1 Mɔɔ Gyisɛse wiele ye edwɛkɛ ne mɔɔ ɔka yeahile ye ɛdoavolɛma ne mɔ ka la, ɔvale ɔzɔle zo kɛ,

2 "Kɛmɔ bɛdabɛ bɛze la, Akpabɛnwo ɛvoyia ne babɔ ɔ bo wɔ ɛhyema anzi, na bɛbaye me bɛamaa na bɛabɔ me meanubaka nu."

3 Mekɛ ko ne ala anu ɛnee azɛlɛvolɛ mgbanyima ne mɔ nee Dwuuma mgbanyima ne mɔ wɔ ayia wɔ Sɛlɛvolɛ Kpanyinli Kayafase aako nu, na 4 bɛlɛdwenledwenle adenle mɔɔ bɛdua nu a bɛ sa kɛha Gyisɛse bɛkɛhye ye fealera nu, na bɛkɛhu ye la. 5 Bɛliele bɛdole nu kɛ, bɛnrɛhye ye wɔ Akpabɛnwo ɛvoyia ne anu, ɔluakɛ anrɛɛ basabasa kɛzi.

6 Gyisɛse akee hɔle Bɛtani, na ɔhɔzokoɛle Saemɔn, kokobɛvolɛ ne sua nu. 7 Na melɛ mɔɔ ɔkpula ɔ sa la, raalɛ bie vale alufuanlɛ evuanlɛ bie mɔɔ wɔ toba nu na ye bolɛ yɛ se kpalɛ la rale, na ɔwolale ɔguale ɔ ti zo.

8,9 Ɛdoavolɛma ne mɔ nyianle ɛya. Na bɛzele kɛ, "Duzu ezukoa ɛzɛkyelɛ a le ɛhye? Duzu ati a yeandɔne ye yeannyia ezukoa kpole na yeanva yeammaa ehyiavolɛma a?"

10 Gyisɛse ze mɔɔ ɛnee bɛlɛdwenle nwolɛ a, na ɔzele kɛ, "Duzu ati a bɛmmaa raalɛ ye ɛnnyia ɔ nwo adenle a? Ɔluakɛ yeyɛ debie kpalɛ yemaa me. 11 Bɛmɛ bɛ nee ehyiavolɛma a de a, na Mame bɛ nee me ɛnde dahuu ne ala. 12 Yewola alufuanlɛ ɛhye yegua me nwo amaa yeaziezie me nwonane ne wɔ me ɛzielɛ nwo. 13 Na dahuu noko bɛbahakye ye wɔ deɛ ɛhye ati. Ɛleka biala mɔɔ bɛbabɔ Edwɛkpa ne nolo la bɛbaha deɛ ɛhye mɔɔ yeyɛ la anwo edwɛkɛ bɛahɔ maanle ti nee maanle bo."

14 Akee Dwudase Yesekaleɔto, mɔɔ le ɛdoavolɛma bulu nee nwiɔ ne mɔ anu ko la, hɔle azɛlɛvolɛ mgbanyima ne mɔ ɛkɛ hɔbizale bɛ kɛ, 15 "Saa meye Gyisɛse memaa bɛ a bɛkɛdua me ɛzɛ?" Na bɛmaanle ye dwɛtɛ fufule mralɛ abulasa. 16 Ɔvi zɔhane mekɛ ne anu, Dwudase kpondɛle adenle mɔɔ ɔdua nu a ɔ sa kɛha Gyisɛse ɔkɛye ye ɔkɛmaa bɛ la.

17 Wɔ kenle ne mɔɔ lumua wɔ Akpabɛnwo ɛvoyia ne anyunlu la anu, ɛdoavolɛma ne mɔ rale Gyisɛse anwo ɛkɛ ne rabizale ye kɛ, "Nienwu ɛleka a yɛbaziezie yɛ nwo na yɛali Akpabɛnwo ɛvoyia aleɛ ne a?"

18 Ɔbuale bɛ ɔzele kɛ, "Bɛhɔ suakpole ne azo bɛhɔnwu nrenyia bie, na bɛze ye kɛ, ‘Awulae se, ye mekɛ ɛdwu, ɔti ɔ nee ye ɛdoavolɛma ne mɔ barali bɛ Akpabɛnwo ɛvoyia aleɛ ne wɔ wɔ sua nu.’ " 19 Ɛhye ati ye ɛdoavolɛma ne mɔ yɛle mɔɔ ɔhanle ɔhilele bɛ la, na bɛbɔle bɛ aleɛ ne anwo mgbɔlɛka wɔ ɛkɛ.

20,21 Nɔsolɛ zɔhane ala mɔɔ ɔ nee Bulu Nee Nwiɔ ne bɛkpula bɛ sa la, ɔzele kɛ, "Bɛ nuhua ko baye me amaa."

22 Bɛlile nyane totohyia wɔ bɛ ahonle nu, na bɛ nuhua ko biala bizale kɛ, "Awulae, ɛnee mame ɔ?"

23 Ɔbuale kɛ, "Yemɔ a le ahenle ne mɔɔ me nee ye yɛmu nwiɔ yɛto ɛsalɛ ko wɔ ɛyɛba nu yɛdi aleɛ la. 24 Na kɛmɔ ngɛlɛlera ne se la, ɔwɔ kɛ mewu, na munzule ɛha ahenle ko ne mɔɔ ɔlua ɔ nwo zo bɛbaye me bɛamaa la. Ɔle kpalɛ kɛ anrɛɛ bɛanwo ye."

25 Dwudase, ɔdaye noko ɔbizale ye kɛ, "Rabbi, ɛnee mame a le ahenle ko ne ɔ?" Na Gyisɛse buale ye kɛ, "Ɛdawɔ mumua ne wɔha."

26 Na melɛ mɔɔ bɛdi aleɛ ne la, Gyisɛse vale kpanwo dolɔfo ekyi bie, na ɔyilale zolɛ na ɔbubule nu na ɔhyɛle ɔmaanle ye ɛdoavolɛma ne mɔ na ɔzele bɛ kɛ, "Bɛlie ɛhye na bɛli, ɔluakɛ, ɛhye a le me nwonane ne a."

27 Akee ɔvale nwanye kanrɛlɛ ko na ɔlale ase wɔ nwolɛ, ɔvale ɔmaanle bɛ na ɔzele kɛ, "Bɛ nuhua ko biala ɛnlo bie, 28 ɔluakɛ ɛhye a le me mogya ne a, na ɔsɔ Ngyehyɛlɛ Fofolɛ ne anloa a. Ɛhye a bɛbahwi bɛagua wɔ menli ɛtane ti a. 29 Bɛyɛ me edwɛkɛ agbɔkɛ ne mɔ nzonlɛ. Menrɛnlo nwanye ɛhye bieko kɔkpula mekɛ mɔɔ me nee bɛ yɛbanlo ye fofolɛ wɔ Me Ze Belemgbunli maanle ne anu la."

30 Na mɔɔ bɛdole edwɛne bɛwiele la bɛvindele bɛhɔle Boka Ɔlivi azo.

31 Akee Gyisɛse zele bɛ kɛ, "Nɔe bɛ muala bɛbakpo me. Ɔluakɛ, bɛhɛlɛle ye wɔ Nyamedwɛkɛ ne anu kɛ, Nana Nyamenle babɔ Boaneneavolɛ ne, na mboane ne mɔ babɔ asande. 32 Na saa mevi ewule nu medwazo meba ngoane nu bieko a, mebahɔ Galeli, na meayia bɛ wɔ ɛkɛ ne."

33 Pita zele kɛ, "Saa awie biala kɛkpo wɔ bɔbɔ a, mame menrɛyɛ."

34 Gyisɛse zele ye kɛ, "Nɔhalɛ ne a le kɛ, ɛnɛ nɔe ala, kolaa na akɔlɛ kabɔ aleɛbahye la, ɛnee wɔkpo me fane nsa!"

35 Pita eza zele ye kɛ, "Saa ɔba ye kɛ me nee wɔ kɛwu bɔbɔ a, menrɛkpo wɔ!" Na ɛdoavolɛma ne amuala bɛdabɛ bɛhanle zɔhane ala.

36 Akee Gyisɛse nee bɛ hɔle Gɛtesɛmani tola ne mɔɔ mbaka dɔɔnwo wɔ nu la anu, na ɔzele bɛ kɛ bɛdɛnla ɛkɛ ne bɛhendɛ ye na ɔkɔ ɔ nyunlu yeahɔzɛlɛ. 37 Ɔ nee Pita ne Zɛbɛdi amra mrenyia nwiɔ ne, Gyemise nee Dwɔn a bɛhɔle a. Na ɔbɔle ɔ bo ɔlile nyane totohyia wɔ ye ahonle nu na ye adwenle yɛle ye sesakaa bie.

38 Akee ɔzele bɛ kɛ, "Me ɛkɛla ne ɛlɛdi nyane nee alɔbɔlɛ ahɔ ewule nu bɔbɔ. Bɛdɛnla ɛke na bɛ nee me ɛzinza."

39 Ɔhɔle ɔ nyunlu ekyii, na ɔbutule ɔ nye aze na ɔzɛlɛle kɛ, "Egya! saa ɛyɛ na ɔkɛyɛ boɛ a, ɛnee maa bɔnyema dwora ɛhye ɛkpa me ti. Na saa ɔnrɛyɛ boɛ noko a ɛnee wɔ ɛhulolɛdeɛ ɛyɛ ɛkɛ."

40 Akee ɔziale ɔrale ɛdoavolɛma nsa ne mɔ anwo ɛkɛ, na ɔranwunle bɛ kɛ bɛdeda. Ɔvɛlɛle Pita na ɔbizale ye kɛ, "Ɔti wɔangola ɛ nee me anzinza dɔnehwele ko bɔbɔ ɔ? 41 Bɛzinza, na bɛzɛlɛ, ammaa bɛangɔ ngyegyelɛ nu. Ɔluakɛ; Sunsum ne kulo, na sonlabaka ne ala a ɛnlɛ anwosesebɛ a."

42 Ɔgyakyile bɛ ɛkɛ ne bieko ɔhɔzɛlɛle kɛ, "Egya! Saa bɔnyema dwora ɛhye ɛnrɛkpa me ti ɛdeɛ a, ɛnee wɔ ɛhulolɛdeɛ ɛyɛ ɛkɛ." 43 Ɔziale ɔrale bɛ nwo ɛkɛ ne bieko, na ɔradole bɛ kɛ bɛdeda, ɔluakɛ, ɛnee nafelɛ ɛzi bɛ nye soo, 44 ɛhye ati ɔhɔyɛle ye nzɛlɛlɛ ne mɔɔ tɔ, zo nsa ne la, na eza ɔhanle edwɛkɛ ko ne ala.

45 Akee ɔrale ɛdoavolɛma ne mɔ anwo ɛkɛ na ɔzele bɛ kɛ, "Bɛhɔ zo bɛlafe na bɛlie bɛ menle. Bɛnlea! Mekɛ ne ɛdwu! Bɛye Sonla Ra ne bɛwula ɛtanevolɛma asa anu. 46 Bɛdwazo! Bɛmaa yɛhɔ! Bɛnlea! Mɔɔ baye me amaa la a ɛlɛba la!"

47 Mekɛ ko ne ala mɔɔ ɛnee ɔ nloa wɔ zo ɔlɛtendɛ la, Dwudase, mɔɔ le Bulu Nee Nwiɔ ne anu ko la, nee menli dɔɔnwo bie mɔɔ Dwuuma mgbanyima ne mɔ zoanle bɛ na bɛdedɛ ahoholombaka nee dadeɛ la rale. 48 Dwudase zele bɛ kɛ bɛhye nrenyia ne mɔɔ ɔbabiza ye ahye la, ɔluakɛ yemɔ a le ahenle ne mɔɔ bɛkpondɛ ye la a. 49 Ɛhye ati Dwudase hɔle Gyisɛse anwo ɛkɛ ne ndɛndɛ ne ala na ɔzele kɛ, "Yɛmenle, akoaba!" na akee ɔvole ɔ nloa.

50 Gyisɛse zele ye kɛ, "Me gɔnwo, kɔ deɛ mɔɔ yemɔti ɛrale kɛ ɛbayɛ la azo ɛ." Akee bɛdabɛ mɔɔ bɛhale la noko tetale ye.

51 Menli mɔɔ ɛnee boka Gyisɛse anwo la ko hwenle ye dadeɛ ne na ɔpɛle Sɛlɛvolɛ Kpanyinli ne akɛlɛ ne mɔ ko anzo.

52 Na Gyisɛse zele ye kɛ, "Fa wɔ dadeɛ ne wula ye boa ne anu. Bɛdabɛ mɔɔ bɛtwe dadeɛ la bɛwu dadeɛ nloa. 53 Anzɛɛ bɛnze kɛ mekola mɛsɛlɛ Egya memaa ɔmaa anwumabɔvolɛma apenle apenle basinza me ɔ? 54 Noko akee saa meyɛ ɛhye a, kɛ ɔkɛzi ɔkɛyɛ na ngɛlɛlera ne ali munli ɛ?" 55 Akee Gyisɛse dendɛle hilele menli ɛwolaa ne. Ɔbizale bɛ kɛ, "Ɛnee bɛdwenle kɛ mele kodiawu anwo ɛzulolɛ bie ati a bɛdedɛ dadeɛ nee ahoholombaka bɛ sa nu kɛ bɛbahye me la ɔ? Me nee bɛ ɛdɛnla na mehilehile bɛ debie wɔ Asɔne Sua Kpole ne anu dahuu biala na bɛangye me. 56 Na ɛhye mɔ kosooti ɛlɛsisi amaa ngapezoma ne mɔ edwɛkɛ ne mɔɔ bɛhɛlɛle ye wɔ Nyamedwɛkɛ ne anu la ali munli." Mekɛ ɛhye anu, akee ɛdoavolɛma ne mɔ amuala kpole ye na bɛnriandinle bɛhɔle.

57 Ɛya kpole hunle menli ne mɔ mɔɔ bɛhyele ye la, na bɛ nee ye hɔle Kayafase, mɔɔ le Sɛlɛvolɛ Kpanyinli ne la sua nu, ɛleka mɔɔ ɛnee Dwuuma mgbanyima ne mɔ ɛhɔ ayia la. 58 Pita lile bɛ nzi nanamogya nanamogya na ɔhɔle Sɛlɛvolɛ Kpanyinli ne aako ne anu edwɛkɛlilɛ ɛleka ne na ɔhɔdɛnlanle aze wɔ sogyama ne mɔ anwo ɛkɛ, kɛ ɔnea debie mɔɔ bɛbava bɛayɛ Gyisɛse a.

59 Azɛlɛvolɛ mgbanyima ne mɔ nee Dwuuma edwɛkɛdivoma nee mɔɔ wɔ Kɔɔto totohyia ne anu amra ne yiale ɛkɛ ne, kɛ bɛkpondɛ alasevolɛ mɔɔ kɛli daselɛ adalɛ kɛtia Gyisɛse, amaa bɛeanyia edwɛkɛ mɔɔ kɛva ye kɛhɔ ewule nu la. 60,61 Na bɔbɔ, bɛnyianle menli dɔɔnwo mɔɔ kɛli daselɛ adalɛ zɛhae la ɛdeɛ, noko akee anloanzɛlɛ amba bɛ nu ɛkɛ wɔ bɛ daselɛlilɛ ne anu. Na nzinlii, bɛnyianle mrenyia nwiɔ bie mɔɔ zele kɛ, "Nrenyia ɛhye hanle kɛ, ‘Mekola mebubu Nana Nyamenle Asɔne Sua Kpole ne na mefa kenle nsa mesi ye fofolɛ.’ "

62 Akee Sɛlɛvolɛ Kpanyinli ne dwazole na ɔbizale Gyisɛse kɛ, "Duzu edwɛkɛ a ɛlɛ ye ɛka wɔ ɛhye anwo a? Hanle ye zɔ ɔ, anzɛɛ wɔanga ɔ?" 63 Na Gyisɛse ambuke ɔ nloa bɔbɔ. Akee Sɛlɛvolɛ Kpanyinli ne zele ye kɛ, "Wɔ damɛnlangoate Nyamenle ne duma nu, ka kile yɛ, saa amgba ala ɛse Ɛdawɔ a le Ngoanedievolɛ ne mɔɔ le Nana Nyamenle Ara ne a."

64 Gyisɛse buale ye kɛ "Ɛhɛe! Ɛdawɔ wɔha. Na mese wɔ kɛ, ɔvi ɛnɛ mɔɔ kɔ la, bɛbanwu Mame, Sonla Ra ne kɛ mede Nana Nyamenle asa fema zo, na melɛsia meara wɔ anwuma amungu ne mɔ anu."

65,66 Akee Sɛlɛvolɛ Kpanyinli ne suanle ye tɛladeɛ ne vile ɔ nwo na ɔdeanle nu kɛ, "Yeha munzule edwɛkɛ! Yɛngyia alasevolɛ nwo bieko. Bɛ muala bɛde mɔɔ yeha la! Kɛ bɛ adwenle se bɛ ɛ?" Bɛdeanle nu bɛzele kɛ, "Ɔfɛta ewule! Ɔfɛta ewule! Ɔfɛta ewule!"

67 Akee bɛtotole nyɛlɛ ɔ nyunlu na bɛzile ye abotokuma, na bie mɔ bɔle ɔ nzo nu, 68 na bɛzele kɛ, "Ka edwɛkɛ mɔɔ bazi la kile yɛ, wɔmɔ mɔɔ ɛle Ngoanedievolɛ la! Nwane a bɔle wɔ a?"

69 Na mɔɔ Pita de edwɛkɛlilɛ ɛleka ne la, kakula raalɛ bie rale ɛkɛ, na ɔzele ye kɛ, "Ɛdawɔ noko ɛnee Gyisɛse mɔɔ vi Galeli la a lua a."

70 Na Pita maanle ɔ ne zo, na ɛya nu ala ɔzele ye kɛ, "Mɔɔ ɛlɛka bɔbɔ la menze nwolɛ bie hweledede."

71 Nzinlii mɔɔ ɔvindele anlenkɛ ne anzi la, kakula raalɛ bieko nwunle ye, na ɔzele menli mɔɔ gyigyi ɛkɛ ne la kɛ, "Nrenyia ɛhye nee Gyisɛse mɔɔ vi Nazalɛte la a lua a."

72 Pita eza zale ɔ ne bieko, na ɔlile amonle ɔzele kɛ, "Menze nrenyia ɛhye bɔbɔ."

73 Na nzinlii mɔɔ mekɛ ekyii zenle la, menli mɔɔ gyigyi ɛkɛ ne la rale ɔ nwo ɛkɛ ne, na bɛzele ye kɛ, "Yɛze ye wienyi kɛ ɛle ye ɛdoavolɛma ne mɔ anu ko, ɔluakɛ wɔ ɛdendɛlɛ ne bɔbɔ kile."

74 Pita bɔle ɔ bo kɛ ɔwa amonle na ɔka ndane kɛ, "Menze nrenyia ɛhye bɔbɔ." Na ɛkɛ ne ala akɔlɛ bɔle. 75 Akee Pita hakyele Gyisɛse edwɛkɛ ne mɔɔ ɔhanle la kɛ, "Mɔɔ akɔlɛ kabɔ la, ɛnee wɔkpo me fane nsa." Na ɔvindele na ɔhɔzunle nyane ɛzunlɛ.