Lucas 11

Nzɛlɛlɛ nee anwodelɛ

1 Kenle ko bie, Gyisɛse hɔle asɔne ɛyɛlɛ. Mɔɔ ɔwiele ala la, ye ɛdoavolɛma ne mɔ anu ko hɔle ɔ nwo ɛkɛ ne na ɔzele ye kɛ, "Awulae, kile yɛ asɔne ɛyɛlɛ kɛmɔ Dwɔn hilele ye ɛdoavolɛma ne mɔ la."

2 Ɔzele bɛ kɛ, "Saa bɛyɛ asɔne a, anrɛɛ bɛha kɛ, ‘Egya, wɔ duma nwo ɛde. Wɔ Belemgbunlililɛ deɛ ne ɛrɛla. 3 Maa yɛ kenle dahuu aleɛ; 4 na fa yɛ ɛtane kyɛ yɛ, kɛmɔ yɛfa yɛkyɛ bɛdabɛ mɔɔ bɛyɛ ɛtane bɛtia yɛ la. Na mmamaa munzule biala to yɛ.’"

5,6 Akee ɔhɔle zo ɔzele bɛ kɛ, "Bɛ nuhua ne boni, yɛɛ saa ɔ gɔnwo babɔ ye anlenkɛ nu alevinli-mu-nwiɔ-avinli na ɔse ye kɛ, ‘Agɔnwolɛ, fɛne me kpanwo dolɔfo nsa ɔluakɛ menyia ɛyɛvolɛ, na menlɛ aleɛ biala mɔɔ mefa meamaa ye a,’ 7 ɔkɛbua ye ɔkɛvi suakunlu nehane ɔkeze ye kɛ, ‘Mmagyegye me na aleɛ ɛdwo, medo me anlenkɛ nu, yɛɛ me mra deda me nwo ɛke, ɔti menrɛhola dwazo a?’

8 "Memaa bɛade ɔ bo kɛ, bɔbɔ ɛkɛdu agɔnwolɛyɛlɛ ne ɛkɛzie ahanle, na ɛnrɛdwazo ɛnrɛmaa ye ɛhwee, noko akee saa ɔkɔ zo ɔbɔ wɔ anlenkɛ ne anu a, ɔkɛyɛ wɔ abodelɛ ɔkɛmaa ɛkɛdwazo ɛkɛva debie biala mɔɔ ɔkpondɛ la ɛkɛmaa ye. 9 Memaa bɛade ɔ bo bieko kɛ, kɛ asɔneyɛlɛ de ala la ɛne, yemɔti bɛbiza, na bɛ sa kɛha ye; bɛkpondɛ, na bɛkɛnwu ye; bɛbɔ nu, na bɛkɛbuke bɛ. 10 Ɔluakɛ awie biala mɔɔ biza la asa ka ye; awie biala mɔɔ kpondɛ la nwu ye; yɛɛ awie biala mɔɔ bɔ anlenkɛ ne anu la bɛbuke ye.

11 "Selɛ ne boni a saa ɔ ra biza ye aleɛ a ɔmaa ye bolɛ; anzɛɛ ɔbiza ye fɛlɛ a ɔmaa ye ɛwɔlɛ a? 12 Saa ɔbiza kolonvia a, ɛmaa ye nyamenleakɛlɛ ɔ?

13 "Na saa bɛmɛ, ɛtanevolɛma mɔɔ le kɛ bɛdabɛ la, bɛze ahyɛlɛdeɛ kpalɛ mɔɔ bɛfa bɛmaa bɛ mra la a, ɛnee duzu ati a saa bɛbiza Sunsum Nwuanzanwuanza ne bɛfi Egya ne mɔɔ wɔ anwuma maanle ne anu la ɛkɛ ne a, ɔnrɛva ɔnrɛmaa bɛ a?"

14 Ɔrale ye kɛ, ɛnee Gyisɛse ɛlɛtu sunsum evinli avi nrenyia bie mɔɔ le mumule la nu. Na mekɛ mɔɔ sunsum evinli ne vile ye nu vindele la, nrenyia mumule ne dendɛle, na ɔyɛle menli ne azibɛnwo; 15 na bɛ nuhua bie mɔ zele kɛ, "Ɔdua mbɔnsam belemgbunli Biyɛlezɛbɛle tumi nu a ɔtu mbɔnsam a!" 16 Bie mɔ noko zɔle ye nleanle na bɛzele ye kɛ ɔyɛ sɛkɛlɛneɛ bie wɔ anwomanyunlu ɔmaa bɛnlea ɔva ɔhile kɛ amgba ɔle Sonla Ra ne.

17 Gyisɛse nwunle bɛ adwenle ne mɔ, na ɔbuale bɛ ɔzele kɛ, "Belemgbunli maanle biala ko tia ɔ nwo a maanle ne ɛngola ɛngyinla; zɔhane ala noko yɛɛ aako mɔɔ nuhua menli ko tia bɛ nwo la ɛngola ɛngyinla a. 18 Ɔti saa Abɔnsam tu ɔ gɔnwo Abɔnsam a, ɛnee ɔlɛko yeatia ɔ ngomekye ɔ nwo, na eza ɔlɛsɛkye ɔdaye ɔ ngome ye belemgbunli maanle. 19 Na saa mame melua Biyɛlezɛbɛle anwo zo, anzɛɛ mbɔnsam tumi zo a metu mbɔnsam a, ɛnee duzu tumi a bɛ mra ne mɔ dua zo tu mbɔnsam a? 20 Na saa melua Nana Nyamenle tumi zo melɛtu mbɔnsam ɛdeɛ a, ɛnee ɔkile kɛ Nana Nyamenle Anwuma belemgbunli maanle ne ɛbikye ala ɛne.

21 "Saa katakyie fa ye konlendeɛ siezie ɔ nwo sie sinza ye aako a, ye agyapandeɛ anwo ɛmbu ɛbonle; 22 na saa awie mɔɔ anwo yɛ ɛsesebɛ kpalɛ tɛla ye la wua ye wɔ konle nu di ɔ nwo zo konim a, ɔdie ye konlendeɛ ne mɔ mɔɔ ɔvale ɔ rɛle ɔwulale bɛ nu la ɔfi ɔ sa nu, na ɔwua ye agyapandeɛ ne bɔkɔbɔkɔ zɛ.

23 "Awie biala mɔɔ ɛnle me afoa la, ɛnee ɔle me kpɔvolɛ; yɛɛ mɔɔ nee me ɛnguohua la sande nu.

24 "Saa bɛtu sunsum evinli bɛfi sonla nu a, ɔkɔ ɛsɛlɛ ne mɔ azo akpɔsa kɛ ɔkalie ɔ menle bie; na saa yeannyia ɛleka yeandɛnla a, akee ɔse kɛ, 25 ‘Maa menzia mengɔ nrenyia ne mɔɔ menvile ye lɔ membale la ɛkɛ.’ 26 Na ɔkɔ ɔkɔfa ɔ gɔnwo mɔ sunsum evinlima nsuu mɔɔ anwo yɛ ɛsesebɛ kpalɛ tɛla ɔdaye mumua ne la, na ɔ nee bɛ batɛnla nrenyia ne nu na nrenyia ne tɛnlabelɛ nu yɛ ɛsesebɛ tɛla dɛba ne deɛ ne bɔbɔ."

27 Mekɛ mɔɔ ɔ nloa wɔ zo ɔlɛtendɛ la, raalɛ bie mɔɔ wɔ menli ekpunli ekpunli ne anu la vale ɛnelɛ kpole bie zele ye kɛ, "Nyilalɛ ɛha ɛrɛladane holɛ ko ne mɔɔ wole wɔ la, ɔ nee nyɛfonlɛ ne mɔɔ ɛnlonle la."

28 Gyisɛse buale raalɛ ne zele ye kɛ, "Nyilalɛ ɛha bɛdabɛ mɔɔ bɛtie Nana Nyamenle Edwɛkɛ ne na bɛdi zo la emomu!"

29,30 Mekɛ mɔɔ menli ne yɛle pinopino kpalɛ la, Gyisɛse bɔle ɔ bo kɛ ɔkilehile bɛ, na ɔzele kɛ, "Mekɛ ɛhye nee nuhua menli ɛnle kpalɛ. Dahuu bɛkɔ zo bɛbiza kɛ bɛkɛnwu sɛkɛlɛneɛ ɛzulolɛ ɛzulolɛ bɛkɛvi anwomanyunlu mɔɔ kile kɛ amgba mame a le Sonla Ra ne a; na emomu sɛkɛlɛneɛ mɔɔ mebayɛ meahile bɛ la a le nwanwanedeɛ ne mɔɔ zile Dwona anwo zo, mɔɔ ye anwubielɛ maanle Nenɛvɛ amra nwunle kɛ Nana Nyamenle a amgba zoanle ye la a.

31 "Wɔ Ndɛnebualɛ Kenle ne, Hyiba Belemgbunli Raalɛ ne badwazo adende ɔ sa wɔ ɛlɔnwɔne ɛhye anwo zo adendɛ atia ye, ɔluakɛ ɔvɛle ɔdule adenle tendenle ɔhɔzɔle Sɔlɔmɔn nrɛlɛbɛ ne ɔnleanle. Na emomu awie ko mɔɔ le kpole tɛla Sɔlɔmɔn la wɔ ɛke mɔɔ menli ekyii bie ala a tie ye a.

32 "Nenɛvɛ amra noko badwazo adendɛ atia maanle ɛhye, ɔluakɛ bɛnlunle bɛ nwo wɔ mekɛ mɔɔ Dwona hanle Nyamedwɛkɛ ne hilele bɛ la; na awie ko mɔɔ le kpole tɛla Dwona la wɔ ɛke, na maanle ɛhye anu amra ɛndie ye.

33 "Awie biala ɛnle ɛkɛ ne mɔɔ ɔsɔ kɛnlaneɛ ɔfa ɔfea a! Emomu ɔfa ɔsie ye anwuma amaa yeada wienyi amaa awie biala anwu sua ne anu awolo. 34 Sonla nye le ye sonlabaka ne kɛnlaneɛ. Saa ɛ nye le kpalɛ a ɛnee wɔ sonlabaka ne lɛ kɛnlaneɛ, na saa ɛ nye ɛnle kpalɛ a, ɛnee wɔ sonlabaka ne de awozinli nu. 35 Zɔhane ati, bɛnlea boɛ na bɛ kɛnlaneɛ ne annu, ammaa awozinli anva bɛ aze. 36 Saa wɔ sonlabaka ne lɛ kɛnlaneɛ mɔɔ awozinli ekyi zɛ bɔbɔ ɛnle ye nu a, ɔbada yeayɛ wienyi kɛ asɛɛ bɛzɔ kɛnlaneɛ bɛzie ɛ nwo zo la."

Bɛhwile adalɛ nabalabama ne mɔ anyunlu

37,38 Mɔɔ Gyisɛse anloa dɔle la, Falasiima ne mɔ anu ko vɛlɛle ye kɛ ɔmaa bɛhɔkpula bɛ sa, ɔti ɔ nee ye hɔle. Mɔɔ bɛbɔle aleɛ ne ɛlilɛ bo la, Gyisɛse anwowo ɔ sa anwo kɛmɔ Dwuuma aleɛlilɛ nwo amaamuo ne kile la. Ɛhye yɛle Falasiinli ne mɔɔ dole ɛkponle ne la azibɛnwo totohyia.

39 Gyisɛse zele ye kɛ, "Bɛmɛ Falasiima, bɛnrinzi bɛ nwo na bɛgyakyi bɛ kunlu ne mɔɔ apobɔlɛ nee ɛtaneyɛlɛ ɛyi ye tɔ la. 40 Anzɛɛ bɛnze kɛ Nana Nyamenle bɔle sonla kunlu nee ɔ nzi ɔ? 41 Tenlene nwo daselɛlilɛ a le atiakunlukpalɛyɛlɛ.

42 "Munzule ɛha bɛ, bɛmɛ Falasiima! Ɔluakɛ bɔbɔ bɛbu bɛ gyima mɔɔ bɛyɛ la anwo ahatualɛ nu bulu na bɛfa nuhua ko bɛgua bɛ asɔne gya ne anu ɛdeɛ, noko akee bɛnli pɛlepɛle, yɛɛ eza noko bɛngulo Nana Nyamenle. Ɔle zɔ kɛ ɔwɔ kɛ bɛtua bɛ asɔne adwule, noko akee ɔnle kɛ bɛgyakyi pɛpɛlilɛ nee Nana Nyamenle nwo ɛhulolɛ ne.

43 "Munzule ɛha bɛ, bɛmɛ Falasiima! Bɛmɛ gyinlabelɛ mgbole ɛleka a bɛkpondɛ ye wɔ ayiasua ne mɔ anu bɛtɛnla a, yɛɛ dahuu bɛkulo bagua nu nganvolɛ! 44 Munzule ɛha bɛ! Ɔluakɛ bɛle kɛ azɛka mɔɔ ndile ɛnyi ɛva bɛ na menli noko mɔɔ lua zolɛ la ɛnnwu bɛ la."

45 Dwuu lɔyanli bie mɔɔ ɛnee gyi ɛkɛ ne la zele ye kɛ, "Kilehilevolɛ, saa ɛka ɛhye a ɛnee wɔwɔ yɛdayɛ noko safule."

46 Gyisɛse buale ye zele kɛ, "Munzule ɛha bɛdabɛ noko! Ɔboalekɛ, bɛsoa menli adesoa mgbole mgbole, noko akee bɛmɛ bɛngulo kɛ bɛkɛva bɛ sa ɛlɛsɛka ko bɔbɔ bɛkɛha adesoa ne bie. 47 Munzule ɛha bɛ! Ɔboalekɛ bɛtu avunli ahuma bɛsie ngapezoma ne mɔ mɔɔ bɛ ze mɔ hunle bɛ la. 48 Bɛle ahodiawu! Ɔluakɛ bɛdi zɛhae gyima ne mɔɔ bɛ ze mɔ lile la anwo daselɛ, na bɛdie bɛto nuhua noko; bɛhunle ngapezoma ne mɔ yɛɛ bɛmɛ noko bɛdudu ahuma bɛziezie bɛ nu.

49 "Nyɛleɛ ɛhye a Nana Nyamenle ɛha nwolɛ edwɛkɛ ɛdo ye ɛkɛ a, kɛ: ‘Mebazoa ngapezoma nee ɛdoavolɛma wɔ bɛ nwo, na bɛbahwi bie mɔ anyunlu na bɛahu bie mɔ noko.’

50 "Na bɛdabɛ mɔɔ wɔ aleɛabo kɛkala la bali ngapezoma mɔɔ bɛhu bɛ la kpokpoti mogya nwo ɛzonle; 51 bɛbali Ebulu mɔɔ bɛhunle ye la mogya nwo ɛzonle yeahɔkpula Zɛkalaya mɔɔ bɛhunle ye wɔ asɔne sua ne azukponle Nwuanzanwuanza ne anwo la mogya nwo ɛzonle. Nɔhalɛ nu mese bɛ kɛ, bɛbabua bɛ nwolɛ ndɛne.

52 "Bɛmɛ mɛla kilehilevolema, munzule ɛha bɛ! Ɔluakɛ bɛva nɔhalɛ ne bɛvea menli; bɛdabɛ mumua ne bɛnrɛli nɔhalɛ yɛɛ bɛnrɛmaa awie mɔ noko adenle bɛnrɛmaa bɛnrɛli nɔhalɛ."

53,54 Ɛhye maanle Falasiima nee Mɛla kilehilevolɛma ne mɔ vale ɛya kpole. Ɔti ɔvi zɔhane melɛ ne mɔɔ kɔ la, bɛbɔle mɔdenle kɛ bɛkɛva kpuyia bɛkɛbɛla ye nu amaa ɔlua zo bɛ sa aha ye bɛahye ye.