1 Ndin Yọsua ayịn Nọn amaatie ke Sitịm adọñ mbon uyeb iba ke ndịbe. Anye amaabo ammọ, "Ikaa, ikise isọñ ado, akpan-akpan Yeriko." Ammọ ndin emaedaaña ekaa ekedʌk ufọk awonwaan akpara keed a-akekereke Rahab enyʌñ eba do.

2 Emaetañ enọ adidem Yeriko ebo, "Sese, usʌk nditọ Isrel emaedi mi akonayio ami edidiyep isọñ." 3 Ndin adidem Yeriko amaadọñ utom ami anọ Rahab ate: "Sio ideen e-ekediighe ubịne enyʌñ edidʌk ufọk mfo di, sia ammọ edi ediyep afịd isọñ ami."

4 Ado mma ado amaaben ideen iba ado adịp. Anye amaabo ate, "Ii, ideen ado emaedi embịne, ado ñkidiọọñọke nte ammọ eketo edi. 5 Ke ndubi, ke ini amaakesịm adibet inuaatob abio, ammọ emaenyọñọ. Ami ndiọọñọke usʌñ nte ammọ ekedʌk. Isọsọp ibịne ammọ. Emekeme edikisịme ammọ." 6 (Ado anye amaaben ammọ adọọk anyọñ akọm akedịp ke idak mme eboho flaks a-anye akebonoke ke anyọñ akọm.) 7 Ndin mbon ado emaebịne mbon uyeb ado ke usʌñ a-akaaha utʌñọ mmọọñ Yọdan, ndin mbon se ikibịne ammọ ekesʌk ewọwuọñọ, emaebet inuaatob abio.

8 Mbemiso mme mbon uyeb ado edʌk idab, mma ado amaadọọk anyọñ akọm 9 akebo ammọ ate, "Ami mmediọọñọ mbo ke Abọọñ a-aben isọñ ami inọ ndufo, ñko ke ndịk ndufo i-inam ñnyịn, anam afịd awo se idʌñ ke idʌñ ami eba ke ayeemensia ke ntak ndufo. 10 Ñnyịn imikop naña Abọọñ akenam mmọọñ Ndad-Ndad Akpainyañ asat inọ ndufo ke ini ndufo ekewuọñọke ke Iyib, ye se ndufo ekenam Sihọn ye Ọk, ndidem Amọọ iba ado ke edem usakkautịn Yọdan, a-ndufo ekesoboke afịd-afịd. 11 Ke ini ñnyịn ikikoppo ñkpọ ami, nsia amaiyeeme ñnyịn ato ndịk, ndin idem amaamem afịd awo ke ntak ndufo, sia Abọọñ Abasi ndufo ado Abasi ke anyọñ ye ke isọñ.

12 "Ndin idahami, mbọk inwọñọ innọ miin ke anyịñ Abọọñ ibo ke ndufo eyaefọn mfọn ye ubon mmi, sia ami mmefọn mfọn ye ndufo. Innọ miin idiọọñọ akpanikọ 13 ibo ke ndufo eyaenịm ete ye eka mmi, mme nditọeka mmi ideen ye ibaan, ye afịd se inie ammọ uwem, ke ndufo eyaifak ñnyịn esio ke ñkpa."

14 Mbon ado emaebọọrọ anye ete, "Uwem ñnyịn aka ke uwem ndufo! Afo umuudọkkọke awo se ñnyịn inam, iyaifọn mfọn ye afo inyʌñ inam akpanikọ ke Abọọñ amainọ ñnyịn isọñ ami."

15 Ndin anye amaayịt udʌk anọ ammọ eto ubenafịm ewuọññọ, sia ufọk amọ akedo ke ndibene abio. 16 Anye amaabo ammọ ate, "Ikaa ke mme abod mbaak mbon se ibịne edikịt ndufo. Idịbe do usen ita tutu ammọ enyọñ edi, ndin ndufo enyọñ."

17 Ndin mbon ado emaebo anye ete, "Unwọñọ a-afo anamma ñnyịn ita mi idiibọppọ ñnyịn 18 ibọhọke ado ñnyịn imaidisịm mi, anye ado ke afo amaatobo ndad-ndad udʌk ami ke ubenafịm a-afo akenamma ñnyịn isaña iwuọ, aben ete ye eka mfo, nditọeka mfo ye afịd ubon mfo adisịn ke ufọk mfo. 19 Adieke awo ammọ ndomokeed awuọhọ ke ufọk mfo asaña ke efaak, iyiib ammọ adiidoro ammọ ke iwuod; ndin ñnyịn iyaibọkkọ. Amaado mbon e-esịneke ke ufọk ye afo, iyiib ammọ adiidoro ñnyịn ke iwuod adieke ubọk awo atuuhọ ammọ. 20 Ado afo ukpuyaara se ñnyịn inam ami, ñnyịn iyaibọkkọ unwọñọ a-afo anamma ñnyịn inwọñọ mi."

21 Anye amaabọọrọ ate, "Mmenyịmme. Yak ado naña ndufo etañ ado."

Ndin anye amaasio ammọ unyọñ, ammọ emaenyʌñ enyọñọ. Anye amaanyʌñ adat ndad-ndad udʌk ado atobo ke ubenafịm.

22 Ke ammọ emaekekpọñ do, ammọ emaekaa mme abod eketie do usen ita, tutu mbon se ikibịne ammọ eyem ammọ afịd itie enyʌñ enyọñ edi awo ikịtte ammọ. 23 Akekem awo iba ado emaetịmme edem enyọñ. Ammọ emaesọiyọ ke mme abod, esaña eboiyo inyañ ebịne Yọsua ayịn Nọn ekedọkkọ anye afịd ñkpọ se ikitịppe inọ ammọ. 24 Ammọ emaebo Yọsua ete, "Ke akpanikọ Abọọñ aben afịd isọñ ami isịn ñnyịn ke ubọk; nsia ayeeme afịd awo do ke ntak ñnyịn."