1 Ndin Abọọñ amaabo Yọsua ate: 2 "Dọkkọ nditọ Isrel bo yak esio mme abio ubọkkọ enịm, naña ami ñkeboiyo ke Moses idọkkọ ndufo, 3 mbaak awo ndomokeed a-awotto awo ke ndudue me unana adidiọọñọ akeme adifeghe ñkedịbe do mbọkkọ asiousiene iyiib. 4 Ammọ emaefeghe eka keed ke atu mme abio ami, yak ammọ eda ke inuaatob abio ado enyʌñ etañ se ikido enọ mme ñkpisọñ abio ado. Ndin mme ñkpisọñ ado enie edidat utọ awo ado nsịn ke abio ammọ ñnyʌñ nnọọ anye itie nọ adʌñ ke atu ammọ. 5 Asiousiene iyiib akpebịne anye, inaaha mme ñkpisọñ eyaak awodawo ado esịn anye ke ubọk, sia awodawo ado ikifiọkkọfiọk iwot mbọhọidʌñ ammọ, ikinyʌññọ inie idiọọkesịd ibaña anye. 6 Yak ammọ edʌñ ke idʌñ ado tutu ammọ ekaa ikpe ke iso esob, ñko tutu ekamba aku a-akebaaha idaha ado akpa. Ndin ammọ ekeme editịmme ñnyọñ ufọk ammọ ke abio a-ammọ eketooho edi."

7 Ndin ammọ emaesio Kedes ke Kalili ke abod-abod abio Naftali, Sekem ke abod-abod abio Ifrem, ye Kiriad Aba (a-adooho, Hibrọn) ke abod-abod abio Yuda enịm. 8 Ke ukañ usakkautịn Yọdan (ke edem Yeriko uko) ammọ emaesio Besa ke anaan ke unaisọñ ke esiin Rubịn, Ramọd ke Kilied ke esiin Kad, ye Kolan ke Basan ke esiin Manase enịm. 9 Awo Isrel ndomokeed, me asenawo ndomokeed a-adʌññọ ke atu ammọ a-akedueghe awot awo amaanie unen adifeghe ñkaa mme abio e-ekesioho enịm do mbaak asiousiene iyiib adiwot anye mbemiso anye akaa ikpe ke iso esob.