1 Ke anyan ini amaakeboiyo ndin Abọọñ amaanọ Isrel nduọkadudu, asio ke ubọk afịd mme asua ammọ e-ekekannake ammọ ekʌk. Ke Yọsua amaakekappa ataa akaanadeen, 2 anye Yọsua amaakoot afịd Isrel, mme ñkpisọñ ammọ, mme adadusʌñ, mme akpeikpe ye mme adaaha anyʌñ abo ammọ ate: "Ami mmesọñ eti-eti. 3 Ndufo ke idem ndufo emekịt afịd ñkpọ se Abọọñ Abasi ndufo anam ye afịd idịd ami ke ntak ndufo; ado Abọọñ Abasi ndufo akenwana ekọñ inọọ ndufo. 4 Itoiyo naña ami ñke abakka afịd isọñ mme idịd se isʌhọ nnọ mme esiin ndufo ke udeeme mme idịd a-ami ñkekanna ke ekọñ, atọọñọ ke Yọdan tutu awuọ Akpa Mediterenia ke ukañ usobutịn. 5 Abọọñ Abasi ndufo ke idem amọ ayaanək ammọ asio ke ntak ndufo. Anye ayaabịn ammọ asio ke iso ndufo, ndin ndufo eyaedat isọñ ammọ enie, kpa naña Abọọñ Abasi ndufo akenwọñọ inọọ.

6 "Inekke isọñ ubọk; itịm inịm afịd se ewet ke Ñwed Mbed Moses, ikiiwakka ikaa nnasia me ufiin. 7 Ikiinie ewuana ye mme idịd esʌhọke ke atu ndufo mi; ikiikoot anyịñ mme abasi ammọ, ikiinyʌñ inwọñọ ñkpọ ke anyịñ ammọ. Inaaha enam ñkpọ enọ ammọ me enʌhọ enọ ammọ. 8 Ado ana esọñ ubọk eyịre Abọọñ Abasi ndufo, kpa naña enam tutu awuọ idahami.

9 "Abọọñ a-abịne mme ñkpọsọñ ye mme anie adudu idịd asio ke iso ndufo; awo ndomokeed ikemeke adida ndufo ke iso tutu awuọ usen mfịn ami. 10 Awo ndufo keed abịne tọsịn keed, sia Abọọñ Abasi ndufo anwana ekọñ inọọ ndufo, kpa naña anye akenwọñọ. 11 Anam ndufo inekke ikpeme edima Abọọñ Abasi ndufo.

12 "Ado ndufo ekpewọññọ edem enyʌñ ekediana ye mbon idịd ami se isʌhọ ke atu ndufo enyʌñ edọ ndọ ke atu ammọ enyʌñ enie ewuana ye ammọ, 13 inekke idiọọñọ ibo ke Abọọñ Abasi ndufo idiibịneke mme idịd ami aba isio ke iso ndufo. Utu ke ado, ammọ eyaekappa edo mfịna ye mme afia inọ ndufo, ye ikpa ke edem ndufo ye ñkukịm ke anyen ndufo, tutu ndufo etak ke eti isọñ ami, ake Abọọñ Abasi ndufo inọọhọ ndufo.

14 "Ndin idahami ami ñyaaka usʌñ afịd ederimbod. Ndufo emediọọñọ ke afịd esịd ndufo ye ke afịd ukpọñ ndufo ebo ke eti enwọñọ ndomokeed ake Abọọñ Abasi ndufo akinọọhọ ndufo nọ akpu ibaaha. Afịd enwọñọ asu; ndomokeed ikpuuho. 15 Ado kpa naña afịd nti ñkpọ se Abọọñ Abasi ndufo akenwọñọ asuuhọ inọọ ndufo, kpa ntoro ke anye adiinam afịd ndiọi ñkpọ se anye aduak inọọ ndufo asu, tutu Abọọñ Abasi ndufo isobo ndufo asio ke eti isọñ ami a-anye inọọhọ ndufo. 16 Ndufo ekpebiat edioomo Abọọñ Abasi ndufo, a-anye akiwuuho ndufo ate enam, enyʌñ ekaa ekenam ñkpọ enọ mme abasi mfen enyʌñ etuak iwuod enọ ammọ, Abọọñ ayaayat esịd ye ndufo, ndin ndufo eyaesọsọp esobo ewuọ ke eti isọñ a-anye inọọhọ ndufo."