14 "Ndin idahami ndufo ibaak Abọọñ inyʌñ inam ñkpọ inọ anye ke ayọhọ akpanikọ. Iduọọñọ mme abasi a-mme eteete ndufo ekekponoke ke edem Inyañ Yufretis uko ye ke Iyib, inyʌñ inam ñkpọ inọ Abọọñ. 15 Ado akpedo adinam ñkpọ nnọọ Abọọñ ifọnnọ ndufo ke idem, mfịn ami imek inọ idem ndufo anye a-ndufo ediinam ñkpọ inọ, me mme abasi a-mme eteete ndufo ekenamma ñkpọ enọ ke edem Yufretis uko, me mme abasi mbon Amọọ a-ndufo edʌññọ ke isọñ ammọ. Ado amaado ami ye ufọk mmi, ñnyịn idiinam ñkpọ inọ Abọọñ."
22 Ndin Yọsua amaabo ate, "Ndufo edo mme ntiense ebaña idem ndufo nte ke ndufo ememek edinam ñkpọ nnọọ Abọọñ."
Ammọ emaebọọrọ, "Ii, ñnyịn ido mme ntiense."
25 Usen ado Yọsua amaanam edioomo anọ atu awo, ndin ke ndo ke Sekem anye amaamaana adọkkọ ammọ mme ewʌhọ ye mme mbed. 26 Ndin Yọsua amaawet mme ñkpọ ami asịn ke Ñwed Mbed Abasi. Akema anye amaaben ekamba itiad keed awuuk do ke idak afriyo a-akedaaha adiana adisana itie Abọọñ.
27 Ndin Yọsua amaabo atu awo ate, "Sese! Itiad ami ayaado ntiense ibaña ñnyịn. Anye a-akop afịd ikọ se Abọọñ idọkkọ ñnyịn. Anye ayaado ntiense ibaña ndufo adieke ndufo ekañña Abasi ndufo."