1 Ami ado udeemeñkpọ esiin Manase nte akpan Yosef. Makia, akpan Manase, ete mme Kilied, amaabọ Kilied ye Basan sia mbon Makia ekedo mme ñkpọsọñ mbon ekọñ. 2 Ndin udeeme anye ami akenie nditọ Manase se ikisʌhọ, e-ekedoññoke ekpək Abiesa, Helek, Asriel, Sekem, Hefa ye Semida. Ammọ ekedo nditọ ideen Manase ayịn Yosef ke ubon ke ubon.

3 Ndin Selofehad ayịn Hefa, ayịn Kilied, ayịn Makia, ayịn Manase, ikinieghe nditọ ideen, ado amaanie nditọ ibaan; mme anyịñ ammọ ekedo Mahla, Nua, Hokla, Milka ye Tisa. 4 Ammọ emaedakka ebịne aku Eliasa, Yọsua ayịn Nọn, ye mme ñkpisọñ enyʌñ ekebo ete, "Abọọñ amaabo Moses inọ ñnyịn udeeme ke atu mme ayakka ñnyịn." Anam Yọsua amaanọ ammọ udeeme ke atu nditọeka ete ammọ, akeene uyio Abọọñ. 5 Udeemeñkpọ Manase akedo afʌñikọd duob ñkọrọ Kilied ye Basan ke ukañ usakkautịn Yọdan, 6 sia nditọ ibaan Manase emaebọ udeemeñkpọ ammọ ke atu nditọ ideen amọ. Isọñ Kilied akenie nditọ ideen Manase se ikisʌhọ.

7 Adaña Manase aketọọñọ ke Asaa akewuọ Mikmetaad ke edem usakkautịn Sekem. Adaña ado ato ke ndo akaa usuuk-usuuk tutu akewuọ mme andidʌñ ke En Tapua. 8 (Manase akenie isọñ Tapua, ado Tapua ke idem amọ akenie nditọ Ifrem ke adaña Manase.) 9 Ndin adaña ado amaasaña ke usuuk Abedeñ Kana. Mme abio Ifrem emaesịne ke atu mme abio Manase, ado adaña Manase akedo ke ukañ usuuk ukpe ndin aketre ke Akpainyañ Mediterenia. 10 Isọñ ke ukañ usuuk akenie Ifrem, ake ukañ adoro akenie Manase. Adaña Manase amaakewuọ Akpainyañ Mediterenia ye Asaa ke adoro ye Isaka ke ukañ usakkautịn.

11 Ke Isaka ye Asaa, Manase ñko amaanie Bed San, Ibleem ye mbon Dọọ, Endọ, Taanak ye Mekido, dian ye mme idʌñ se ikanna ammọ ikʌk (ayọhọ ita ke atu ado ado Nafọd*).

12 Kpayeado nditọ Manase ikikanna idat mme abio ami idʌññọ, sia mbon Kenan emaekpaap esuuk edʌñ do idem edidʌñ do. 13 Ado ke ini nditọ Isrel emaekedisọñ adudu, ammọ emaenam mbon Kenan ekappa enam utom nte mme ifʌn ado ikibịneke ammọ isio afịd-afịd.

14 Nditọ Yosef emaebo Yọsua ete, "Ntak afo inọọhọ ñnyịn udeeme isọñ keed ye afʌñikọd keed nte udeemeñkpọ ñnyịn-e? Ñnyịn imiwak, ñko Abọọñ anekke idiọñ ñnyịn."

15 Yọsua amaabọọrọ, "Akpedo ndufo emewak ntoro, ndin akpedo abod-abod abio Ifrem asịp abọhọ inọ ndufo, ikaa akai ikitem itie do inọ idem ndufo ke isọñ mbon Peris ye mbon Refaim."

16 Nditọ Yosef emaebọọrọ ete, "Abod-abod abio ado ikemme ñnyịn, ñko afịd mbon Kenan se idʌñ ke unaisọñ, mbon se idʌñ ke Bed San ye mme idʌñ se ikanna ammọ ikʌk ye mbon se iba ke Abedeñ Yesriil enieñe sariọd ukwak."

17 Ado Yọsua amaabo mme esiin Yosef, Ifrem ye Manase, ate, "Ndufo emewak enyʌñ esọñ adudu eti-eti. Ndufo idiidatta udeemeñkpọ keed kpọd 18 ado eyaedat abod-abod akai abio ado ñko. Item anye, ndufo ediinie tutu awuọ ataa akpatre iwuod ado; akpesʌkado mbon Kenan enieñeke mme sariọd ukwak enyʌñ esọñ adudu, ndufo emekeme adibịn ammọ nsio."