1 Ndin Yọsua amaakoot mbon Rubịn, mbon Kad ye ubaak esiin Manase 2 anyʌñ abo ammọ ate, "Ndufo emenam afịd se Moses isʌñutom Abọọñ akebo enam, ndin ndufo emenyʌñ ekop uyio mmi ke afịd se ami ñkebo enam. 3 Ke anyan ini ami, tutu awuọ mfịn, ndufo ifegheke ikpọñ emọ-emọ nditọ Isrel ndufo, ado emenam utom se Abọọñ Abasi ndufo akinọọ abo enam. 4 Idaha ado Abọọñ Abasi ndufo amaanọ ammọ nduọkadudu naña akenwọñọ, itiime inyọñọ ufọk idʌñ ndufo ke isọñ ake Moses awo utom Abọọñ akinọọhọ ndufo ke ukañ Yọdan uko. 5 Ado itịm ikpeme adinịm mme ewʌhọ ye mme mbed ake Moses awo utom Abọọñ akinọọhọ ndufo: ate ema Abọọñ Abasi ndufo, esaña ke ñkobitem amọ, enịm mme mbed amọ, emʌm anye ekama ubọk asọñ, enyʌñ enam ñkpọ inọ anye ke afịd esịd ye ke afịd ukpọñ ndufo."

6 Ndin Yọsua amaadiọñ ammọ anyʌñ asio ammọ unyọñ, ammọ emaenyʌñ enyọñọ ufọk idʌñ ammọ. 7 (Moses amaanọ ubaak esiin Manase isọñ ke Basan, ndin ubaak anye ako Yọsua amaanọ isọñ ke ukañ usobutịn Yọdan ke atu nditọ Isrel ammọ.) Ke ini Yọsua akesioho ammọ unyọñ, anye amaadiọñ ammọ, 8 ate, "Itiime inyọñọ ufọk idʌñ ndufo ye uwak inie ndufo ye uwak ufene, ye silfa, kold, brọns ye ukwak, ye ataa uwak afọñidem inyʌñ ideeme mbịme se ekebịme eto mme asua ndufo ye mme nditọ Isrel mfen."

9 Ndin mbon Rubịn, mbon Kad ye ubaak esiin Manase emaenyọñọ ekpọñ nditọ Isrel ke Silo ke Kenan ekaa Kilied, isọñ udeeme ammọ, a-ammọ ekedatta akeene uyio Abọọñ, ke ubọk Moses.

10 Ke ammọ emaekekewuọ Kelilọd a-akpereke Yọdan ke Kenan, mbon Rubịn, mbon Kad ye ubaak esiin Manase emaebọp ekamba uyaiya akpokoro uwa ke mben Yọdan. 11 Ndin ke ini nditọ Isrel ekekoppo ke mbon Rubịn, mbon Kad, ye ubaak mbon Manase emaebọp akpokoro uwa ke adaña Kenan ke Kelilọd a-akpereke Yọdan ukañ nditọ Isrel, 12 afịd esob nditọ Isrel emaekesoobo ke Silo adika ekọñ ye ammọ.

13 Ndin nditọ Isrel emaedọñ Finehas ayịn aku Eliasa, utom ke abio Kilied, enọ Rubịn, Kad ye ubaak esiin Manase. 14 Ammọ emaenọ mbọọñ duob esaña ye anye, awo keedekeed ke mme esiin Isrel, ndin afịd ammọ ekedo mbọọñ ufọk mme ete ammọ ke atu mme ekpək ke Isrel.

15 Ke ammọ emaekekewuọ Kilied, esoobo ye Rubịn, Kad ye ubaak esiin Manase, ammọ emaebo ammọ ete: 16 "Afịd esob Abọọñ ebo ete: ‘Ekpenam die enana mbuọdidem ke idem Abasi Isrel ntom? Nsoo inam ndufo ekpa edem ewọt Abọọñ enyʌñ ebọp akpokoro uwa enọ idem ndufo ke nsọñiwuod ye anye idahami? 17 Nte idiọọkñkpọ Pio ikikemme ye ñnyịn? Tutu mfịn ami ñnyịn inamma idem ñnyịn asana ke idiọọkñkpọ ado, akpesʌkado idiọọk udọñọ amaadidʌk ke atu ikọd Abọọñ! 18 Ndin idahami ndufo eyem ediwọññọ iso ñkpọñ Abọọñ?

" ‘Ndufo ekpesọñ iwuod ye Abọọñ mfịn ami, ñkpọñ anye ayaayat esịd ye afịd esob Isrel. 19 Akpedo udeeme isọñ ndufo ado ndedeghe, idi isọñ Abọọñ, itie se tabanakịd Abọọñ ada, inyʌñ idiwana isọñ ado ye ñnyịn. Ado ikiisọñ iwuod ye Abọọñ me ye ñnyịn ke adibọp akpokoro uwa nnọọ idem ndufo, ibọhọke akpokoro uwa Abọọñ Abasi ñnyịn. 20 Ke ini Ekan ayịn Seera akenamma idiọọk ido ke abaña mme asaña-asaña ñkpọ nsobo, nte iyadesịd ikisịmeke afịd esob Isrel? Idooho anye ikpọọñ akekpa ke ntak idiọọkñkpọ amọ.’ "

21 Ndin Rubịn, Kad ye ubaak esiin Manase emaebọọrọ mme mbọọñ ekpək Isrel ete: 22 "Akpọsọñ Abasi, Abasi, Abọọñ! Akpọsọñ Abasi, Abasi, Abọọñ! Anye adiọọñọ! Ndin yak Isrel ñko ediọọñọ! Akpedo nsọñiwuod me ntịdutọñ ye Abọọñ anam ñnyịn inam ami, ikiinyaaña ñnyịn mfịn ami. 23 Akpedo ñnyịn ibọp akpokoro uwa inọ idem ñnyịn nọ ato do ñnyịn itịmme ikpọñ Abọọñ inyʌñ iwa ufọfọb uwa ye uwa ñkpasi, me adiwa uwa ewuana ke esịd, yak Abọọñ ke idem amọ akpe ikpe ñnyịn.

24 "Iyoo! Ndịk akinam ñnyịn inam ami, sia ñnyịn imaikere ke usen keed nditọ ndufo ekeme edidibo nditọ ñnyịn, ‘Ndufo esaña nsoo ye Abọọñ Abasi Isrel? 25 Abọọñ anịm Yọdan nte adaña ke ufọọd ñnyịn ye ndufo, ndufo mme Rubịn ye mbon Kad! Ndufo inieghe udeeme ke Abọọñ.’ Ndin nditọ ndufo ekeme edinam nditọ ñnyịn etre edibaak Abọọñ.

26 "Ado akenam ñnyịn ibo, ‘Yak ibeeñe idem ibọp akpokoro uwa, ado idooho ake ufọfọb uwa me utọ uwa mfen.’ 27 Utu ke ado, adinam ado ntiense ke ufọọd ñnyịn ye ndufo ye mme emana se idiikeene ñnyịn, ite ke ñnyịn iyaikpono Abọọñ ke adisana itie amọ ye ufọfọb uwa ñnyịn, mme uwa mfen ye uwa ewuana. Ndin ke ini iso nditọ ndufo idiikanna ibo nditọ ñnyịn, ‘Ndufo inieghe udeeme ke Abọọñ.’

28 "Ndin ñnyịn imaibo ite, ‘Ammọ ekpetañ utọ ikọ ami ye ñnyịn, me ye nditọ ñnyịn, ñnyịn iyaibọọrọ ibo: Kap se mbid akpokoro uwa Abọọñ, a-mme eteete ñnyịn ekebọppọ, idooho ake ufọfọb uwa ye mme uwa mfen, ado anye ado ntiense ke ufọọd ñnyịn ye ndufo.’

29 "Nsaa ñnyịn-o, ñnyịn idikpisọñ iwuod ye Abọọñ ñnyʌñ ntịmme edem ñkpọñ anye mfịn ami ke adibọp akpokoro uwa nnọọ ufọfọb uwa, uwa ñkpasi ye mme uwa mfen, ke amaaboiyo akpokoro uwa Abọọñ Abasi ñnyịn a-adaaha ke atayad amọ."

30 Ke ini aku Finehas ye mme adadusʌñ ke idʌñ, mme mbọọñ ekpək mme nditọ Isrel, ekekoppo se Rubịn, Kad ye Manase ekenie editañ, ammọ emaenem esịd. 31 Ndin Finehas ayịn aku Eliasa, amaabo Rubịn, Kad ye Manase ate, "Mfịn ñnyịn imidiọọñọ ke Abọọñ mmọdo ye ñnyịn, sia ndufo imiinamma idiọọk ido ye Abọọñ ke ñkpọ ami. Idaha ado ndufo emebọ nditọ Isrel esuuk ke ubọk Abọọñ."

32 Ndin Finehas ayịn aku Eliasa, ye mme adadusʌñ ado emaetịmme enyọñọ Kenan ke ammọ emaekesoobo ye mbon Rubịn ye mbon Kad ke Kilied enyʌñ ekedọkkọ nditọ Isrel naña akedo. 33 Nditọ Isrel emaenem esịd edikop naña akedo enyʌñ etooro Abasi. Ndin ammọ ikitañña aba edika ekọñ ñkesobo itie nte mbon Rubịn ye mbon Kad ekedʌñọ.

34 Ndin mbon Rubịn ye mbon Kad emaesio akpokoro uwa ado anyịñ ami: Ntiense Ke Ufọọd Ñnyịn nte ke Abọọñ ado Abasi.