Mateus 17

Gyisɛse wɔ ye anyunlunyia nu

1 Kenle nsia anzi, Gyisɛse vale Pita, Gyemise, nee ɔ diema Dwɔn hɔle boka tendenle koonwu bie azo. 2 Na mɔɔ bɛ nye gyi ɔ nwo la, ɔhakyile, na ɔ nyunlu dale kɛ sɛnzɛne na ye tɛladeɛ ne yɛle fufule nwohyee zɛhae.

3 Na nea, Mosisi nee Yilaegya rale ɛkɛ na bɛ nee ye dendɛle. 4 Pita zele Gyisɛse kɛ, "Awulae, yeyɛ moavolɛ kɛ yɛwɔ ɛke bie a! Saa ɛkulo a, mebabɔ kpɔda nsa, wɔ deɛ ko, Mosisi deɛ ko, yɛɛ Yilaegya noko deɛ ko."

5 Na mɔɔ ɔ nloa wɔ zo mɔɔ ɔka ɛhye la, amungu wienyi bie rahedale bɛ nwo zo, na ɛnelɛ bie vi amungu ne anu dendɛle zele kɛ, "Ɛhye a le me Ra ne mɔɔ mekulo ye na me nye sɔ ye la. Bɛdie ye."

6 Ɛdoavolɛma ne mɔ dele ɛhye la, bɛ ahonle dule totohyia na bɛbutubutule bɛ nye aze. 7 Gyisɛse rale bɛ nwo ɛkɛ ne na ɔvale ɔ sa ɔhanle bɛ na ɔzele bɛ kɛ, "Bɛdwazo, bɛmmasulo!"

8 Na mɔɔ bɛmaanle bɛ nye zo la, ɛnee Gyisɛse angomekye ala yɛɛ agyi bɛ nwo ɛkɛ ne a.

9 Akee mɔɔ bɛvi boka ne azo bɛdwu aze la, Gyisɛse hyɛle bɛ kɛ bɛmmaka mɔɔ bɛnwu ye la bɛkile awie biala too kɔkpula mekɛ mɔɔ ɔkɛvi ewule nu ɔkɛdwazo la.

10 Ye ɛdoavolɛma ne mɔ bizale ye kɛ, "Duzu ati a Dwuuma mgbanyima ne mɔ se kɛ ɔwɔ kɛ Yilaegya ba kolaa na Ngoanedievolɛ ne ɔdaye yeara ɛ?"

11 Gyisɛse buale bɛ kɛ, "Bɛle nɔhalɛ. Ɔwɔ kɛ Yilaegya dumua ba na ɔbatoto debie biala pɛpɛ pɛpɛ. 12 Na nɔhalɛ nu, yera dɛbadɛba bɔbɔ, na bɛannwu ye sonla holɛ, yemɔti menli dɔɔnwo ne ala noko yɛle ye ayɛkayɛkadeɛ. Na Mame, Ngoanedievolɛ ne noko mebanwu amaneɛ wɔ bɛ sa nu zɔhane ala."

13 Akee ɛdoavolɛma ne mɔ dele ɔ bo kɛ Dwɔn Sɔnevolɛ ne anwo edwɛkɛ a ɔlɛka la.

Gyisɛse wɔ azɛlɛ ye azo

14 Mɔɔ bɛdwule boka ne ako abo la, ɛnee menli ekpunli ekpunli dɔɔnwo bie ɛlɛkendɛ bɛ. Na nrenyia bie rahotole Gyisɛse anyunlu ɛkɛ ne na ɔzele ye kɛ, 15 "Yɛmenle, nwu me ra kakula nrenyia ye anwunvɔne, ɔluakɛ, ɔpɛ mgbutike, na ɔnwu amaneɛ dɔɔnwo, ɛhye ati ɔyɛ a ɔpɛ ye ɔto senle nu anzɛɛ nzule nu; 16 ɛhye ati me nee ye rale kɛ, wɔ ɛdoavolɛma ne mɔ ɛyɛ ye ayile, noko akee bɛangola."

17 Gyisɛse buale kɛ, "O, bɛmɛ mɔɔ bɛ nzo yɛse, na bɛnlɛ diedi biala a! Me nee bɛ ɛdɛnla ɛhɔdwu mekɛ boni bieko? Menzi bɛ nwo abotane mengɔndwu kenle nzu bieko? Bɛva ye bɛrɛlɛ me wɔ ɛke." 18 Akee Gyisɛse deanle abɔnsam ne mɔɔ wɔ kakula nrenyia ne nu la nu, na ɔvile ye nu ɔhɔle. Na ɔvi zɔhane mekɛ ne anu kakula nrenyia ne dele kpɔkɛ bɔkɔɔ.

19 Nzinlii, ɛdoavolɛma ne mɔ bizale Gyisɛse wɔ ahanle kɛ, "Duzu ati a yɛmɛ yɛangola yɛandu sunsum ɛtane ne yɛanvi ye nu a?"

20 Gyisɛse buale bɛ kɛ, "Bɛ diedi le ekyi la ati ɔ. Ɔluakɛ saa bɛlɛ diedi mɔɔ ye kpole bɔbɔ le kɛ dubinli ma la a, anrɛɛ bɛbahola bɛaze boka ɛhye kɛ, ‘Tu fi ɛkɛ kɔ nehane!’ na anrɛɛ ɔbadu noko, na debie biala ɛyɛlɛ ɛnrɛbo bɛ nwo zo. 21 Na sunsum ɛtane ɛhye ɛnrɛdu ɛlɛ kyesɛ ɔlua nzɛlɛlɛ nee ɛhɔnehyelɛ zo."

22,23 Kenle ko bie mɔɔ ɛnee bɛtɛbɔ Galeli la, Gyisɛse zele ye ɛdoavolɛma ne mɔ kɛ, "Bɛbaye me bɛamaa menli mɔɔ bahu me la, na ye kenle nsa ne azo mebadwazo meara ngoane nu bieko." Ye ɛdoavolɛma ne mɔ lile nyane totohyia wɔ bɛ ahonle ne mɔ anu.

24 Mɔɔ bɛdwule Kapɛnayɛm la, Asɔne Sua Kpole ne anu adwuledievoma ne mɔ rale Pita anwo ɛkɛ ne na bɛbizale ye kɛ, "Ɛ menle ɛndua adwule anzɛɛ?"

25 Pita buale bɛ kɛ, "Nɔhalɛ, ɔtua." Akee Pita hɔle sua ne anu kɛ ɔkaha yeahile Gyisɛse, mɔɔ fale ɛhye anwo la, na yeambuke ɔ nloa bɔbɔ yɛɛ Gyisɛse bizale ye ɛhye a: "Pita, kɛ wɔ adwenle se wɔ a? Nwane mɔ lɔ yɛɛ azɛlɛ ye azo arelemgbunli dielie bɛ maanle adwule fi a? Wɔ bɛ ezuavolɛ ɛkɛ, anzɛɛ wɔ maanle mɔɔ bɛho bɛva bɛ la nyɛvolɛ ɛkɛ ɔ?"

26,27 Pita buale ye kɛ, "Nyɛvolɛ ne mɔ ɛkɛ ne ɔ." Gyisɛse zele kɛ, "Saa zɔhane a ɔde a, ɛnee ezuavolɛ ne lɛ fanwodi! Noko akee kɛmɔ yɛngulo kɛ yɛkɛha bɛ la ati, kɔ nyevile ne anloa lɔ na kɔdo koba, na buke fɛlɛ ne mɔɔ ɛbalumua wɔahye ye la anloa anu, na ɛbanwu ezukoa mɔɔ sa yɛ mu nwiɔ yɛ adwule ne tua la. Fa kɔ na kɔdua maa bɛ."