Mateus 8

5,6 Mekɛ mɔɔ Gyisɛse dwule Kapɛnayɛm la, sogya kpanyinli bie rale na ɔrazɛlɛle ye kɛ ɔ nee ye ɛhɔ ye sua nu na ɔhɔyɛ ye sonvolɛ nrenyia ne mɔɔ ɛbubu ɛgua ɛkpa zo na anwofofolɛ ɛbɔ ye kpɔkɛ twe la ayile.

7 Gyisɛse kponlenle zo na ɔzele kɛ, "Wioo, mebara mearayɛ ye ayile."

8,9 Na sogya kpanyinli ne zele kɛ "Yɛmenle, menfɛta kɛ ɛkɛra me sua nu; yɛɛ ɔngyia kɛ ɛkɛra bɔbɔ. Saa ɛbagyinla ɛke bɔbɔ ala na wɔaha kɛ, ‘Te kpɔkɛ’ a, anrɛɛ me sonvolɛ ne anwo baza! Meze, ɔboalekɛ mele sonla mɔɔ melɛ tumi na mesie menli a, na saa mese ko kɛ, ‘Kɔ’ a, ɛnee yehɔ; yɛɛ mese bieko noko kɛ ‘Bɛla’ a ɛnee yera; na saa mese me akɛlɛ noko kɛ ‘Yɛ ɛhye anzɛɛ ɛyeka’ a, ɔyɛ. Ɔti meze kɛ ɛlɛ tumi mɔɔ ɛkola ɛka ɛkile ye anwodolɛ ne kɛ ɔhɔ a, ɔkɛhɔ a!" 10 Gyisɛse dele ɛhye la ɔyɛle ye azibɛnwo! Ɔhakyile ɔ nye wɔ menli ekpunli dɔɔnwo ne anwo na ɔzele bɛ kɛ, "Nɔhalɛ, metɛnwunle diedi mɔɔ le zɛhae la bie ɛlɛ wɔ Yizilayɛ maanle ye anu!

11 "Na mese bɛ kɛ, menli mɔɔ ɛmboka Dwuuma ekpunli ne anwo la dɔɔnwo mɔɔ le kɛ sogya kpanyinli ɛhye la vi ewiade anu ɛleka biala bara na bɛ nee Ebileham, Ayezeke nee Gyekɔbo adɛnla aze wɔ Anwuma belemgbunli maanle ne anu. 12 Na Yizilayɛma dɔɔnwo ne ala bɔbɔ mɔɔ bɛzieziele belemgbunli maanle ne bɛmaanle bɛ la, bɛbavuandi bɛ bɛagua alie nwo awozinli kpole ne anu wɔ ɛleka ne mɔɔ ɛzunlɛ nee awolɛyelɛ nee nyanelilɛ wɔ la."

13 Akee Gyisɛse zele sogya kpanyinli ne kɛ, "Kɔ. Wɔ diedi ne mɔɔ ɛnyianle ye la ɛyɛ zɔ!" Na kakula nrenyia ne anwo zale wɔ dɔnehwele ko ne ala anu.