1 Ekem Jisọs ọkpọñ Kapanọm onyuñ asaña oduk aka ñkañ usuk usuk ke adaña Judia ye ñkanñkuk edem edere akpa Jọdan. Ndien kpa nte esidide, kpukpru ini, otu owo ema edi ebine Enye, ñko kpa nte Enye esinamde, Enye ama ekpep mmọ ñkpọ.

2 Ndusuk mme mbon ñka mme Farisi ema edi ke idomo edibup Enye ete, "Nte enen owo ndisio ñwan esie ndo?"

3 Jisọs ama obup mmọ ete, "Nso ke Moses eketiñ abaña usio ndọ?"

4 Mmọ ema ebọrọ ete, "Moses ama enyime owo ndiwet ñwed usio ndọ, ñnyuñ nsio ñwan ndọ."

5 Jisọs ama ọdọhọ mmọ ete, "Okoto ke ntak ọkpọsọñ isọñesit mbufo akanam Moses ewet ibet oro. 6 Edi toto ke editọñọ, ke ini emi Abasi okobotde ñkpọ, Enye ama obot mmọ eren ye ñwan. 7 Anam ke ntak emi, eren owo eyekpọñ ete ye eka esie, onyuñ akadiana ye ñwan esie. 8 Ndien mmọ mbiba eyekabade edi obuk kiet, idighe aba owo iba, edi akabade edi kiet kpọt. 9 Ndien baba owo ndomokiet okudiañade se Abasi ama akadian."

10 Ke ini esisit ama ekebe, ke ini mmọ ekedude ke ufọk, mme mbet Esie ema efiak ebup Enye ebaña ñkpọ emi.

11 Enye ama ọbọrọ ete, "Owo ekededi emi osiode ñwan esie ndọ, onyuñ ọkọdọ ñwan efen, enye esin efibe ye enye. 12 Ndien edieke ñwan osiode ebe esie ndọ ndien afiak ọkọdọ eren owo efen, enye ñko esin efibe."

13 Mme owo ema eda nditọ ọwọñ esọk Jisọs man Enye ọdiọñ mmọ, edi mbet Esie ema ebin mmọ enyọñọ.

14 Edi ke adañaemi Jisọs okokutde se ikakade iso, Enye ama ayat esit ye mbet Esie, onyuñ ọdọhọ mmọ ete, "Eyak ñkpri nditọ etiene Mi, ekukpan mmọ, koro Obio Ubọñ Abasi enyene oruk owo nte mmọ. 15 Ke ofuri akpanikọ ke ndọhọ mbufo, nte owo ekededi emi esinde ndibọ Obio Ubọñ Abasi nte ekpri eyen, ididukke ke esit."

16 Ndien Enye okot ñkpri nditọ adian ke idem Esie, odori mmọ kiet kiet ubọk ke ibuot onyuñ ọdiọñ mmọ.

17 Nte Jisọs ọkọtọñọde isañ Esie, owo kiet ama efehe ebine Enye, onyuñ ọkọduọ ọtọñọ edọñ ke iso Esie ndien obup Enye ete, "Eti Andikpep, nso ke ndinam man ñnyene nsinsi uwem?"

18 Jisọs ama obup enye, "Nso idi ntak emi afo okotde Mi eti? ‘Baba owo ndomokiet ifọnke ke ebede Abasi ikpọñ ikpọñ. 19 Edi ọmọfiọk mme mbet emi, kuwot owo, kusin efibe, kuyip inọ, kusu nsu, kutuk owo, kpono Usọ ye uka.’ "

20 Owo oro ama ọbọrọ ete, "Mma nnenim kpukpru emi toto ke uyen mi."

21 Jisọs ama owuk enyin ese enye onyuñ enyene ima abaña enye, ndien ọdọhọ enye ete, "ñkpọ kiet anana fi. Ka kanyam kpukpru inyene fo nyuñ nọ mme ubuene okuk oro ndien afo eyenyene inyene ke Obio Ubọñ Abasi ndien di disaña ye Ami."

22 Ntem iso ama ọtuhọ owo emi, ndien enye adaha ọnyọñ ye mfuhọ koro enye edi owo emi ekenyenede ata ediwak inyene.

23 Jisọs ama ese akanade, onyuñ ọdọhọ mbet Esie ete, "Edisọñ adaña didie owo inyene ndiduk Obio Ubọñ Abasi!"

24 Ikọ emi ama akpa mmọ idem eti eti. Ntre ke Jisọs akafiak ọdọhọ mmọ ete, "ndima nditọ, ọsọñ adaña didie ọnọ mmọ emi ebuọtde idem ke inyene ndiduk ke Obio Ubọñ Abasi! 25 Edi mmem mmem ñkpọ ọnọ enañ ndisaña mbe ke odudu abiabon akan owo inyene ndiduk ke Obio Ubọñ Abasi."

26 Idem ama etetim akpa mme mbet, mmọ enyuñ ebup kiet eken ete, "Anie ndien ke edinyaña?"

27 Jisọs ama owuk enyin ese mmọ suñ-ñ ọdọhọ mmọ ete, "Ye owo, emi edi ata ọkpọsọñ ñkpọ, edi idighe ntre ye Abasi. Ye Abasi, kpukpru ñkpọ edi mmem mmem."

28 Ntem ke Pita ọkọtọñọ ndisiak kpukpru se enye ye mbet eken ekedahade ekpọñ. Pita ama ọdọhọ Enye ete, "Sese ñnyin ima ikpọñ kpukpru ñkpọ man itiene Fi."

29 Ndien Jisọs ama ọbọrọ enye ete, "Yak Mi nnam fi ọfiọk ete baba owo kiet ekededi emi ọkpọñde ñkpọ ekededi emi enye enyenede, ufọk ye nditọ eka iren, ye nditọ eka iban, ye eka ye ete, ye nditọ ọwọñ mme inyene, ke ntak ima eke enye amade Mi, ye Eti Mbuk, 30 iditreke ndibọ utib ikikie awak akan, kpa ke eyo emi, mme ufọk, nditọ ete iren ye eke iban, mme eka, nditọ ye mme isọñ, ndien ukọbọ eyediana do, ndien ke eyo emi edidide enye eyenyene nsinsi uwem. 31 Ediwak mmọ emi edide akpa idahaemi, eyedi akpatre, ndien mme akpatre eyedi akpa."

32 Mmọ ekedu ke usuñ uka Jerusalem, Jisọs ekebe iso ọnọ mmọ. Mme mbet ema edu ke ñkpaidem, ke ini mmọ emi eketienede ke edem ekeyọhọde ye ndik. Jisọs ama ọtọñọ ntak ada mbet Esie duopeba ọwọñọde ada, onyuñ emen kpukpru se iditibede inọ Enye ke Jerusalem etiñ ọnọ mmọ.

33 Enye ama ọdọhọ ete, "Ñnyin imọñ idọk ika Jerusalem, ndien, eyetap Eyen owo enọ mme ikpọ oku ye mme ekpep ibet. Mmọ eyebiere ikpe ñkpa enọ Enye, eyenyuñ esana Enye eyak enọ mbon emi midighe mme Ju." 34 Mmọ eyesak Enye, enyuñ ekọk Enye etap enyuñ emia Enye, enyuñ ewot Enye, edi ke ọyọhọ usen ita ama ebe, "Enye eyeset afiak odu uwem."

35 Ntem ke Jems ye Jọn nditọ Sebidi, ekebine Jisọs enyuñ ekedọhọ enye ete, "Andikpep, ñnyin iyom Fi anam eti ñkpọ ọnọ ñnyin."

36 Jisọs ama obup mmọ ete, "Nso ke eyom Mi nnam nnọ mbufo?"

37 Mmọ ema ebọrọ Enye ete, "Ke ini editiede ke ebekpo Fo, ke utibe Obio Ubọñ, nam ñnyin itie, owo kiet ke ubọk nnasia Fo ye kiet eken ke ubọk ufien."

38 Edi Jisọs ama ọdọhọ mmọ ete, "Mbufo ifiọkke se ebeñede! Nte mbufo emekeme ndiñwọñ utọ ndotndot ọkọb mfuhọ emi Ami ndiñwọñde? Mme ndina utọ babtisim ufen emi ami ñyomde ndina?"

39 Mmọ ema ebọro ete, "Ih, ñnyin imekeme!" Ndien Jisọs ama ọdọhọ mmọ ete, "Mbufo ke akpanikọ eyeñwọñ ke kọb emi eke ndiñwọñde enyuñ ena babtisim emi Ami nnade. 40 Edi Ami ñnyeneke unen ndimek mmọ emi editiede Mi ke ufien ye nnasia. Itie oro ana ọnọ mmọ emi ema ekememek enim." 41 Ke ini mbet eken ekekopde ebaña se Jems ye Jọn ekebupde Jisọs, mmọ ema eyat esit ye mmọ. 42 Ntre ke Jisọs okokot mmọ onyuñ ọdọhọ mmọ ete, "Nte mbufo ediọñọde, mme ndidem ye mme andikara ke isọñ ekara mmọ emi edude ke idak mmọ. 43 Edi ke otu mbufo, idighe ntre. Owo ekededi emi oyomde ndikara ke otu mbufo enyene ndidi asañautom mbufo. 44 Ndien owo ekededi emi oyomde ndikpon ñkan kpukpru owo, enyene ndikabade ndi ofin kpukpru owo. 45 Koro Eyen Owo ke idem Esie ikedighe man enam ñkpọ enọ Enye, edi man anam ñkpọ ọnọ mmọ efen, ọnọ uwem Esie ndifak kpukpru owo."

46 Mmọ ema ekesim Jeriko, ke esisit ini ama ekebe, nte mmọ ekekpọñde obio oro, akwa otu owo ema etiene Enye. Owo nnan kiet emi ekekerede Batimọs, eyen Timiọs eketie ke mben usuñ ebeñe ebeñe.

47 Ke ini Batimọs okokopde ete ke Jisọs emi otode Nasaret edi oro, enye ama ọtọñọ ndifiori, "Jisọs eyen Defid, tua mi mbọm."

48 Ndusuk mme owo ema eduat enye ete, "Kibi inua fo". Edi enye ama osuk aka iso ndifiori ọsọñ akan akpa ke ọkpọsọñ uyo, kubọk kubọk, "Afo eyen Defid tua mi mbọm!"

49 Ke ini Jisọs okokopde mfiori esie, Enye ama atuak ada do ke usuñ onyuñ ọdọhọ ete, "Ekot enye edi mi." Ntem ke mmọ ekekot owo nnan oro, ete, "Afo dahada di, Enye kokot fi," 50 Batimọs ama otop ọfọñidem esie enim, obumede adahada ke ukot esie onyuñ ebine Jisọs.

51 Jisọs ama obup enye ete, "Afo oyom Mi nam nso nnọ fi?" Owo nnan oro ama ọbọrọ ete, "Andikpep ñyom ndikut usuñ!" 52 Ndien Jisọs ama ọdọhọ enye ete, "ọfọn yak osu ọnọ fi, mbuọtidem fo amanyaña fi." Ndien ke ndo ndo oro, owo nnan oro ama okut usuñ, ndien enye ama etiene Jisọs.