1 Ke ata usen ubọk, mme ikpọ oku, ye mme ikpọ owo, ye mme andikpep ido ukpono Abasi mmọ ye ofuri esop Ayara Iwat mme Ju, ema esop idem ọtọ kiet enyuñ ediomi se mmọ enyenede ndinam. Mmọ ema ebiere ndinọ mbon ekọñ ekeda Jisọs ye ñkpọkọbi ke ubọk esọk Pailet ada ibuot ukara mbon Rom.

2 Pailet ama obup Enye ete, "Nte Afo edi Edidem mme Ju?" Jisọs ama ọbọrọ enye ete, "Ih, edi kpa nte afo ọdọhọde."

3 Mme ikpọ oku ema edori Jisọs ikọ ke ediwak mme nsio nsio ñkpọ. 4 Pailet ama afiak obup Enye ete, "Nte Afo uyomke ndibọrọ? Se adaña ediwak ñkpọ emi etiñde edian fi."

5 Edi Jisọs ikọbọrọke enye aba, emi ama anam Pailet odu ke ñkpaidem.

6 Ndien ekesidi edu unam ñkpọ Pailet ndisana owo ñkpọkọbi kiet ñyak nnọ mme Ju kpukpru isua ke ini usọrọ ube inyañ, oro edi, owo ñkpọkọbi kiet ekededi emi kpukpru owo ebeñede enye ete asana ayak. 7 Owo kiet ama odu ke otu mbon ñkpọkọbi ke ini oro emi ekekerede Barabas, emi ekebierede ikpe ñkpa enọ enye ye mbon efen ke ntak emi mmọ ekewotde owo.

8 Otu owo ema esaña etiene Pailet, enyuñ ekedọhọ enye ete, yak enye asana owo ñkpọkọbi kiet ayak nte esidide.

9 Pailet ama obup mmọ ete, "Nte emeyom mi nsana Edidem mme Ju ñyak nnọ mbufo?" 10 Koro enye ama ọdiọñọ ke idem esie ete ke okoto ke ntak ufup akanam mme ikpọ oku eyak Jisọs enọ imọ.

11 Edi ke nde emi, mme ikpọ oku ema etimede esit otu owo ete yak mmọ ebeñe Pailet ndisana Barabas ñyak utu ke esana Jisọs eyak.

12 Pailet ama obup mmọ ete, "Edieke nsanade Barabas ñyak, Eyom mi nnam nso ye owo emi ekotde Edidem mme Ju?"

13 Mmọ ema efiak efiori! Kọñ Enye ke Krọs!

14 Pailet ama obup mmọ ete, "Nso idi ntak? Nso idiọkñkpọ ke Enye anam? Mmọ ema eka iso efiori ete, Kọñ Enye ke Krọs."

15 Pailet ke ufehe enyin, ye ñko ke ndinem otu owo esit ama asana Barabas ye uwem ayak ọnọ mmọ. Ndien ke enye ama akamia Jisọs, ama asana Enye ayak ọnọ mmọ ekọñ ke Krọs.

16 Mbon ekọñ ema eda Jisọs eduk esit badik, oro edi okure ada ibuot ukara, enyuñ ekot kpukpru mbon ekọñ eken ete edi. 17 Mmọ ema esine enye ididuot ọfọñidem, enyuñ edọk anyanya ñkukim eyari Enye ke ibuot. 18 Ntem ke mmọ ekekọm, enyuñ eyomo Enye ete, "Itọñ uwem akpakam ọsọñ edidem mme Ju ke nsinsi." 19 Ndien mmọ ema eda eto emia Enye ke ibuot, enyuñ efiari Enye etap, ndien etọñọ edọñ ke nsahi enọ Enye ndikpono Enye.

20 Ke ini mmọ ema ekekpa mba ke edida Enye ntọ ndọk, ema esio Enye ididuot ọfọñidem, enyuñ efiak esine Enye ọfọñidem Esie, ndien eda Enye ewọrọ eka ndikọñ ke Krọs.

21 Ke usuñ, mmọ ema esobo owo emi ekekerede Saimọn, emi okotode akwa obio edi, ndien mmọ ema enyik enye ndibiom Krọs Jisọs. (Saimọn emi ekedi owo Sirin, ete Aleksanda ye Rufọs).

22 Ndien mmọ ema eda Jisọs ekesim ebiet emi ekerede Kọlkọta, emi ọwọrọde ebiet ñkpọkpọrọ. 23 Do, mmọ ema enọ Enye mmin emi ekebuakde idot idot ibọk, Enye ama esin ndibọ mmọ ññwọñ. 24 Ntem ke mmọ ekekọñ Enye ke eto, enyuñ esin afia ebaña ọfọñidem Esie man efiọk se owo kiet kiet enyenede ndida.

25 Ekedi ke ñkpọ nte ñkanika usukkiet usen ubọk ke ekekọñ Enye ke Krọs.

26 Ema enam obukpọk idiọñọ ke Krọs, ke enyọñ ibuot Esie, nditiñ idiọkñkpọ Esie. Ekewet ete:

"Edidem mme Ju".

27 Ema ekọñ mbon ñwo iba ñko kpa ke usen ubọk oro ke Krọs, kiet ke ubọk ufien, enyeken ke ubọk nnasia. 28 Ndien ntre ikọ ñwed Abasi ama osu, emi ekewetde ete, "Ema ebat Enye esin ke otu mme ndiọi owo."

29 Mmọ emi ekesañade ebe ema etop ibuot ke ido usọñenyin ebaña Jisọs ete, "Ha! Afo emi ekemede ndiwuri itie ukpono Abasi, ñnyuñ mbọp enye ke usen ita. 30 Ke emi nyaña idem fo, nyuñ kọñọde ke Krọs di-e."

31 Mme ikpọ oku ye mme ekpep ibet ñko ema etiene eda Enye etọ ndọk, ndien edọhọ ke otu mmọ ete, "Enye ọdiọñọ ndinyaña mbon eñwen edi ikemeke ndinyaña idem Esie?"

32 Yak Kraist emi, Edidem Isrel, ọsuhọde ke Krọs edi idaha emi ñnyin ikut, ndien ñnyin iyenim Enye ke akpanikọ. Mbio inọ iba emi ekekọñde ke Krọs ye Jisọs, ema enyuñ esọñọ enyin ye Enye ñko:

33 Ekem ke ñkpọ nte ufọt uwemeyo, ekim ama ofuk ofuri iso isọñ, ndien ebighi tutu osim ñkanika ita uwemeyo.

34 Ke ñkanika ita, Jisọs ama ofiori ke ọkpọsọñ uyo ete, "Elai, Elai, Lema Sabaktani?" Emi ọwọrọde "Abasi Mi, Abasi Mi, nsinam Afo ọkpọñde Mi?"

35 Ke ini ndusuk mme owo emi ekedade ekpere do ekekopde emi, mmọ ema edọhọ ete, "Ekpañ utọñ, Enye kokot Elaiya," 36 ntre ke owo mmọ kiet ekefehe akada kusa edebi ke ndot ndot mmin ndien otori ke eto emenede owuk Jisọs ke inua, ndien ọdọhọ ete, "Eyak ise mme Elaiya eyesuhọde edi edikọñọde Enye ke eto efep."

37 Ntem ke Jisọs akafiak ofiori ñkpo efen, ndien asana ukpọñ Esie ayak.

38 Ndien ikpehe esit itie ukpono Abasi ama asiaha ke mbak iba, ọtọñọde ke enyọñ tutu osim isọñ.

39 Ke ini etubom mbon ekọñ Rom emi akadade ekpere Krọs oro okokutde adaña nte Jisọs akayakde ukpọñ Esie enye ama ọdọhọ ete, "Ke akpanikọ, owo emi ekedi Eyen Abasi."

40 Ndusuk iban ema eda nsan nsan ese; oro edi Meri Makdalin, Meri (eka Jems) emi ekedide ekpri ye Josef ye Salome, ye mbon eñwen. 41 Mme iban emi eketiene Enye tọñọ ke Kalili, enyuñ enam ñkpọ enọ Enye. Ediwak iban efen emi eketienede Enye edi Jerusalem ema enyuñ etiene edu do ñko.

42 Ñkpọ emi eketibe ke usen emi esierede Sabat (usen ikọ Abasi mme Ju). Usen emi ekedi usen ntimidem. Anam kadaña emi ekekperede mbubreyo, 43 Josef emi ekotde Arimatia, owo kiet ke otu mme etie esop Ayara Iwat mme Ju (emi enye ke idem esie eketiede ebet Obio Ubọñ Abasi) ama oduk uko uko etiene Pailet onyuñ ekebeñe enye okpo Jisọs.

44 Pailet ama odu ke ñkpaidem ndikop ke Jisọs akpakpa, ke ntre enye ama ọdọñ ekekot etubom mbon ekọñ emi esede mbon ukpeme ndien obup enye mme ebighi Jisọs akakpa. 45 Kini Etubom ekọñ eketiñde ete ke edi akpanikọ, Pailet ama ọdọhọ Josef ete ke enye ekeme ndikimen okpo Esie.

46 Josef ama edep ata ediye mmem mmem ọfọñ, ndien ke ini enye ama ọkọkọñọde okpo Jisọs ke Krọs, enye ama awañ Enye ke ọfọñ oro, onyuñ obuk Enye ke udi emi ekebotde ke itiat, ndien enye akpat itiat eberi ke inua esie.

47 Meri Makdalin ye Meri eka Josef mmọdo ekeda ese, ema enyuñ ekut ebiet emi ekenimde Jisọs.