1 "Bɛnlea boɛ! Bɛmmayɛ bɛ atiakunlukɛnlɛma ne bagua nu, amaa bɛahanvo bɛ, ɔluakɛ anrɛɛ bɛ sa ɛnrɛha bɛ ahyɛlɛdeɛ ne biala bɛnrɛvi bɛ Ze ne mɔɔ wɔ anwuma la lɔ. 2 Saa ɛfa ahyɛlɛdeɛ ɛmaa sɛlɛzɛlɛvolɛ bie a, mmayɛ nwolɛ dede kɛmɔ mɛlɛbɛlavoma ne mɔ yɛ la, bɛbɔ aweɛne wɔ ayia ɛleka ne mɔ nee awɔlɔne ne mɔ azo bɛtwe menli adwenle bɛba bɛ atiakunlukpalɛyɛlɛ ne azo! Nɔhalɛ nu meka meahile bɛ kɛ, bɛ sa ɛha ahatualɛ biala mɔɔ anrɛɛ bɛkɛnyia ye kenle bie la. 3 Na emomu saa ɛyɛ atiakunlukɛnlɛma wɔamaa awie a, yɛ ye fealera nu, na mmamaa ɛ sa bɛne ne bɔbɔ nwu deɛ mɔɔ ɛ sa fema ne ɛlɛyɛ la. 4 Na ɛ Ze ne mɔɔ ze fealera nu edwɛkɛ biala la badua wɔ kakɛ wɔ nwolɛ wɔ bagua nu.

5 "Mɔɔ fale nzɛlɛlɛ nwo la ɛne. Saa bɛyɛ asɔne a, bɛmmayɛ kɛmɔ mɛlɛbɛlavoma ne mɔ yɛ la, ɔluakɛ, bɛkulo kɛ bɛgyinla awɔlɔne ne mɔ anloa, nee ayiasua ne mɔ anu nee bagua nu bɛsɛlɛ, amaa awie biala ahola anwu bɛ. Nɔhalɛ nu, ɛhye a le ahatualɛ mɔɔ anrɛɛ bɛ sa kɛha ye la. 6 Na saa ɛyɛ asɔne a, ɛdawɔ ɛ ngomekye fi ɛlɔne ne anu te ɛ nwo, na to ɛ nwo anlenkɛ nu na yɛ wɔ nzɛlɛlɛ ne fealera nu kile ɛ Ze ne mɔɔ ze wɔ fealera nu edwɛkɛ la, na ɛ sa baha wɔ ahatualɛ ne.

7,8 "Mmafunla nzɛlɛlɛ ko ne ala anu fane dɔɔnwo kɛmɔ maanle gyɛne nu amra mɛlɛbɛlavoma ne mɔ yɛ ye la, ɔluakɛ bɛdwenle kɛ saa bɛsi nzɛlɛlɛ ko ne ala azo fane dɔɔnwo a yɛɛ bɛ sa ka bɛ mualɛ a. Kakye kɛ, ɛ Ze ne ze deɛ mɔɔ ɛhyia nwo la kofee, kolaa na ɛdawɔ mumua ne wɔabiza ye!

9 "Ɛhye ati bɛnlea nzɛlɛlɛ ɛhye azo na bɛzɛlɛ: ‘Yɛ Ze mɔɔ wɔ anwuma, yɛyeyɛ wɔ duma nwuanzanwuanza ne. 10 Yɛsɛlɛ kɛ, wɔ Belemgbunlililɛ ne ɛrɛla. Maa wɔ ɛhulolɛdeɛ ɛyɛ ɛkɛ wɔ azɛlɛ ye azo, kɛmɔ bɛyɛ ye wɔ anwuma lɔ la. 11 Maa yɛ ɛnɛ dahuu aleɛ kɛmɔ ɛyɛ ye dahuu biala la, 12 na fa yɛ ɛtane kyɛ yɛ, kɛmɔ yɛfa yɛkyɛ bɛdabɛ mɔɔ bɛyɛ ɛtane bɛtia yɛ la. 13 Mmafa yɛ ɛkɔ munzule nu, na ye yɛ fi Munzuvolɛ ne asa anu. Ɔyɛ ɛkɛ.’ 14,15 Saa ɛfa bɛdabɛ mɔɔ bɛfo wɔ la ɛtane ɛkyɛ bɛ a, ɛ Ze ne mɔɔ wɔ anwuma la ɔdaye noko ɔbava wɔ deɛ ne yeahyɛ wɔ; na saa wɔamkponle bɛ ɛtanefakyɛ deɛ ne azo a ɔdaye noko ɔnrɛva wɔ deɛ ne ɔnrɛhyɛ wɔ.

16 "Mɔɔ fale ɛhɔnehyelɛ nwo la noko ɛne. Saa ɛkye ɛhɔne wɔagyakyi wɔ aleɛ ɔlua sunsum nu gyimalilɛ bie ati a, mmayɛ ye bagua nu kɛmɔ maanle gyɛne nu amra mɛlɛbɛlavoma ne mɔ yɛ ye la, ɔluakɛ bɛmunlomunla bɛ nyunlu, na bɛbɔ mɔdenle kɛ bɛkɛyɛ bɛ nwo alɔbɔlɛ alɔbɔlɛ, na eza bɛnziezie bɛ nwo amaa menli ali nyane amaa bɛ. Nɔhalɛ nu, ɛhye a le ahatualɛ ala mɔɔ bɛ sa baha ye kenle bie la. 17 Na wɔmɔ saa ɛkye ɛhɔne a, siezie ɛ nwo kpalɛ, na wula tɛladeɛ kɛnlɛma, 18 ammaa awie biala annwu ɛ nzi kɛ ɛlɛkye ɛhɔne, kyesɛ ɛ Ze ne mɔɔ wɔ anwuma mɔɔ ze fealera nu edwɛkɛ biala la ala. Na Yemɔ a badua wɔ kakɛ a.

19 "Bɛmmafa agyapandeɛ biala bɛsie azɛlɛ ye azo ɛke mɔɔ nrɛlana nee nlɛtɛba kola sɛkye ye, na nwule noko kola kɔwua la. 20 Bɛkpondɛ agyapandeɛ ne bɛzie bɛ Anwuma Belemgbunli maanle ne anu na ɛkɛ ne yɛɛ bɛnrɛminli bɛ bolɛ mɔɔ bɛsonle la, na eza bɛ nwo kɛyɛ kɔlɔɔnwo kɛvi awulema asa anu a. 21 Na saa wɔ nvasoɛ kosooti wɔ Anwuma belemgbunli maanle ne anu a ɛnee wɔ ahonle ne ɔdaye ɔbawa ɛkɛ ne bie.

22 "Saa ɛ nye zo te wienyi a, wɔ ɛkɛla ne anwo bade saanwu. 23 Na saa adwenle ɛtane ɛtane nee atiakunluwɔzo ɛtane ɛtane ɛva ɛ nye a, ɛnee ɛde awozinli kabii kpalɛ nu wɔ sunsum nu!

24 "Awie biala ɛngola ɛnzonle menli nwiɔ: Nana Nyamenle nee ezukoa. Ɔluakɛ ɛbahyi ko na wɔahulo ɛhendeɛ ne, anzɛɛ, kɛ ɛbahulo ko na wɔahyi ko ne.

25 "Ɔti me folɛdulɛ a le kɛ: Bɛmmadwenle ninyɛne mɔɔ le kɛ aleɛ, nzule anzɛɛ nza, ezukoa nee ndanlɛ nwo. Ɔluakɛ bɛmɛ bɛlɛ ngoane nee nwonane dɛba, na bɛhyia ɛsesebɛ ɛsesebɛ kpole kpalɛ bɛtɛla aleɛ mɔɔ bɛbali nee ndanlɛ mɔɔ bɛbaheda la. 26 Bɛnlea anwomanyunlu nloma bɔbɔ! Bɛndwenle aleɛ mɔɔ bɛbali la anwo, bɛngyia kɛ bɛkɛlua anzɛɛ bɛkɛbu anzɛɛ bɛkɛzie aleɛ, ɔluakɛ bɛ Ze ne mɔɔ wɔ anwuma la a maa bɛ aleɛ a. Na bɛmɛ noko bɛ nwo lɛ nvasoɛ kpole kpalɛ wɔ ɔ nye zo tɛla nloma ne mɔ. 27 Na asoo bɛ adwenledwenle ɛhye mɔ kosooti bava dɔnehwele ko bɔbɔ azɔ bɛ ngoane zo ɔ?

28 "Na duzu ati a ɔwɔ kɛ bɛdwenle bɛ ndanlɛ nwo a? Bɛnlea ɛya nu silikoko ne mɔ bɔbɔ. Bɛndwenle bɛ deɛ ne anwo bɔbɔ. 29 Noko akee Belemgbunli Sɔlɔmɔn bɔbɔ, wɔ ye anyunlunyia kpole ne anu anziezie ɔ nwo kɛnlɛma nee bɛ anzɛ ɛlɛ. 30 Bɛmɛ mɔɔ bɛ diedi le ekyi a! Saa Nana Nyamenle nea felawɔse bɔbɔ mɔɔ fi ɛnɛ a ɛhyema ɛnee bɛnle ɛkɛ ne bieko la a, ɛnee duzu ati a ɔnrɛhola ɔnrɛnlea bɛdabɛ noko a?

31,32 "Ɛhye ati bɛmmadwenle aleɛ nee ndanlɛ dɔɔnwo ɛnyianlɛ nwo. Duzu ati a bɛyɛ bɛ nwo kɛ menli mɔɔ ɛnze Nana Nyamenle a? Ɔluakɛ bɛmɛ bɛdi fɛlɛko wɔ ninyɛne ɛhye mɔ anwo na bɛdwenle nwolɛ ɛsesebɛ noko kpalɛ. Na bɛ Ze ne mɔɔ wɔ anwuma la noko ze ye kofee kɛ bɛhyia ninyɛne ɛhye mɔ anwo. 33 Na saa bɛdumua bɛkpondɛ Ye belemgbunli maanle ne nee Ye tenleneyɛlɛ ne wɔ bɛ ɛbɛlabɔlɛ nu, na bɛtɛnla ahomeka nu kɛmɔ ɔkpondɛ kɛ bɛyɛ la a ɔbava ninyɛne ɛhye mɔ amuala yeamaa bɛ.

34 "Ɛhye ati bɛmmadwenle ɛhyema ɛdeɛ ne anwo, na mɔɔ bazi ɛhyema la wɔ Nyamenle sa nu. Dwenle ɛnɛ angome anwo na gyakyi ɛhyema.