1 Akema Adọni-Sedek adidem Yeruselem amaakop ke Yọsua amaadat Ai anyʌñ asobo anye afịd-afịd, anam Ai ye adidem amọ naña anye akenam Yeriko ye adidem amọ, ñko ke mbon Kibiọn emaenam edioomo emem ye Isrel enyʌñ ekappa edo mme imaan ammọ. 2 Anye ye mbon amọ emaekop ndịk eti-eti ebaña ñkpọ ami, sia Kibiọn akedooho akpan abio, nte keed ke atu mme abio adidem; anye amaakpon akan Ai, afịd ideen do ekenyʌñ edoñño nti mme anwana ekọñ. 3 Ndin Adọni-Sedek adidem Yeruselem amaakpeiye Hoham abọọñ Hibrọn, Piram adidem Yamuud, Yafia abọọñ Lakis ye Debi adidem Eklọn. 4 Anye amaabo ammọ ate, "Ndufo idọọk idiñnyaaña miin nọ inwana ye Kibiọn, sia anye a-akenam emem ye Yọsua ye nditọ Isrel."

5 Ndin mme ndidem Amọọ ition, mme ndidem Yeruselem, Hibrọn, Yamuud, Lakis ye Eklọn emaediana keed. Ammọ emaedọọk ye afịd mbon ekọñ ammọ ekeba ekpere Kibiọn enyʌñ enwana ekọñ ye ammọ.

6 Mbon Kibiọn emaedọñ utom enọ Yọsua ke nnaaekọñ ke Kilkal ete: "Kuudakka ukpọñ mbon utom mfo. Sọsọp dọọk di difak ñnyịn! Inyaaña ñnyịn, sia afịd mme ndidem Amọọ e-ebaaha ke mme idʌñ abod ediana keed edinwana ye ñnyịn."

7 Ndin Yọsua amaato ke Kilkal adọọk adi ye afịd mbon ekọñ amọ, ye afịd mme nti anwanaekọñ. 8 Abọọñ amaabo Yọsua ate, "Kuuyak ndịk ammọ unam fiin; ami mmeyaak ammọ usịn fiin ke ubọk. Ibaaha awo ammọ ndomokeed se idiikan uda fiin ke iso."

9 Ke Yọsua amaakesaña afịd akonayio ito Kilkal, anye amaadiben ammọ ke adiwad. 10 Abọọñ amaasịn ndutịme ke ufọọd ammọ ke iso Isrel, anam Yọsua ye nditọ Isrel emaekan ammọ afịd-afịd ke Kibiọn. Isrel emaebịne ammọ edʌk ke usʌñ a-akaaha Bed Họrọn, enyʌñ ewot ammọ tutu esịm Aseka ye Makeda. 11 Nte ammọ efeeñeke ke iso Isrel ke usʌñ e-etooho Bed Họrọn edika Aseka, Abọọñ amaatoomo ikpọ edịmitiad atọọñ ammọ, ndin mbon se ikikpañña ke edịmitiad emaewak ekan mbon se nditọ Isrel ekewot ke akañkañ.

12 Ke usen A-Abọọñ akebenne mbon Amọọ anọ Isrel, Yọsua amaabo Abọọñ ke iso Isrel ate:

"Utịn, tuak da ke Kibiọn,

afo afiọñ ñko, tuak da ke Abedeñ Aiyalọn."

13 Ndin utịn amaatuak ada,

afiọñ ñko amaatuak ada,

tutu idịd ado ekịt unen esio mme asua ammọ usiene,

kpa naña ewet ke Ñwed Yasaa.

Ayio amaatuak ada ke ufọọd anyọñ inyʌññọ isọp adisọiyọ ke afịd usen keed. 14 Utọ usen ntoro akenam ibaaha, me mbemiso usen ado, me ke usen ado amaakeboiyo, usen A-Abọọñ akekpañña utọñ anọ awo. Ke akpanikọ Abọọñ akenwana ekọñ anọ Isrel!

15 Ndin Yọsua ye afịd Isrel emaetịmme enyọñ itie nnaaekọñ ke Kilkal.

16 Ndin mme ndidem ition ado emaefeeñe ekedịbe ke abaitiad ke Makeda. 17 Ke ini emaekedọkkọ Yọsua ebo ke ekịt mme ndidem ition ado nte edịbe ke abaitiad ke Makeda, 18 Yọsua amaabo, "Ndufo ikpat ñkpoon itiad idot ke inua abaitiad ado, inyʌñ imek mme ideen inịm do nọ ekpeme anye. 19 Ado ndufo ikiituak ida; ibịne mme asua ndufo! Ito iwot mbon e-ekpereke edem, ikiinyʌñ iyak ammọ edʌk abio ammọ, sia Abọọñ Abasi ndufo a-aben ammọ isịn ndufo ke ubọk."

20 Ntom ke Yọsua ye nditọ Isrel ekekan ammọ afịd-afịd, ado ibad-ibad awo emaemiañña ekewuọ mme abio ammọ se inie ndibene. 21 Afịd udịmekọñ ado emaetịmme enyọñ ebịne Yọsua ke itie nnaaekọñ ke Makeda ke ifuuro, ndin awo ndomokeed ikitañña idiọọk ikọ ibaña nditọ Isrel.

22 Yọsua amaabo, "Ikʌppọ inua abaitiad ado inyʌñ isịññe mme ndidem ition ado insọk." 23 Ndin ammọ emaesịññe mme ndidem ition ado ke aba edi, mme mbọọñ Yeruselem, Hibrọn, Yamuud, Lakis ye Eklọn. 24 Ke ammọ emaekekoono mme ndidem ado isọk Yọsua, Yọsua amaakoot afịd mbon Isrel anyʌñ abo mme adaiso ekọñ e-ekesañake ye anye ate, "Ndufo isaña ikpere inyʌñ iben ukod ndufo idot mme mbọọñ ami ke itọñ." Ndin ammọ emaesaña ekpere enyʌñ eben ukod ammọ edot ammọ ke itọñ.

25 Yọsua amaabo ammọ ate, "Ndufo ikiifeghe ndịk; ikiiyak esịd iduọ ndufo. Isọñ ubọk inyʌñ isọñ esịd. Se Abọọñ adiinam afịd mme asua se ndufo eyem edinwana ekọñ ado ami." 26 Ndin Yọsua amaawot mme mbọọñ ition ado anyʌñ akoono akpo ammọ akọọñ ke eto, ndin ammọ emaekọñọ ke eto tutu ndubiayio.

27 Ke utịn amaakesop, Yọsua amaanọ uyio ndin emaekọññọ ammọ ke eto etoomo edọñ ke abaitiad a-ammọ ekedịbeke. Ammọ emaetañ ikpọ itiad ebon ke inua abaitiad ado, a-adooho mmọdo eba tutu mfịn.

28 Usen ado Yọsua amaadat Makeda. Anye amaasobo abio ado ye adidem amọ ye afịd awo do ke akañkañ. Anye ikisʌhọke awo ndomokeed ye uwem. Ndin anye amaanam adidem Makeda naña anye akenam adidem Yeriko.

29 Ndin Yọsua ye afịd Isrel emaedakka ke Makeda ekaa Libna ekenwana ekọñ. 30 Abọọñ amaadat abio ado ye adidem amọ asịn Isrel ke ubọk ñko. Yọsua amaasobo abio ado ye afịd awo ke esịd. Anye ikisʌhọke awo ndomokeed do ye uwem. Ndin anye amaanam adidem abio ado naña akenam adidem Yeriko.

31 Ndin Yọsua ye afịd Isrel ñko emaedakka ke Libna ekaa Lakis, akenam nnaa ekọñ anyʌñ anwana ye anye. 32 Abọọñ amaayaak Lakis asịn Isrel ke ubọk, ndin Yọsua amaadat anye ke ayọhọ usen iba. Anye amaasobo abio ado ye afịd awo ke esịd, kpa naña akenam ye Libna. 33 Etaññatañ mi, Horam adidem Kesa amaadi adinwam Lakis, ado Yọsua amaakan anye ye afịd udịmekọñ amọ tutu awo ndomokeed isʌhọke.

34 Ndin Yọsua ye afịd Isrel emaedakka ke Lakis ekaa Eklọn; ammọ emaenam nnaa ekọñ do enyʌñ enwana ekọñ ye abio ado. 35 Ammọ emaedat abio ado kpa usen ado enyʌñ esobo anye ye afịd awo ke esịd, ukem naña ekenam Lakis.

36 Ndin Yọsua ye afịd Isrel emaedakka ke Eklọn ekaa Hibrọn ekenwana ekọñ ye anye. 37 Ammọ emaedat abio ado enyʌñ esobo anye, ye adidem amọ, ye afịd mme idʌñ ñkọrọ ye afịd awo do. Ammọ ikisʌhọke awo ndomokeed ye uwem. Kpa naña ekenam ke Eklọn, ammọ emaesobo afịd abio ye afịd awo ke esịd.

38 Ndin Yọsua ye afịd Isrel emaekanna ekaa Debi ekenwana ekọñ ye anye. 39 Ammọ emaedat abio ado, ye adidem amọ ye mme idʌñ amọ, enyʌñ esobo afịd ammọ. Ammọ emaesobo afịd awo do. Ammọ ikikpọññọ awo ndomokeed ye uwem. Ammọ emaenam Debi ye adidem amọ ukem se ekenam Libna ye adidem amọ ye Hibrọn.

40 Ntom ke Yọsua akekan afịd isọñ ado, ye mme idʌñ ikpọabod, Nekef, ye mme ntək abod ke ukañ usobutịn ye ke usuuk ikpọabod, ye mme ndidem ammọ. Anye ikisʌhọke awo ndomokeed ye uwem. Anye amaasobo ukeed se ikinweek inweek afịd-afịd kpa naña Abọọñ, Abasi Isrel, akenọọ uyio abo enam. 41 Yọsua amaakan ammọ tọọñọ ke Kades Banie tutu akewuọ Kasa, ye afịd isọñ Kosen tutu awuọ Kibiọn. 42 Yọsua amaakan afịd mme ndidem ami ye mme isọñ ammọ ke isañ ekọñ keed, sia Abọọñ, Abasi Isrel, akenwana ekọñ anọ Isrel.

43 Akema Yọsua ye afịd Isrel emaetịmme enyọñ itie nnaaekọñ ke Kilkal.