1 Melɛ ne anu ɛdoavolema ne mɔ rale Gyisɛse anwo ɛkɛ ne rabizale ye kɛ: "Nwane a le kpole wɔ Anwuma belemgbunli maanle ne anu a?"

2 Gyisɛse vɛlɛle kakula ekyi ko ɔmaanle ɔradɛnlanle bɛ avinli 3 na ɔzele kɛ, "Kyesɛ bɛgyakyi bɛ ɛtane ne mɔ na bɛtoa Nana Nyamenle abo zo na bɛyɛ bɛ nwo kɛ ngakula la, yemɔ anrɛɛ bɛnrɛhɔ Anwuma belemgbunli maanle ne anu ɛlɛ. 4 Ɛhye ati awie biala mɔɔ kɛbɛlɛ ɔ nwo aze kɛ kakula ɛhye la, yemɔ a le kpole wɔ Anwuma belemgbunli maanle ne anu a. 5 Na bɛ nuhua ko biala noko mɔɔ kɛlie kakula mɔɔ le kɛ ɛhye la awawatuu wɔ me duma nu la ɛnee yelie medame mumua ne. 6 Na saa bɛ nuhua ko biala maa ngakula ɛhye mɔ mɔɔ die me di la nuhua biala minli ye diedi a, ɔbayɛ kpalɛ kɛ bɛkɛva ɛdibolɛ kpole bɛkɛkyekye ɔ kɔme na bɛkɛvuandi ye bɛkɛdo ye nyevile kunlu.

7 "Munzule ɛha ewiade, ɔlua ye ɛtane bebelebe ɛhye mɔ ati. Ngyegyelɛ mɔɔ fa bɛ kɔ ɛtane nu la bara, na munzule ɛha sonla ne mɔɔ kɛmaa zɛhae ngyegyelɛ ne kɛra la. 8 Ɛhye ati saa ɛ sa anzɛɛ ɛ gyakɛ maa ɛyɛ ɛtane a, pɛ ye to ye lɔ. Ɔluakɛ ɔle kpalɛ kɛ ɛkɛva ɛ gyakɛ nee ɛ sa azinli ɛkɛhɔ anwuma maanle ne anu, tɛla kɛ ɛkɛva ɛ gyakɛ nee ɛ sa amuala ɛkɛhɔ abɔnsam sua zo la. 9 Yɛɛ saa ɛ nye maa ɛyɛ ɛtane a, tu ye to ye lɔ. Ɔle kpalɛ kɛ ɛkɛva ɛ nye ko ɛkɛhɔ anwuma maanle ne anu, tɛla kɛ ɛkɛva ɛ nye amu nwiɔ ɛkɛhɔ na bɛkɛvuandi wɔ bɛkɛdo Abɔnsam sua zo sendɔlɛra ne anu la. 10 Bɛnlea boɛ na bɛanvo ngakula ngyikyi ɛhye mɔ anu ko bɔbɔ. Na mese bɛ nɔhalɛ nu kɛ, wɔ anwuma maanle ne anu ɛhye mɔ bɛ anwumabɔvolɛma ne mɔ a lɛ adenle dahuu wolo Egya a. 11 Na Mame, Ngoanedievolɛ ne, membale kɛ mebalie menli mɔɔ bɛminli la ngoane.

12 "Saa sonla lɛ mboane ɛya ko, na nuhua ko bɔbɔ minli a, duzu a ɔbayɛ a? Asoo ɔnrɛgyakyi abulahɔnla nee ngɔnla ne, na ɔnrɛhɔ awoka ne azo kɛ ɔkakpondɛ nuhua ko ne mɔɔ yeminli la ɔ? 13 Na saa ɔnwu ye a ɔdi nwolɛ fɛlɛko kpole kpalɛ ɔtɛla abulahɔnla nee ngɔnla ne mɔɔ bɛamminli la. 14 Zɔhane ala yɛɛ ɔnle Egya ɛhulolɛdeɛ kɛ ngakula ɛhye mɔ anu ko bɔbɔ kɛminli a.

15 "Saa ɛ diema nrenyia yɛ ɛtane tia wɔ a, kɔ ɔ nwo ɛkɛ ne fealera nu na fa ye ɛtane ne to ɔ nyunlu. Saa ɔtie na ɔdi nyane wɔ ye ɛtane ne anwo a, ɛnee ɛ sa ɛha ɛ diema ne. 16 Na saa yeamkponle a, ɛnee fa sonla ko anzɛɛ menli nwiɔ boka ɛ nwo na sia kɔ ɔ nwo ɛkɛ ne bieko, na kile edwɛkɛ ne anu kile alasevolɛ ɛhye mɔ. 17 Saa mɔɔ ɔka la ala a ɔka, anzɛɛ saa yeamkponle kɛ ɔkɛdie a, ɛnee fa wɔ edwɛkɛ ne kɔdo asɔnema ne anyunlu, na saa asɔnema ne bua edwɛkɛ ne na ɛdi benle, na ɔ nee wɔ ɛnrɛyɛ adwenle a, ɛnee akee asɔnema ne ɛye ye ɛvi bɛ avinli. 18 Na mese bɛ kɛ debie biala mɔɔ bɛkɛkyekye ye wɔ azɛlɛ ye azo la ɛnee bɛkyekye ye wɔ anwuma; yɛɛ debie biala mɔɔ bɛkɛtulu nu wɔ azɛlɛ ye azo la, ɛnee bɛtulu nu wɔ anwuma lɔ noko.

19 "Mese bɛ bieko kɛ, saa menli nwiɔ yɛ ko wɔ azɛlɛ ye azo mɔɔ fale debie ɛbizalɛ nwo la a, Egya mɔɔ wɔ anwuma la bayɛ amaa bɛ. 20 Ɔluakɛ, ɛleka mɔɔ menli nwiɔ anzɛɛ nsa kɛyia nu wɔ me duma nu ti la, mebada ɛkɛ ne wɔ bɛ avinli."

21 Akee Pita rale Gyisɛse anwo ɛkɛ ne na ɔbizale ye kɛ, "Yɛmenle, fane nyɛ yɛɛ menva adiema mɔɔ kɛvo me la ɛtane mengyɛ ye a? Fane nsuu ɔ?"

22 Gyisɛse buale ye kɛ, "Kyɛkyɛ! Fane abulasuu mɔnwo nsuu!"

23 "Anwuma belemgbunli maanle ne le kɛ belemgbunli bie mɔɔ zuzule kɛ ɔbu ye mgbonda pɛpɛ pɛpɛ la. 24 Ɔlua ɛhye azo bɛ nee ye kakɛtuavoma ne mɔ ko mɔɔ tua ye kakɛ pɔne mgbe nsa la rɛlɛle ye. 25 Kɛmɔ yeangola ye tua la ati, belemgbunli ne zele kɛ bɛdɔne ɔdaye mumua ne, nee ɔ ye nee ɔ mra, nee debie biala mɔɔ ɔle ye la na bɛva bɛdua ye kakɛ ne.

26 "Na nrenyia ne hotole wɔ belemgbunli ne anyunlu, na ɔbɔle ɔ ti aze, na ɔkpale kyɛlɛ ɔzele kɛ, ‘Yɛmenle, nyia me nwo abotane, na mebadua ye kosooti.’

27 "Akee belemgbunli ne nwunle ye anwunvɔne, ɔdwulale ye na ɔvale ye kakɛ ne kosooti ɔhyɛle ye.

28 "Na mɔɔ nrenyia ne vile belemgbunli ne ɛkɛ ne vindele la, ɔ nee nrenyia bie mɔɔ tua ye kakɛ pɔne ɛya nsuu la yiale; ɔzɔle ɔ kominza na ɔzele ye kɛ ɔdua ye kakɛ ne ɛkɛ ne ala ɔmaa ye.

29 "Na nrenyia ne hotole ɔ nyunlu ɛkɛ ne na ɔbodole ye ɔzele ye kɛ ɔmaa ye mekɛ ekyii. Ɔbodole ɔzele ye kɛ, ‘Nyia abotane, na mebadua meamaa wɔ.’

30 "Na ye kakɛdavo ne amkponle. Ɔmaanle bɛhyele nrenyia ne na bɛdole ye efiade kɔkpula mekɛ mɔɔ ɔkɛwie ye kakɛ ne amuala tua la.

31 "Mɔɔ nrenyia ne agɔnwo mɔ nwunle mɔɔ ɛzi la bɛhɔdoanle ye bɛhilele bɛ menle ne, 32 na belemgbunli ne vɛlɛle nrenyia ne mɔɔ yeva ye kakɛ ne yehyɛ ye la na ɔzele ye kɛ, ‘Wɔmɔ sonvolɛ atiakunlutane! Menvale wɔ kakɛ kpole ne mengyɛle wɔ, ɔboalekɛ, ɛkpale me kyɛlɛ. 33 Duzu ati a wɔmɔ wɔannwu ɛ gɔnwo mɔ anwunvɔne, kɛmɔ mame menwunle wɔ anwunvɔne la ɛ?’

34 "Akee belemgbunli ne nyianle ɛya na ɔvale nrenyia ne ɔhɔdole ye efiade kɔkpula mekɛ mɔɔ ɔkɛhola ɔkɛdua kakɛ ne amuala la. 35 Na nɔhalɛ, mese bɛ kɛ, zɔhane ala noko yɛɛ Egya mɔɔ wɔ anwuma la bayɛ amaa bɛ nuhua ko biala mɔɔ yeanva ɔ diema ɛtane yeangyɛ ye wɔ ye ahonle nu la."