Marcos 1

1 Ɛhye a le Gyisɛse, Ngoanedievolɛ ne, Nana Nyamenle Ara kotokokye ne anwo adawu nwanwane ne mɔlebɛbo a.

2 Nana Nyamenle hanle ye wɔ Kapezonli Ayezaya buluku ne anu kɛ, Ɔbazoa Ɔ ra wɔ azɛlɛ ye azo. Na Ɔbalumua yeazoa ɛzoavolɛ titili ko yeamaa yearaziezie ewiade ne yeahendɛ ye maleɛ ne.

3 Ayezaya zele kɛ, "Zɛhae ɛzoavolɛ ne badɛnla fiemgbole anzɛɛ ɛsɛlɛ resee ne azo, na yeala ye ali kɛ, awie biala ɛziezie ye ahonle nu ɔ nee ye ɛbɛla nu na ɔva ɔhendɛ Awulae maleɛ ne."

Dwɔn sɔnevolɛ ne

4 Zɛhae ɛzoavolɛ ne yemɔ a le Dwɔn Sɔnevolɛ ne. Yemɔ a ɔdɛnlanle fiemgbole ne azo na ɔbɔle ye nolo kɛ ɔwɔ kɛ bɛsɔne awie biala mɔɔ kile kɛ yehwe ɔ nwo yevi ɛtane ɛyɛlɛ nwo a, amaa Nana Nyamenle noko ava ye ɛtane ahyɛ ye. 5 Menli vi Gyɛlusalɛm nee Dwudiya ngameɛ ngameɛ amuala rale Dwudiya azɛlɛ zo kɛ, bɛba bɛaranlea na bɛadie Dwɔn edwɛkɛ ne, na mɔɔ bɛhanle bɛ ɛtane ne mɔ bɛhilele ye la, ɔzɔnenle bɛ wɔ Azule Dwɔdan ne anu. 6 Afunlumu nwoma a bɛva bɛnwo ye tɛladeɛ ne mɔɔ ɔwula la amuala a, na nwoma bɛlɛte noko a bɔ zolɛ a; na ye aleɛ a le aabɛ nee ɛhoayelɛ nu wolɛ. 7 Ye edwɛkpa ne ngilehile ne bie a le kɛ, "Ɔnrɛhyɛ biala awie bie bara mɔɔ ɔle kpole ɔtɛla me bɔkɔɔ a, na ɔlua ye kpole somaa ti, ye mgbɔlaboa ne bɔbɔ mɔɔ ɔwula la memfɛta kɛ menwɔzanyi ye nyɛma ne. 8 Nzule yɛɛ melɛfa meazɔne bɛ a na yemɔ ɔbava Nana Nyamenle Sunsum Nwuanzanwuanza ne a yeazɔne bɛ a!"

9 Na kenle ko bie Gyisɛse vi Nazalɛte mɔɔ wɔ Galeli la rale, na Dwɔn zɔnenle ye wɔ Azule Dwɔdan ne anu. 10 Na mɔɔ Gyisɛse vi azule ne anu vindele la, ɔnwunle kɛ anwuma maanle ne ɛbuke wienyi, na Sunsum Nwuanzanwuanza ne ɛlɛdwu ɔ nwo zo kɛ aabule la. 11 Na ɛnelɛ bie vi anwuma maanle ne anu zele kɛ, "Wɔmɔ a ɛle me ɛhulolɛ Ralɛ ne a; me anyezɔlɛ Ralɛ a le wɔ." 12,13 Na ndɛndɛ ne ala, Sunsum Nwuanzanwuanza ne hwenle Gyisɛse hɔle ɛsɛlɛ ne azo. Ɔ ngome ɔwɔ ɛkɛ ne too kenle abulanla. Na Abɔnsam zɔle ye nleanle kɛ ɔmaa yeayɛ ɛtane. Na nzinlii, anwumabɔvolɛma noko rale ɛkɛ ne razonlenle ye.

14 Mɔɔ Belemgbunli Hɛlɔdo maanle bɛhyele Dwɔn la, yeangyɛ biala Gyisɛse hɔle Galeli kɛ ɔkaha Nyamenle Edwɛkpa ne.

15 Ɔse: "Akee mekɛ ne ɛdwu. Nana Nyamenle Ye Belemgbunli maanle ne ɛbikye! Awie biala ɛhwe ɔ nwo ɛvi ɛtaneyɛlɛ nu, na ɔlie Edwɛkpa ne ɔli na ɔnlea zo ɔbɔ ye ɛbɛla noko."

Gyisɛse ɛkpa ye ɛdoavolɛma

16 Kenle ko bie mɔɔ Gyisɛse lua ɛnweazo wɔ Galeli nyevile ne anloa la, ɔnwunle Saemɔn ɔ nee ɔ diema Andelu kɛ bɛlɛ avonle bɛlɛkye fɛlɛ, ɔluakɛ, bɛle adwɛnekɔvolɛma.

17 Gyisɛse deanle nu vɛlɛle bɛ na ɔzele bɛ kɛ, "Bɛrɛla, bɛradoa me! Na mebayɛ bɛ menli mɔɔ bɛto avonle bɛkye menli ngɛla a!" 18 Ɛkɛ ne ala bɛgyakyile bɛ avonle ne na bɛdoale ye bɛ nee ye hɔle.

19 Bɛhɔle bɛ nyunlu ekyii la, ɔnwunle Zɛbɛdi amra nwiɔ ne, Gyemise nee Dwɔn, kɛ bɛde ɛlɛne nu na bɛlɛsa bɛ avonle ne mɔ. 20 Ɔvɛlɛle bɛdabɛ noko, na ndɛndɛ ne ala bɛgyakyile bɛ ze Zɛbɛdi nee ɛkpavoma ne mɔ wɔ ɛlɛne ne anu na bɛdoale ye bɛ nee ye hɔle.

21 Gyisɛse nee ye ɛdoavolɛma ɛhye mɔ akee hɔdwule Kapɛnayɛm sua ne azo; ye Folɛ nwonlomɔ ne bɛhɔle Dwuuma ayiasua ne anu na ɔhanle Edwɛkpa ne. 22 Ye ngilehile ne yɛle menli mɔɔ bɛwɔ asɔne sua ne anu la amuala azibɛnwo, ɔluakɛ, ɔdendɛle tumi nu na yeanyɛ kɛ menli mɔɔ fa awie mɔ edwɛkɛ kile bɛ deɛ nu la, bɔbɔ kɛmɔ kɛlɛhɛlɛvolɛma ne mɔ ye ye la.

Menli ngakyile ɛde kpɔkɛ

23 Nrenyia bie mɔɔ ɛnee bozonle ɛva ye la noko wɔ ɛkɛ ne bie, na ɔbɔle ɔ bo kɛ ɔteɛdea nu kɛ, 24 "Gyisɛse, Nazalɛtenli, duzu ati a ɛlɛgyegye yɛ zɛhae a, wɔra kɛ ɛba wɔarazɛkye yɛ anzɛɛ? Nea, meze wɔ sonla holɛ. Wɔmɔ a ɛle Nana Nyamenle Ara nwuanzanwuanza ne a!"

25 Gyisɛse deanle sunsum ɛtane ne nu kɛ ɔyɛ koonwu ɔvi nrenyia ne nu ɔvinde. 26 Na amgba noko sunsum ɛtane ne kponlenle ɔ bo ɔpɛle nrenyia ne ɔdole ye aze na ɔvi ye nu ɔvindele ɔhɔle. 27 Ɛhye yɛle menli ne mɔ azibɛnwo na bɛzele bɛ nwo ngoko ngoko kɛ, "Duzu ɛzonlenlɛ fofolɛ a le ɛhye? Duzu ati a awozonle bɔbɔ tie ye na bɛdi ye edwɛkɛ zo a?"

28 Na ndɛndɛ ne ala ye nwanwane ninyɛne ne mɔɔ yeye la anwo adawu zandele Galeli maanle ne anu amuala.

29,30 Na bɛvile Ayiasua ne anu la, ɔ nee ye ɛdoavolɛma ne mɔ hɔle Saemɔn nee Andelu sua nu, na bɛhɔdole kɛ ebunlu ɛhye Saemɔn azebɛla ɛsesebɛ ɛsesebɛ na ɔlua zo ɔla ɛkpa nu, na bɛhanle bɛhilele Gyisɛse. 31 Gyisɛse hɔle ye ɛkpa ne anwo ɔhɔzɔle ɔ sa kɛ ɔboa ye yeamaa yeadɛnla aze, na ɛkɛ ne ala ebunlu ne vi ye nu dule, na ɔdwazole na ɔdonle debie ɔmaanle bɛ!

32,33 Mɔɔ ɔkadwu sɛnzɛndɔleɛ la ɛnee wuliravolɛma nee menli mɔɔ awozonle ɛva bɛ la ɛyi aako ne anu tɛkɛɛ, kɛ bɛba bɛamaa yeayɛ bɛ ayile; na menli dɔɔnwo mɔɔ bɛvi Kapɛnayɛm sua ne azo amuala la rayiale ɛkɛ ne kɛ bɛbanlea bie. 34 Yemɔti Gyisɛse yɛle wuliravolɛma dɔɔnwo ne ala ayile na eza ɔdule awozonle ɔvile dɔɔnwo ne ala anu wɔ zɔhane nɔsolɛ ne. Na emomu, yeammaa awozonle ne mɔ adenle yeammaa bɛandendɛ, ɔluakɛ, ɛnee bɛze ye sonla holɛ.

35 Aleɛ hyenle la, ɔdwazole nwonlomɔ mangyee ne ala ɔhɔle fiemgbole ne azo kɛ ɔ ngomekye ɔkazɛlɛ.

36,37 Nzinlii, Saemɔn nee bɛdabɛ mɔɔ bɛha la hɔle kɛ bɛkakpondɛ ye. Na mɔɔ bɛnwunle ye la, bɛzele ye kɛ, "Awie biala ɛlɛbiza ɛ bo zo."

38 Na ɔbuale bɛ kɛ, "Ɔwɔ kɛ yɛkɔ azua azua mɔɔ ɛha la azo na mekɔka edwɛkpa ne mekile bɛ wɔ ɛkɛ ne noko, ɔluakɛ, ɔlua ɛhye ati a membale aleɛabo a."

39 Yemɔti ɔhɔle Galeli maanzinli ne anu amuala, na ɔhɔhanle edwɛkpa ne wɔ bɛ ayiasua ne mɔ anu, na ɔvale tumi ɔdule dɔɔnwo ne ala bɛ awozonle ɔvile bɛ nu. 40 Kenle ko, kokobɛvolɛ bie noko rahotole ɔ nyunlu na ɔbodole ɔzɛlɛle ye kɛ, "Saa ɔyɛ wɔ ɛhulolɛ ɛdeɛ a, ɛbahola wɔayɛ me ayile."

41 Na Gyisɛse anwunvɔnezelɛ nu ala zɔle ye na ɔzele ye kɛ, "Ɔyɛ me ɛhulolɛ! Te kpɔkɛ!" 42 Na ɛkɛ ne ala kokobɛ ne vi ɔ nwo dule bɔkɔɔ, na nrenyia ne anwo zale!

43,44 Gyisɛse akee bɔle ye kɔkɔ ɛsesebɛ ɛsesebɛ kɛ, "Mmaka ɛkile awie biala wɔ adenle nu. Na kɔ kɔva ɛ nwo kile Dwuuma azɛlɛvolɛ ne mɔ maa bɛbɔ wɔ azu kɛmɔ Mosisi mɛla ne se la, amaa awie biala ali nwolɛ daselɛ kɛ amgba ɛ nwo ɛza bɔkɔɔ."

45 Noko akee nrenyia ne lua adenle nu ɔkɔ la yeangola edwɛkɛ ne fa sie; ɔbɔle ye nolo wɔ maanle ti nee maanle bo kɛ ɔ nwo ɛza. Ɛhye ati ɛnee akee Gyisɛse ɛngola sua zo kɔ wɔ wienyi nu, na ɔde ahanle ahanle wɔ ɛsɛlɛ reserese ne mɔ azo. Na menli dɔɔnwo ne ala vi ɛleka gyɛne gyɛne rale ɔ nwo ɛkɛ ne.