1 Mmọ ema ewat ebe inyañ ekebehe ke ñkanñkuk Kerasenesi ke edem ñkpọdiọhọ mmọñ eken. 2 Jisọs okonyuñ ọsọsuhọ ke ubom, owo emi ọkọyọhọde ye ndedehe spirit ama ọwọrọ ke ikọt udi edi ndisobo ye Enye.

3 Owo emi okoduñ ke ikọt udi, ndien baba owo ndomokiet ikekemeke aba ndibọp enye, ukpọk ke ñkpọkọbi. 4 Esibọbọp enye ubọk ye ukot ediwak ini, edi enye esinyene ndibuñ ñkpọkọbi mme ebuka oro mbai mbai. Owo ikọduhọ emi ekekemede ndikan enye. 5 Ke kpukpru uwemeyo ye okoneyo enye okodu ndiyo nsaña ke ikọt udi ye ke mme enyọñ obot, kofiori ñkpo, onyuñ ada itiat emi ọsọpde ekpeñe idem esie ọnọ unan.

6 Ke ini enye akadade okut Jisọs ko nsan nsan, enye ama efehe ọkọduọ ke edọñ ke iso Esie.

7 Enye ama ofiori ke ọkpọsọñ uyo ete, "Nso ke afo enyene ndinam ye ami, Jisọs Eyen Abasi Ibom? Mmekpe fi ubọk ke enyiñ Abasi nte yak okutuhọde mi." 8 Enye eketiñ emi koro Jisọs ọkọdọhọde enye ete, "wọrọ enye ke idem afo idiọk spirit."

9 Jisọs ama obup enye ete, "Afo ekere didie?" Ndien owo oro ama ọbọrọ ete, "Udim" koro ediwak ñnyin isinede owo emi ke idem.

10 Ntem ke enye akakaiso ekpe Jisọs ubọk ete yak Enye okubin mmimọ osioño ke ñkanñkuk oro.

11 Idaha oro nte ñkpọ okosuk akade iso, ama odu ata akamba udim edi emi ekesuk ediade ñkpọ ke ñkañ obot obot. 12 Mme ndedehe spirit oro ema ebeñe Jisọs ete, "Dọñ ñnyin ikoduk ke idem mme edi."

13 Ndien Jisọs ama ọnọ mmọ edinyime. Ntem ke mme ndedehe spirit oro ekewọñọ ekpọñ owo oro enyuñ ekeduk mme edi oro ke idem, ndien ofuri udim edi oro ema efeñe esuhọde ebedeñ eduọñọ ke inyañ enyuñ ekpaña ke mmọñ.

14 Mme andibọk edi ema efeñe eka mme ñkpet ñkpet obio ye ñkanñkuk esie, enyuñ esuan mbuk nte mmọ ekefeñede, ndien kpukpru owo ema efeñe ewọñọ edi man edikut ikpọñ ke idem mmọ. 15 Ndien ikebighike akwa otu owo ema esop idem ke ebiet emi Jisọs okodude, edi mmọ ema ekut owo oro etiede do, esine ọfọñidem esie ukem ukem, onyuñ ọdiọñọ idem esie, (nte enyene ibuot eti owo) ndik ama anam mmọ eti eti. 16 Mbio emi ekekutde se iketibede ema eka iso ndibuk nnọ kpukpru owo se iketibede ye owo emi ọkọyọhọde ye ndedehe spirit, ye se iketibede ye udim edi ñko. 17 Ndien mmọ ema etọñọ ndikpe Jisọs ubọk ete yak enye ọnyọñ esie, ọkpọñ ñkanñkuk mmimọ. 18 Ntem ke Enye akafiak okoduk ubom. Ndien owo emi mme ndedehe spirit ekewọñọde ama ekpe Jisọs ubọk ete, yak enye ayak imọ itiene Enye inyọñ, 19 Jisọs ikenyimeke, edi ama ọdọhọ enye ete.

"Nyọñ ufọk bine ikọt mbufo ñnyuñ kasian mmọ utibe ñkpọ emi Abasi anamde ọnọ fi ye adaña nte Enye akatuade fi mbọm."

20 Ntre ke owo oro ọkọtọñọ ndisaña ñkanade mme obio duop emi ekedude ke ñkañ oro onyuñ asian kpukpru owo mme utibe ñkpọ emi Jisọs akanamde ọnọ enye, ndien idem ama akpa kpukpru owo emi ekekopde mbuk esie.

21 Edi ke Jisọs ama akawat ke ubom ebe aka edem ñkpọdiọhọ mmọñ eken, akwa otu owo ema eboho ekanare Enye ekuk ke mben mmọñ.

22 Kiet ke otu mme ada usuñ ke ufọk mbono mme Ju emi okodude do; emi ekekerede Jairọs ama edi, ediduọ Jisọs ke ukot. 23 Ekpe Enye ubọk ete anam eyen imọ añwan okop nsọñidem, koro enye ekpere ndikpa. Enye etiñ ye ọkpọsọñ esit mfuhọ ete, "Mbọk di, didori enye ubọk ke idem nyuñ nam enye odu uwem."

24 Jisọs ama asaña ye enye aka ndien otu owo ema etiene enye ke edem. 25 Ke otu mme owo oro, ñwan kiet ama odu emi ọkọdọñọde udọñọ uwọrọ iyip, ke ñkpọ nte isua duopeba. 26 Enye ama ọbọ ndutuhọ ke ediwak isua ke ubọk mme mbiaibọk, onyuñ akabade edi ubuene ke ntak edibiat ediwak okuk nnọ mmọ, edi ikọfọnke ye enye, utu ke oro eketetim ọdiọk. 27 Enye ama okop abaña kpukpru mme utibe idiọñọ emi Jisọs akanamde, ntre enye ama afaha oduk ebine Jisọs edem edem ke otu owo, onyuñ okotuk ọfọñidem Esie.

28 Koro enye ekekerede ke esit esie ete, "Mma ñkam ntotuk ọfọñidem Esie, ami ñyekop nsọñidem." 29 Ndien kpa ke idaha oro, akpaifet emi enye okotukde Enye ọfọñidem, uwọrọ iyip esie ama etre, ndien enye ama ọdiọñọ ete ke idem imọ ọsọñ.

30 Jisọs ama ọdiọñọ ini kiet ete ke odudu ukọk udọñọ ọwọrọ Imọ ke idem, ntre ke Enye ekese akanade otu owo onyuñ obup ete, "Anie otuk ọfọñidem Mi?"

31 Mme mbet Esie ema edọhọ ete, ofuri otu owo emi ke eda ekanade Fi ekuk ntem, ndien Afo obup ete, "Anie okotuk Mi."

32 Edi Jisọs ama aka iso ese akanade, ndikut owo emi okotukde Enye. 33 Eyen añwan emi ama otim ọfiọk se iketibede ye enye, ntre enye ama ọwọrọ edi ke ñnyekidem ye ndik onyuñ emen ofuri akpanikọ etiñ ọnọ Jisọs. 34 Ndien Jisọs asian enye ete, "Eyen añwan, mbuọtidem fo amanam fi okop nsọñidem, nyọñ ke emem, ñnyuñ bọ edikọk."

35 Nte Enye okosuk akade iso nditiñ ikọ ye enye, isuñutom ama oto ufọk Jairọs edisim ye etop ete ke mmọ ema ebiat ini ekaha ke eyen esie añwan ama akpa ndien inyeneke ntak ndomokiet emi Jisọs akpasañade ye enye aka ufọk esie idaha oro aba. 36 Edi Jisọs ikikereke ibaña se mmọ eketiñde, edi ama ọdọhọ Jairọs ete, "Kufehe ndik. Kam nim ke akpanikọ."

37 Ndien Jisọs anam otu owo etuak eda ndien iyakke baba owo ndomokiet etiene Enye eka ufọk Jairọs ibọhọke Pita ye Jems ye Jọn. 38 Ke ini mmọ ema ekesim ufọk Jairọs Jisọs ama okut ete ke kpukpru ñkpọ okodu ke ndutime ye ọkpọsọñ editua eyet ye ufiori ñkpo. 39 Enye ama oduk esit ufọk onyuñ obup mmọ ete, "Nsidi ntak kpukpru ntuaña ye uyom emi? Eyen añwan emi ikpahakpa, edi enye edede."

40 Mmọ ema esak Enye eti eti, edi Enye ọdọhọ kpukpru mmọ ewọñọ ke ufọk oro, ndien Enye ama ada ete ye eka ekpri eyen añwan oro ye mbet Esie ita, onyuñ oduk esit ubet emi eyenañwan oro akanade.

41 Enye ama omum enye ke ubọk onyuñ ọdọhọ ete. "Talita, Kumi," (emi ọwọrọde ete, "Ekpri eyen añwan ndọhọ fi nte dahada ke enyọñ"). 42 Enye ama adahada ini kiet onyuñ asaña akanade (enye ekedi enyen isua duopeba), idem ama akpa mme owo eti eti ke se iketibede emi. 43 Enye ama oduri mmọ utọñ ete yak ekunam owo ndomokiet ọdiọñọ abaña edinam emi, onyuñ ọnọ uyo ete yak enọ eyen oro udia adia.