1 Ndin ke ayọhọ isua usʌkkeed ke ini ukara Sedekaiya, ke ayọhọ usen duob ke ayọhọ afiọñ duob, Nebukadnesa adidem Babilọn amaasaña ye afịd udịmekọñ amọ akaa ekọñ ye Yeruselem. Anye amaanịm nnaaekọñ ke ñkanñkʌk abio anyʌñ abọọp mme nnaaekọñ akanna anye akʌk. 2 Ammọ emaekanna abio ado ekʌk tutu ayọhọ isua duob mme keed ke ini ukara adidem Sedekaiya.

3 Ke ayọhọ usen usʌkkeed ke ayọhọ afiọñ inaañ, akañ amaakpon ke abio ado eti-eti tutu ndidia ikibaaha aba se mme awo edia. 4 Akem emaewuut ndibene abio ado, ndin afịd udịmekọñ emaefeeñe ke akonayio ewuọ ke inuaatob eto ke ufañ ndibene iba akekpereke inwañ adidem, akpesʌkado a-adooho mbon Babilọn emaekekanna abio ekʌk. Ammọ emaefeeñe ekaa ñkañ Araba, 5 ado udịmekọñ Babilọn emaebịne adidem enyʌñ ekemʌm anye ke mme unaisọñ Yeriko. Emaediañña afịd mbon ekọñ amọ ekpọñ anye enyʌñ esuana, 6 ndin emaemʌm anye.

Emaeben anye esọk adidem Babilọn ke Ribla, do ke ekebiere ikpe enọ anye. 7 Ammọ emaewot nditọ ideen Sedekaiya ke iso amọ. Ndin emaekaap anye anyen esịññe, ebọp anye ke ñkpọnọ brọns ndin emaeben anye enyọñ Babilọn.

8 Ke ayọhọ usen itiaba ke ayọhọ afiọñ ition, ke ayọhọ isua duob mme usʌkkeed ukara Nebukadnesa adidem Babilọn, Nebusaradan adaiso udịmekọñ ukpeme adidem, adaaha adidem Babilọn, amaadi Yeruselem. 9 Anye amaasịn ikañ ke tembịd Abọọñ, ufọkubọọñ adidem ye afịd ufọk ke Yeruselem. Anye amaafọp afịd akpan ufọk. 10 Afịd udịmekọñ Babilọn ke idak ndadusʌñ adaiso udịmekọñ ukpeme adidem emaewuut afịd ndibene e-edaaha ekanna Yeruselem. 11 Nebusaradan adaiso udịmekọñ ukpeme adidem amaakoono anyọñ nte ntañnsio ñyọhọnsʌhọ mbon awo ke abio, ye mbon mfen ye mbon e-ekefeeñeke ebịne adidem Babilọn. 12 Ado adaiso ekọñ amaasʌhọ ubaak mme akpọikpọi uweene ke abio ado edinam utom ke mme inwañ fain ye ke mme inwañ mfen.

13 Mbon Babilọn emaeboom mme adaaha brọns, mme itiad idaha ye Akpainyañ brọns ekebaaha ke tembịd Abọọñ ndin ammọ emaekoono mme brọns ami enyọñ Babilọn. 14 Ammọ emaenyʌñ ekoono mme ako, mme udọk, mme ufadikañ, mme usañ ye afịd ñkpoduoho brọns e-ekamake enam utom ke tembịd. 15 Adaiso udịmekọñ ukpeme adidem amaakoono mme sensa ye usan usiime mmọọñ, afịd se ekedat ataa kold me ataa silfa enam.

16 Brọns aketooho mme abai iba ado, Akpainyañ ye mme uwewere ñkpọndaha ake Sọlọmọn akenamma anọ tembịd Abọọñ, amaadoppo akan se ekpekekan edomo. 17 Unyọọñ abai keed akedo kubid duob mme itiaita*. Brọns akedoroke ke anyọñ abai keed akedo kubid ita* ke unyọọñ enyʌñ ekama iyịre ye mme pomekrened brọns ekanna anye ekʌk. Abai anye ako, ye iyịre amọ, akedo ukem.

18 Adaiso mbon ukpeme amaamʌm Seraiya ekamba aku, Sefanaiya udiana ekamba aku ke ndaha ye mme akpeme inuausʌñ awo ita nte mbon ñkpakọb. 19 Ke atu mbon e-ekesʌkkọ eba ke abio, anye amaaben etubom ekọñ a-aseeghe ñkpọ abaña mme anwana ekọñ, ye mme anọitem adidem ition. Anye amaanyʌñ aben awedñwed a-akedooho etubom utañ mme awo nsịn ke ekọñ ye awo ata ke atu mbon e-ekedatta esịn ke ekọñ e-ekekịtte ke abio. 20 Nebusaradan a-adooho adaiso ekọñ amaakoono afịd ammọ asọk adidem Babilọn ke Ribla. 21 Do ke Ribla, ke isọñ Hamad, adidem Babilọn amaanam ewot ammọ.

Ndin Yuda amaadʌk ufʌn, akpọñ isọñ amọ.

22 Nebukadnesa adidem Babilọn amaamek Kedalia ayịn Ahikam, ayịn Safan, yak ase ñkpọ abaña mbon ake anye akekpọññọ ke Yuda. 23 Ke idaha afịd mme etubom ekọñ ye mbon ekọñ ekekoppo ke adidem Babilọn amaamek Kedalia nte adaiwuod ukara, ammọ, e-ekedooho Ismeel ayịn Netania, Yohanan ayịn Kare, Seraiya ayịn Tanumed awo Netofa, Yaasania ayịn mbon Maakad, ye ideen ammọ, emaekaa ebịne Kedalia ke Mispa. 24 Kedalia amaadat unwọñọ adisọọñọ ammọ ye ideen ammọ idem. Anye amaabo, "Ikiibaak mme adaaha Babilọn. Isuuk ibono ke isọñ ado inyʌñ inam ñkpọ inọ adidem Babilọn, ndin ayaafọn ye ndufo."

25 Ke ayọhọ afiọñ itiaba, Ismeel ayịn Netania, ayịn Elisama, aketooho ubon ubọọñ, amaasaña ye awo duob ndin emaewot Kedalia ye mme ideen Yuda ye mbon Babilọn e-ekebaaha ye anye ke Mispa. 26 Ke ntom, afịd awo tọọñọ ke andisịb ñkan wuọ andikpon ñkan, ye mme etubom udịmekọñ, emaefeeñe ekaa Iyib ato ke ndịk ammọ ekenieghe ebaña mbon Babilọn.

27 Ke ayọhọ isua edịb mme duob mme itiaba tọọñọ ekeben Yehoiyakịn adidem Yuda esio ke Yuda, ke isua Awel-Maaduk akedooho adidem Babilọn, anye amaasio Yehoiyakịn adidem Yuda ke ñkpakọb. Anye akenam ami ke ayọhọ usen edịb mme itiaba ke ayọhọ afiọñ duob mme iba. 28 Anye amaatañ ikọ emem-emem ye anye anyʌñ anọ anye itie ukpono akekoñño akan ake mme ndidem mfen ekebaaha ye anye ke Babilọn. 29 Ndin Yehoiyakịn amaasịññe afọñ ñkpakọb amọ ndin ke afịd ayio uwem amọ akedia ñkpọ ke akpokoro adidem. 30 Ke usen ke usen adidem amaanọ Yehoiyakịn akʌk ekpadafọñ ke ini ke ini ke afịd ayio uwem amọ.