Mateus 21

Gyisɛse ɛvo Gyɛlusalɛm

1 Mɔɔ Gyisɛse nee ye ɛdoavolɛma ne mɔ bikyele Gyɛlusalɛm, na bɛdwule Bɛtefagye sua ne mɔɔ wɔ Boka Ɔlivi ne azo la, ɔzoanle ye ɛdoavolɛma ne mɔ anu nwiɔ wɔ namule ne mɔɔ wɔ bɛ nyunlu nehane la azo.

2 Ɔzele bɛ kɛ "Mɔɔ ɔka ekyii na bɛadwu sua ne azo la, bɛbanwu afunlumu mɔɔ bɛhenda ye la kɛ ɔ nee ɔ ra bɛgyi ɛkɛ ne. Bɛzanyi bɛ na bɛva bɛ bɛrɛle me. 3 Na saa awie biala biza bɛ nwolɛ edwɛkɛ a, bɛze kɛ, ‘Awulae hyia bɛ nwo,’ na edwɛkɛ biala noko ɛnrɛzi wɔ nwolɛ."

4 Bɛyɛle ɛhye amaa mɔɔ ngapezoma ne mɔ hanle dole ɛkɛ dɛbadɛba la ali munli kɛ, 5 "Bɛha bɛhile Zayɔn amra. Bɛnlea, bɛ belemgbunli ne ɛlɛba bɛ nwo ɛkɛ, ɔle mɛlɛbɛnwoazenli, na ɔde afunlumu, nee afunlumu mɔɔ soa debie la ralɛ anwo zo!"

6 Ɛdoavolɛma nwiɔ ne yɛle mɔɔ Gyisɛse hanle la, 7 na bɛvale nane ne mɔ bɛrɛlɛle ye, na bɛvale bɛ adɛladeɛ ne mɔ bɛguale afunlumu ralɛ ne azo kɛ ɔdɛnla zo ɔha. 8 Na bie mɔ noko mɔɔ wɔ menli dɔɔnwo ne anu la vale bɛ adɛladeɛ ne mɔ sesɛle adenle ne anu lumuale ɔ nyunlu, na bie mɔ noko bubule mrɛlakɛ nwɔhanle bɛ lumuale ɔ nyunlu.

9 Akee menli dɔɔnwo ne bie mɔ lile ɔ nzi, yɛɛ bie mɔ noko lile ɔ nyunlu, na bɛdeɛdeanle nu bɛzele kɛ, "Nana Nyamenle ɛyila Belemgbunli Devidi Ara ne!" "Bɛye ye ayɛlɛ!" "Nyamenle Sonla ɛra ɛke!" "Nyilalɛ ɛha Awulae!" "Nyilalɛ ɛha Nyamenle wɔ anwuma!"

10 Na mɔɔ ɔvole Gyɛlusalɛm la sua ne azo amuala yɛle begyebegye zɛhae. Na bɛbizale kɛ, "Nwane a le ɛhye?"

11 Na menli dɔɔnwo ne buale kɛ, "Kapezonli Gyisɛse, mɔɔ vi Nazalɛte mɔɔ wɔ Galeli la ɔ."