1 Jisọs ama afiak aka ufọk mbono mme Ju, ndien owo kiet emi ubọk esie akakpade ama odu do.

2 Sia ekedide ke usen Sabat mme asua Jisọs ema ekpeme Enye eti eti ndise mme Enye eyekọk ubọk owo oro. Edieke Enye anamde ntre mmọ ekpenyene isọñ ntak ndida ñkpe ikpe ye Enye.

3 Jisọs ama ọdọhọ owo oro ubọk esie akakpade ete, "Wọrọ da mi ke iso kpukpru owo." 4 Ntem ke Enye ọkọwọñọde enyin ese mme asua Esie, onyuñ obup mmọ ete, "Efe enen ke usen Sabat ndinam: ndinam eti mme ndinam idiọk, ndinyaña uwem mme ndibabiat uwem?" Edi mmọ ikọnọhọ Enye ibọrọ. 5 Enye ama ọwọñọde ese mmọ ke enyin iyaresit, koro ama abiak Enye eti eti ndikut nte mmọ enanade esit mbọm, do ke Enye ọkọdọhọ owo oro ete, "Neñede ubọk fo". Enye ama anam ntre, ndien ndo ndo oro ubọk esie ama enyene uwem, onyuñ eneñede

6 Mme Farisi ema ewọñọ, ndien etọñọ ediomi ye mbon ñka Erọd nte mmọ edisañade iwot Jisọs. 7 Jisọs ye mme mbet Esie ema ediañade ekpọñ mmọ eka mben akpa Kalili, ndien akwa otu owo emi eketode Kalili, ye Judia ema etiene Enye. 8 Ke mmọ ema ekekop kpukpru se Enye akakade iso ndinam, ata ediwak owo ema eto Jerusalem, Iduma ye nsañade nda Jọdan ye mme obio Taya ye Sidọn ebine Enye.

9 Ke ntak emi otu owo okokponde eti eti, Jisọs ama ọdọhọ mme mbet Esie enam ekpri ubom ekpere ọnọ imọ ndida ñwọrọ ñkpọñ otu owo edieke otu owo ọtọñọde ndifik imọ nsin. 10 Koro Enye ama ọkọk ediwak owo udọñọ, ndien mme mmọ emi edọñọde ke enuk akpan akpan ebine ndituk Enye.

11 Ini kiet ekededi emi mbon emi ndedehe spirit emumde ekekutde Enye, mmọ ekenyene ndiduọñọ ke isọñ enyuñ efiori ete, "Afo edi Eyen Abasi!" 12 Edi Enye ama ọsọñọ owuk mmọ ete ekuyarade owo emi Imọ idide.

13 Ke emi ama ekebe, Enye ama ọdọk aka ke enyọñ obot, onyuñ okot mmọ emi Enye ekemekde etiene Enye, ndien mmọ ema etiene Enye. 14 Enye ama emek owo duopeba osio ke otu mmọ ndidi mme nsaña Esie ofuri ini, ye ndinyuñ ñka ñkọkwọrọ ikọ, 15 ye ndinyene odudu ndibin mme ekpo nsioño mme owo ke idem.

16 Mme owo duopeba emi Enye ekemekde edi emi: Saimọn (emi Enye okosiode enyiñ Pita).

17 Jems ye eyen eka esie Jọn, nditọ Sebidi (Jisọs ama ọnọ mmọ enyiñ Boanakes, emi ọwọrọde nditọ obuma), 18 Andru, Filip, Batolomiu, Matiu, Tọmọs, Jems eyen Alfiọs, Tadiọs, Saimọn (owo ñka ukara emi eyomde ufọn obio mmọ).

19 Ye Judas Iskariọt emi akatabde Jisọs ọnọ ñkpa.

20 Jisọs ama ọnyọñ ufọk ndien otu owo emi eketọñọde ntak eboho ama okpon eti eti, anam Enye ye mbet Esie ikenyeneke ufañ ye ifet ndidia udia. 21 Ke ini oruk ye iman Esie ekekopde se ikakade iso emi, mmọ ema eka man ekeda Enye enyọñ ufọk, koro mmọ ekedọhọde ete, "Ibuot abiara Enye."

22 Edi mme andikpep ikọ Abasi mme Ju emi eketode Jerusalem edi ema etiñ ete, mfina Esie edi koro ndedehe spirit omumde Enye, edidem mme ndedehe spirit, oro edi ntak emi mme ndedehe spirit esukde ibuot enọ Enye.

23 Jisọs ama okot kpukpru mmọ obon ọtọ kiet onyuñ obup mmọ ke ñke emi kpukpru mmọ ekediọñọde ete, "Didie ke Setan ekeme ndibin Setan? 24 Obio ekededi emi abaharede ada añwana ye idem esie, ọyọduọ. 25 Ufọk emi ọyọhọde ye ufup, mme ubahade odude ke esit, owuri idem esie. 26 Ndien edieke Setan añwanade ye idem esie, didie ndien ke enye ekeme ndinam ñkpọ ndomokiet? Enye idikemeke ndisọñọ nda. 27 Ke akpanikọ owo baba kiet ikemeke ndiduk ufọk ọkpọsọñ owo ntañ ñkpọ esie, ibọhọke enye ebem iso omum ọkpọsọñ owo oro ọbọp ndien enye ekeme ndiduk ufọk odo ntañ ñkpọ esie. 28 Ke akpanikọ ke ndọhọ mbufo nte ke eyefen kpukpru idiọkñkpọ kiet ekededi enọ owo kpa ye editiñ ikọ isuñi ndian Mi. 29 Edi ama edi editiñ ikọ isuñi ndian Edisana Spirit ikemekekeme ndidahado nnọ owo oro; koro enye anamde nsinsi idiọkñkpọ."

30 Enye eketiñ ikọ emi ọnọ mmọ koro mmọ ekedọhọde ete ke Enye akanam kpukpru utibe idiọñọ Esie oto odudu Setan (utu ke mmọ ekpedọhọ ete ke oto ke odudu Edisana Spirit).

31 Ekem eka Jisọs, nditọ eka ye nditọ ete Esie iren ema edisim. Mmọ ekeda ke añwa ndien edọñ owo oduk okokot Enye. 32 Otu owo ema etie ekanade Jisọs, ndien mmọ ema edọhọ Enye ete, "Eka fo, nditọ ete ye nditọ eka fo iren mmọ ke añwa ke eyom fi."

33 Jisọs ama obup mmọ ete, "Anie edi eka mi? Mme anie edi nditọ ete ye nditọ eka mi iren? 34 Enye ama emenede enyin ese mme owo oro eketiede ekanade Enye onyuñ ọdọhọ ete, ‘Emi edi eka mi ye mme nditọ ete ye nditọ eka mi iren.’ 35 Owo kiet ekededi emi anamde se Abasi oyomde enye anam edi eyen ete mi eren, eyen eka mi añwan ye eka mi."