ mfo sịn ke ñkpaha mfo ben eto mmi ke ubọk mfo nyʌñ feghe. Kuukọọm awo ndomokeed ake afo asooboke, ndin awo ndomokeed akpukọọm fiin, kuubọọrọ. Dot esañ mmi ke iso ayịn ado."

30 Ado eka ayịn ado amaabo, "Adaña nte Abọọñ aduuho uwem ndin afo adu uwem, ami nduukpọññọ fiin." Ndin anye amaadakka ada akeene anye.

31 Kehasi amaaboiyo akaa akedot eto ado ke iso ayịn, ado uyio me ibọọrọ ikibaaha. Ndin Kehasi amaatịmme abịne Elisa anyʌñ adọkkọ anye, "Ayịn awodeen ado idemmeke."

32 Ke ini Elisa amaakekewuọ ufọk, se etəkayịn awodeen anaaha do adukpo ke ñkpana amọ. 33 Anye amaadʌk, abet usʌñ abaha ammọ awo iba ndin abọñ akam anọ Abọọñ. 34 Ndin anye amaadọọk akwañ anyʌñ anyanna anaa ke anyọñ ayịn ado, inua ke inua, anyen ke anyen, ubọk ke ubọk. Naña anye akekaaha iso anyanna idem ke idem ayịn, idem ayịn ado amaatọọñọ adifiop. 35 Elisa amaawọññọ asaña akaa iso, akaa edem ke ubeed ado, ndin anyanna anaa ke idem ayịn ado inikeed mfen. Ayịn amaawaiya akañ itiaba ndin ataat anyen.

36 Elisa amaakoot Kehasi ndin abo, "Koot awo Sunem." Ndin anye amaanam. Anye akedi, anye amaabo, "Ben ayịn mfo." 37 Anye amaadʌk adi, amaaduọ ke ukod amọ anyʌñ atuak iwuod ke isọñ. Ndin anye amaaben ayịn amọ anyʌñ awuọ.

38 Elisa amaanyọñ akaa Kilkal ndin akañ amaaba ke afịd efaak ado. Ke ini nditọ mme prọfed ekesooboke ye anye, anye amaabo ayịnufọk amọ, "Dot ekamba ako ke ikañ nyʌñ tem abak nọ mme prọfed."

39 Keed ke atu ammọ amaakaa ikọd akekịppe mme mfañ ye mme fain ikọd anyʌñ akịppe uwak ikịm se afọñ amọ akekan akama. Anye akenyọñ adi, anye amaakpok ammọ adọñ ke ako abak, akpesʌkado awo ndomokeed ikidiọọñọke se edoñño. 40 Emaetappa abak ado enọ ideen ado, ado ammọ eketọọñọ edidia anye, ammọ emaesio ñkpo, "Awo Abasi, ñkpa mmọdo asịne ke ako!" Ndin ammọ ikikanna idia anye.

41 Elisa amaabo, "Innọ ndomuyo." Anye amaasịn ke ako ndin amaabo, "Nọ mme awo edia." Ndin idiọọkñkpọ ndomokeed ikisịneke ke ako.

42 Awodeen amaato Baal Salisa, aben uyo baali edịb ekedatta akpa mbunwịm abakpa etem asọk awo Abasi, ye mme ufa abakpa ke ekpad. Elisa amaabo, "Nọ mbon awo edia."

43 Ayịnufọk amọ amaabịp, "Ami mbiinam die nnịm ami nnọ ideen ikie?"

Ado Elisa amaabọọrọ, "Nọ mbon awo edia. Sia se Abọọñ abo adom: ‘Ammọ eyaedia ndin ayọhọ asʌhọ.’ " 44 Ndin anye amaadot ke iso ammọ, ndin ammọ emaedia anyʌñ ayọhọ asʌhọ, kpa naña ikọ Abọọñ akebo.