1 Ndin Neman akedo adaiso udịmekọñ adidem Aram. Anye akedo ekamba awo ke iso eteufọk amọ anyʌñ anie ukpono, sia amaato ke ubọk amọ Abọọñ amaakpọñ adikan anọ Aram. Anye akedo uko awo ekọñ, ado amaanie akpamfia.

2 Ndin udịm mbon anwan Aram emaewuọ ekemʌm etək abọikpa Isrel, ndin anye akedo ayịnufọk anwaan Neman. 3 Anye amaabo ekaufọk amọ, "Akpekapado eteufọk mmi akpaakekịt prọfed a-abaaha ke Sameria! Anye akpaakọk anye akpamfia amọ."

4 Neman amaakaa abịne eteufọk amọ anyʌñ akedọkkọ anye se abọikpa Isrel ado akebo. 5 Adidem Aram amaabọọrọ "Naña akpedodo, kaa. Ami ñyaanọ ñwedetob esọk adidem Isrel." Ndin Neman amaadakka, asaña ye talen silfa duob*, udomo sekel kold tọsịn itiokeed* ye ukpʌhọ afọñ duob. 6 Ñwedetob a-anye akebenne asọk adidem Isrel akebo: "Ye ñwedetob ami mmenọ afʌnadeen mmi Neman usọk fiin nọ afo akọk anye akpamfia amọ."

7 Ke ini adidem Isrel akekoodo ñwedetob ami, anye amaawai mme afọñ amọ ke ndịk anyʌñ abo, "Ami ndo Abasi? Ami ñkpaakan ñwot ñnyʌñ mmaana nnọ uwem? Nsoo ido nọ awo ami anọ awo ansọk miin abo ñkọk anye akpamfia? Se naña anye atọọñọ ñyemikọ ye ami!"

8 Ndin Elisa awo Abasi akekop ke adidem Isrel amaawai mme afọñ amọ, anye amaanọ etob ami esọk anye: "Nsoo ido nọ afo awai mme afọñ mfo? Nọ awo ado ensọk miin ndin anye ayaadiọọñọ ke prọfed mmọdo ke Isrel." 9 Ndin Neman amaasaña ye mme enañmbakara ye mme sariọd amọ anyʌñ akeda ke usʌñ ufọk Elisa. 10 Elisa amaadọñ isʌñutom akebo anye, "Kaa, yie idem mfo akañ itiaba ke Yọdan, ndin idem mfo ayaamaana aba naña akpeba ndin afo ayaasana."

11 Ado Neman amaakpakka esịd ndin amaabo, "Ami ñkekere ke anye ayaawuọ adimbịne miin anyʌñ ada akoot anyịñ Abọọñ Abasi amọ, afʌñ ubọk ke inia ado ndin añkọk miin akpamfia. 12 Ado nte Abana ye Faapa, mme inyañ Damaskọs ifọọnọ ikan afịd mme mmọọñ Isrel? Ado nte ñkpekanna ñyie ke esịd ammọ ñnyʌñ nsana?" Ndin anye amaawọññọ iso anyọñ ke ifiobesịd.

13 Nditọufọk Neman emaekaa ekebo anye, "Ete mmi, adieke prọfed akpubooho fiin yak anam ekamba ñkpọ, afo ukpunamma? Nwaanwa dise, ndin, idaha anye ubooho fiin, ‘Yie nyʌñ sana’!" 14 Ndin anye amaakaa akenyiin idem amọ ke Yọdan akañ itiaba, naña awo Abasi akedọkkọ anye, ndin idem amọ amaafọn anyʌñ asana nte idem etək akparawa.

15 Ndin Neman ye afịd udịm amọ emaetịmme ebịne awo Abasi ado. Anye amaada ke iso amọ ndin amaabo, "Idahami ami mmediọọñọ ke Abasi mfen ibaaha ke afịd ederimbod ke imiibọhọke ke Isrel. Ke ntoro mbọk bọ enọ to afʌnadeen mfo."

16 Prọfed amaabọọrọ, "Adaña nte Abọọñ ake ami nnamma ñkpọ nnọ, aduuho uwem, ami ndiibọọhọ ñkpọ ndomokeed." Ñko akpesʌkado Neman akekpeiyeke anye, anye amaasịn.

17 Neman amaabo "Akpedo afo ubọọhọ, mbọk yak ennọ miin, afʌnadeen mfo, ntan se iwak ikem se ñwaahadọñki iba ekpebiom, sia afʌnadeen mfo idiiwaaha uwa inọ abasi mfen ndomokeed imiibọhọke Abọọñ. 18 Ado yak Abọọñ adakkado anọ afʌnadeen mfo ke ñkpọ keed ami: Idaha eteufọk mmi adʌkkọ tembịd Rimọn adituak iwuod ndin anye abere ke ubọk mmi a-adooho ana ami ñkeene ntuak iwuod ñko, ami mmaatuak iwuod ke tembịd Rimọn, yak Abọọñ afeen afʌnadeen mfo ke edinam ami."

19 Elisa amaabo, "Kaa ke emem."

Neman amaakesaña etək, 20 Kehasi, ayịnufọk Elisa awo Abasi, amaabo idem amọ, "Eteufọk mmi amaasaana Neman awo Aram ami ayaak, asịn adibọ se anye akekoono adi. Adaña nte Abọọñ aduuho, ami ñyaafeghe mbịne anye ñnyʌñ mbọ ñkpọ nto anye."

21 Ndin Kehasi amaafeghe abịne Neman. Neman akekịt naña Kehasi afeghe abịne anye, anye amaasọiyọ ke sariọd akaa adikisoobo ye anye. Anye amaabịp, "Afịd ñkpọ afọn?"

22 Kehasi amaabọọrọ, "Afịd ñkpọ afọn. Eteufọk mmi akendọñ miin yak ndibo, ‘Ñkparawa iba ke atu nditọ prọfed edi idaha ado eto abio abod Ifrem. Mbọk nọ ammọ talen silfa keed* ye ukpʌhọ afọñ iba.’ "

23 Neman amaabo, "Mfịna ibaaha, dat talen iba." Anye amaakpek Kehasi abọi mme ñkpọ ado, ndin emaetobo talen silfa iba ado ke ekpad iba, ye ukpʌhọ afọñ iba. Anye amaanọ nditọufọk amọ eben esaña ke iso Kehasi. 24 Kehasi akediwuọ, anye amaabọi nditọufọk ado mme ñkpọ ado anyʌñ abono ke ufọk. Anye amaasio ideen ado unyọñ ndin ammọ emaenyọñọ.

25 Ke ini anye akedʌkkọ akeda ke iso eteufọk amọ, Elisa amaabịp anye, "Kehasi, akeba ke mmọọ?"

Kehasi amaabọọrọ, "Afʌnadeen mfo ikiikaaha itie ndomokeed."

26 Ado Elisa amaabo anye, "Nte sịbidịd mmi ikibaaha ye afo idaha ete ado akesọiyọke ke sariọd amọ adusoobo fiin? Nte ini ado ami adibọ akʌk me adibọ mme afọñ, me inwañ ọlif ye inwañ fain, me udịmedọñ, me ufene, me ifʌn ideen ye ifʌn ibaan? 27 Akpamfia Neman ayaukeene fiin ye ubon mfo ke nsi-nsi." Ndin Kehasi amaakpọñ iso Elisa ndin idem amọ amaakappa ado akpamfia, amaakappa afia nte sino.