1,2 Bɛlua nrɛlaleɛ anzɛɛ edwɛkɛ mɔɔ ɛdoavolɛma mɔɔ lumuale nee Kelaese luale la dele, ɔ nee mɔɔ bɛnwunle ye bɛ nye zo la azo bɛhɛlɛ ɔ nwo edwɛkɛ ngakyile ekyii. 3 Emomu yezi me nu kɛ, ɔhyia kɛ eza mesia me nzi mebɔ ye ɔ ti meneɛnlea edwɛkɛ ɛhye mɔ anu bieko, na saa mefunvua nu bɔkɔɔ mewie a ɛnee meadu ye kolakola ne meahile bɛ, 4 amaa bɛahola bɛanwu nɔhalɛ mɔɔ wɔ ngilehile dɛba ne mɔɔ bɛlumuale bɛhilehilele bɛ la anu.

5 Me adawu ne abobɔlɛ ne fale Dwuunli sɛlɛvolɛ Zɛkalaya, mɔɔ ɛnee de aze wɔ mekɛ mɔɔ ɛnee Hɛlɔdo di belemgbunli wɔ Dwudiya la anwo. Ɛnee Zɛkalaya boka Abaegya ekpunli ne mɔɔ ɛnee yɛ gyima wɔ Asɔne Sua Kpole ne anu la anwo. Ɔ ye Ɛlezabɛte le kɛ ɔdaye mumua ne la; ɛnee ɔboka Dwuuma azɛlɛvolɛ mɔɔ te bɛ nwo aneɛ na bɛvi Aalɔn abusua eku ne anu la anwo. 6 Zɛkalaya nee ɔ ye Ɛlezabɛte sulo Nyamenle, bɛnva Nyamenle mɛla ne bɛnli nwɔhoa, na bɛdi zolɛ wɔ sunsum nu ɔ nee nyɛleɛ nu. 7 Na emomu, ɛnee bɛnlɛ ralɛ biala, ɔluakɛ Ɛlezabɛte yɛle motavolɛ, yɛɛ mekɛ zɔhane noko ɛnee eza bɛ mu nwiɔ bɛyɛ mgbanyinli kpalɛ.

8,9 Kenle ko bie mɔɔ ɛnee Zɛkalaya ɛlɛyɛ ye gyima wɔ Asɔne Sua Kpole ne anu, ɔluakɛ ɛnee dapɛne zɔhane le ɔ nee ye ekpunli ne bɛ mekɛ la, ɔrale ye kɛ ɔwɔ kɛ ɔkɔ asɔne sua ne akunlu na ɔkɔsɔ ɛyɛlɛ wɔ Awulae anyunlu. 10 Mekɛ zɔhane anu, ɛnee menli dɔɔnwo ne ala wɔ Azukponle ne anyunlu wɔ Asɔne Sua Kpole ne anu kɛmɔ dahuu mekɛ biala bɛsɔ ɛyɛlɛ bɛakpumgbu ye wɔ asɔne sua ne anu a bɛyɛ ye la.

11,12 Zɛkalaya wɔ Asɔne Sua Kpole ne anu suakunlu ɛkɛ ne la, arɛlevilɛ nu ala, anwumabɔvolɛ bie vindele ɛkɛ ne, na ɔragyinlanle ɔ sa fema zo wɔ azukponle ne ɛleka ne mɔɔ ɛnee ɛyɛlɛ ne ɛlɛsɔ la! Ɛhye zinle Zɛkalaya anwo na ɔ nwo mɔra dule.

13 Anwumabɔvolɛ ne zele ye kɛ, "Zɛkalaya, mmasulo! Mera mebaha meahile wɔ kɛ Nyamenle ɛdie wɔ nzɛlɛlɛ ne, na ɛ ye Ɛlezabɛte bawo ralɛ nrenyia! Na ɔwɔ kɛ ɛto ye duma Dwɔn. 14 Ɛ nee ɛ ye bɛ mu nwiɔ bɛ nye balie kpole kpalɛ wɔ mekɛ mɔɔ bɛbawo kakula ne la, na menli somaa ne ala nee bɛ a bali zɔhane fɛlɛko ne a. 15 Ɔluakɛ ɔbayɛ Awulae menli mgbole ne mɔ anu ko. Ɔnle kɛ ɔno nza menlemenle anzɛɛ nza anu ɛsesebɛ biala, na Sunsum Nwuanzanwuanza ne bayi ye tɛkɛɛ bɔbɔ kolaa na bɛawo ye. 16 Na eza noko ɔbali Dwuuma somaa ne ala adwenle yeamaa bɛanwu Awulae Nyamenle. 17 Ɔbayɛ sonla mɔɔ lɛ sunsum mɔɔ anu yɛ ɛsesebɛ nee tumi kɛ Yilaegya, kapezonli ne mɔɔ ɛwu la; na yemɔ yɛɛ ɔbalumua Awulae Maleɛ ne anyunlu a. Ɔbaha mgbanyinli ahonle aze yeamaa bɛayɛ kɛ ngakula ngyikyi ɛdeɛ la, na eza noko yeahakyi anzosesebɛvoma adwenle yeamaa bɛanyia diedi mɔɔ nrɛlɛbɛ wɔ nu a."

18 Zɛkalaya zele anwumabɔvolɛ ne kɛ, "Ɛhye ɛnrɛyɛ nɔhalɛ! Kɛkala meyɛ kpanyinli mebo zo, yɛɛ me ye ɔdaye noko yeyɛ ɛrelera."

19 Ɛkɛ ne ala, anwumabɔvolɛ ne buale ye zele kɛ, "Bɛfɛlɛ me Geebeleɛle! Megyi Nyamenle agyakɛ anu. Yemɔ yɛɛ ɔvale amaneɛ fɛlɛko ɛhye ɔzoanle me wɔ ɛ nwo ɛke a! 20 Ɛhye ati mese wɔ nɔhalɛ nu kɛ, kɛmɔ wɔanlie me wɔanli la ati, ɛbadɔ mumule, ɛnrɛhola tendɛ dedee kɔkpula mekɛ mɔɔ bɛkɛwo kakula adɔma ne la. Na me edwɛkɛ ne bazi kɛmɔ meha ye ala la."

21 Ɛnee akee menli ekpunli dɔɔnwo ne ɛhendɛ Zɛkalaya dedee bɛvɛ. Bɛnnwu deɛmɔti yehyɛ zɔhane a. 22 Nzinlii mɔɔ ɔvindele ɔrale la, ɛnee eza ɔngola tendɛ kile bɛ. Na bɛnwunle kɛ ɔsi ɔyɛ ye nyɛleɛ la, bɛnwunle kɛ yenwu yekile bie wɔ Asɔne Sua Kpole ne anu. 23 Ɔdɛnlanle Asɔne Sua Kpole ne anu dedee ɔwiele ye mekɛ mɔɔ ɔwɔ kɛ ɔfa ɔyɛ ye gyima ɛdeɛ ne la kolaa na yeahɔ sua nu. 24 Yeangyɛ biala yɛɛ ɔ ye Ɛlezabɛte nrenzɛle a, na ɔveale ɔ nwo dedee kɛyɛ siane nnu.

25 Ɛlezabɛte zele kɛ, "Kpalɛ kokye mɔɔ Awulae ɛyɛ ɛmaa me la ɛne. Yeye me motayɛlɛ nwo nyiane ne yevi ɛkɛ bɔkɔɔ!"

26 Wɔ siane ne mɔɔ tia ye nsia ne la anu, Nana Nyamenle eza zoanle anwumabɔvolɛ Geebeleɛle wɔ Nazalɛte, mɔɔ wɔ Galeli la, 27 wɔ belamunli bie mɔɔ bɛlɛle ye Male, mɔɔ Dwosefi mɔɔ vi belemgbunli Devidi abusua ne anu la ɛva ɔ nloa ɛdo ɔ nwo zo la ɛkɛ.

28 Geebeleɛle rayele ɔ nwo hilele ye na ɔzele ye kɛ, "Ahye, Male, ɛlolɛ ɛyi wɔ tɛkɛɛ! Awulae li ɛ nzi; bɛyila wɔ wɔ mraalɛ avinli!"

29 Ɛhye zinle Male anwo totohyia, ɔti ɔbɔle mɔdenle kɛ ɔkpondɛ deɛ ɛhye mɔɔ anwumabɔvolɛ ne ɛrayɛ ɛhile ye la abo, ɔluakɛ ɛzulolɛ kpole hanle ye somaa.

30 Na anwumabɔvolɛ ne zele ye kɛ, "Mmasulo, Male, ɔluakɛ Nana Nyamenle ɛyɛ ye adwenle kɛ ɔyila wɔ kpole kpalɛ! 31 Ɔnrɛhyɛ biala, ɛbanrenzɛ, na wɔawo ralɛ nrenyia, na ɛbado ye duma ‘Gyisɛse’. 32 Ɔbayɛ sonlakpole kpalɛ; na bɛbavɛlɛ ye Nana Nyamenle Ara. Na Awulae Nana Nyamenle bava ɔ nlenyia Devidi belemgbunli ebia ne yeamaa ye. 33 Na yemɔ yɛɛ ɔbali Yizilayɛ anwo zo belemgbunli wɔ mekɛ mɔɔ ɔnlɛ awieleɛ a, na ye belemgbunlililɛ ne ɛnrɛbɔ aze ɛlɛ!"

34 Male bizale anwumabɔvolɛ ne kɛ, "Na kɛ ɔkɛyɛ na meawo ralɛ wɔ mekɛ mɔɔ menze nrenyia la ɛ?"

35 Anwumabɔvolɛ ne buale ye zele kɛ, "Sunsum Nwuanzanwuanza ne badwu ɛ nwo zo, na Nana Nyamenle tumi ne baheda ɛ nwo zo; ɔti kakula ne mɔɔ ɛbawo ye la bayɛ nwuanzanwuanza bɔkɔɔ: ɔluakɛ ɔle Nana Nyamenle Ara. 36 Tie, siane nsia mɔɔ ɛze ɛhɔ la, yɛɛ wɔ busuanli Ɛlezabɛte ‘mɔɔ bɛse ɔle motavolɛ la’ nrenzɛle a. 37 Ɔluakɛ ɛwɔkɛ biala mɔɔ Nana Nyamenle kɛbɔ la pe zo."

38 Male noko buale ye zele kɛ, "Mele Awulae deɛ, na mɔɔ ɔkɛze me biala la, yemɔ a mebayɛ a. Mesɛlɛ ye kɛ ɔmaa mɔɔ wɔha la amuala ɛyɛ ɛkɛ." Akee anwumabɔvolɛ ne minlinle ɔ nye zo minlimenla.

39,40 Kenle guale nu ekyii la, Male hɔle Zɛkalaya sua zo wɔ Dwudiya kɛ ɔkakpɔla Ɛlezabɛte.

41 Mɔɔ Ɛlezabɛte dele Male ane wɔ ye ahyebizalɛ ne anu la, kakula ne hehanle ɔ nwo wɔ ɔdaye Ɛlezabɛte ɔ kunlu, na Sunsum Nwuanzanwuanza ne rayile ye tɛkɛɛ.

42 Ɔvale fɛlɛkolilɛ kpole ɔdeɛdeanle nu ɔzele kɛ, "Male, Nana Nyamenle ɛyila wɔ ɛdɛla mraalɛ kpokpoti, yɛɛ yeyila ɛ kunlu ralɛ ne noko totohyia. 43 Duzu anyunlunyia bɔbɔ a le ɛhye, kɛ me Awulae ɔ nli ɔdaye ɔkɛbolo agyakɛ too ɔkɛrakpɔla me a! 44 Nea, mekɛ mɔɔ mendele wɔ ahyebizalɛ ne ala la, yɛɛ kakula ne vale fɛlɛko hehanle ɔ nwo wɔ me kunlu a! 45 Ɛlielɛ ɛlile kɛ Nana Nyamenle bayɛ mɔɔ ɔhanle ɔhilele wɔ la; na ɛhye ati noko a yeva nyilalɛ bedevinli ɛhye yemaa wɔ la."

46 Male noko zele kɛ, "Me ɛkɛla ye Awulae ayɛlɛ dahuu; 47 na ɔlua me Nyamenle Ngoanedievolɛ ne noko ati, me sunsum ne noko lɛ anyelielɛ dahuu! 48 Ɔluakɛ yeambu ɔ nye yeangua bɛlɛra ekyi mɔɔ le kɛ medame la anwo zo; na kɛkala ɔlua ye ɛlolɛ kpole ye ati, ɛnɛ aleɛ ye abo amra kpokpoti bavɛlɛ me kɛ sonla ne mɔɔ Awulae Nyamenle ɛyila ye la! 49 Ɔboalekɛ, yemɔ Nwuanzanwuanza bedevinli Ko ne ɛyɛ ninyɛne mgbole ɛmaa me. 50 Ye anwunvɔnezelɛ wɔ ɛkɛ ne dahuu maa bɛdabɛ mɔɔ bɛdie ye bɛdi na bɛsonle ye la.

51 "Duzu tumi kpole a wɔ Nana Nyamenle asa ɛnlomboɛ ne anu a! Mɔɔ ɔkola ɔfa ɔbɔ mgbanyizonleyɛvoma nee anwomemaazovoma ɔkponde a! 52 Yedudu arelemgbunli mralɛ yevi bɛ mbia ne mɔ azo, na yekpogya mɛlɛbɛnwoazema zo. 53 Yemaa menli mɔɔ ɛlɛdi nyane wɔ bɛ ahonle nu la akunlu ɛdwo bɛ nwo, na akee yevoa anyiabɛnwoma yemaa bɛva bɛ sa mgbane bɛnriandi. 54 Yeboa ye sonvolɛ Yizilayɛ! Yɛɛ yeammaa ɔ rɛle anvi ye anwunvɔnezelɛ ɛwɔkɛ ne noko! 55 Ɔluakɛ ɔbɔle yɛ ze mɔ, Ebileham nee ɔ mra ɛwɔkɛ kɛ, ɔbaze bɛ anwunvɔne wɔ mekɛ mɔɔ ɔnlɛ awieleɛ."

56 Male lile kɛyɛ siane nsa wɔ Ɛlezabɛte anwo ɛkɛ kolaa na yeazia yeahɔ ye sua zo.

57 Ɛlezabɛte awolɛ mekɛ ne dwule, na ɔwole ralɛ nrenyia. 58 Yeangyɛ biala edwɛkɛ ne zandele maanle ye aako nu amra, ɔ gɔnwo mɔ nee ye mbusua dele kɛ Awulae ɛzi ɛlo ye a, na bɛ muala bɛ nee ye lile nwolɛ fɛlɛko somaa ne ala.

59 Mɔɔ kakula ne lile kenle mɔtwɛ la, bɛ nwo amra nee bɛ gɔnwo mɔ amuala rale ye dumadonlɛ ɔ nee ye mrenyiazopɛlɛ guabɔlɛ ne abo. Ɛnee bɛ muala bɛ adwenle a le kɛ bɛbava ye bɛado ɔ ze Zɛkalaya.

60 Na Ɛlezabɛte zele bɛ kɛ, "Kyɛkyɛ! Ɔwɔ kɛ bɛfɛlɛ ye Dwɔn!"

61 Bɛdeanle nu bɛzele kɛ, "Duzu ati ɔ? Awie biala ɛnle wɔ abusua ye anu mɔɔ bɛfɛlɛ ye zɔhane a." 62 Ɔti bɛyɛle sɛkɛlɛneɛ bɛhilele ɔ ze kɛ ɔhile adɔma ne duma.

63 Ɔdole ɛsalɛ kɛ bɛrɛlɛ ye sileeti. Na mɔɔ ɔ sa hanle ye la, ɔyɛle awie biala azibɛnwo kɛ ɔhɛlɛle kɛ, "Ye duma a le Dwɔn." 64 Na ɛkɛ ne ala Zɛkalaya holale dendɛle na ɔbɔle ɔ bo kɛ ɔye Awulae ayɛlɛ.

65 Ɛhye zinle awie biala anwo totohyia, na edwɛkɛ ne zandele Dwudiya awoka ne mɔ azo ɔ nee namunamu ne mɔ anu amuala. 66 Na awie biala mɔɔ dele la dwenlenle nwolɛ fane dɔɔnwo ne ala na bɛzele kɛ, "Ɛnee duzu sonla a kakula ɛhye bayɛ a? Ɔluakɛ Nana Nyamenle asa la ɔ nwo zo wɔ adenle ngakyile bie anu."

67 Akee Sunsum Nwuanzanwuanza ne radwule ɔ ze Zɛkalaya anwo zo maanle ɔhanle kɛ:

68 "Bɛye Awulae, Yizilayɛ Nyamenle ne ayɛlɛ, ɔluakɛ yera yerakpɔla ye menli, na yekpɔne bɛ yevi akɛlɛyɛlɛ bo. 69 Na yeye Ngoanedievolɛ Bedevinli bie yevi Devidi dehelɛ abusua ne anu yemaa yɛ, 70 kɛmɔ ɔluale ye anwodelɛ ngapezoma ne mɔ anwo zo ɔbɔle nwolɛ ɛwɔkɛ ne, wɔ melɛ tendenle mɔɔ ɛze ɛhɔ la, 71 kɛ ɔbakpɔne yɛ yeavi yɛ kpɔvolɛma nee bɛdabɛ mɔɔ bɛkyi ye la amuala asa anu.

72,73 "Amgba noko yenwu yɛ nlenyia mɔ anwunvɔne, na eza yenwu yɛ ze Ebileham mumua ne noko anwunvɔne, wɔ ye ɛwɔkɛ dɛba ne bɔbɔ mɔɔ ɔhakyele la ati; 74 nee ɛyelɛ mɔɔ yeye yɛ yevi yɛ kpɔvolɛma asa anu, amaa yɛahola yɛanyia adenle yɛazonle ye mɔɔ ɛzulolɛ biala ɛnle nu la; 75 yɛɛ yɛ nwo bɔbɔ mɔɔ yede ye nwuanzanwuanza amaa yɛagyinla ɔ nyunlu wɔ mekɛ mɔɔ ɔnlɛ awieleɛ la.

76 "Na wɔmɔ kakula ɛhye, bɛbavɛlɛ wɔ Nyamenle Bedevinli ne kapezonli, ɔluakɛ wɔmɔ a ɛbaziezie adenle ne anu wɔamaa Ngoanedievolɛ ne a. 77 Wɔmɔ a ɛbahile menli adenle mɔɔ bɛfa zo a bɛkɛnyia ngoane wɔ bɛ ɛtanefakyɛ nu a. 78 Ɛhye mɔ amuala bazi, ɔluakɛ Nana Nyamenle ye anwunvɔnezelɛ ne le kpole, yɛɛ akee anwuma maanle ne noko ɛlɛba arabuke amaa yɛ, 79 na ɛhye bamaa bɛdabɛ mɔɔ bɛde awozinli nu, ɔ nee ewule ɛlobɔ nu la anwu wienyi, na wienyi ne awowa yɛ muala ahɔ anzondwolɛ nu."

80 Kakula ekyi ne vale ye ahonle muala maanle Nana Nyamenle amgba. Na mɔɔ ɔyɛle kpanyinli la, fiemgbole zo lɔ a ɔdɛnlanle dedee hɔkpulale mekɛ mɔɔ ɔbɔle ye Nyamenle gyima ne abo wɔ Yizilayɛma anu la.