1 Mbon ñka mme Farisi ye ndusuk mme andikpep ibet emi eketode Jerusalem edi, ema eboho ekanade Jisọs. 2 Mmọ ema ekut ete ke ndusuk mme mbet Jisọs ikeyetke ubọk, oro edi ikimaha ndinam kpukpru se edu ukpono Abasi mme Ju eketemede ete enam mbemiso edia udia. 3 Koro mme Ju, akpanakpan mme Farisi ikemeke ndidia udia ke mmọ miyetke ubọk mmọ tutu osim ekuñ ubọk mmọ kpa nte edu eset mmọ okoyomde. 4 Ke ini mmọ esinyọñde urua edisim ufọk mmọ esinyene ndiyet ñkpọ ekededi emi mmọ edade enyọñ urua mbemiso mmọ edia. Emi edi kiet ke otu ediwak mme uwutñkpọ ye ewuhọ emi mmọ emumde ekama toto ke eset, ndien esuk eka iso enam oruk ñkpọ nte ediyet mme kọb, esio ye mme usan udia.

5 Ntre mme ada usuñ ukpono Abasi mme Ju ema ebup Jisọs ete, "Ntak edi nso emi mme mbet Fo mitieneke mme ñkani edu ukpono Abasi mme ete ete ñnyin-e? Koro mmọ ediade ñkpọ ke mmọ mibemke iso iyet ubọk."

6 Jisọs ama ọbọrọ mmọ ete, "Mbufo mbon mbubuk, oku Abasi Aisaya ama enen ke ini enye akasiakde Uduak Abasi abaña mbufo mme mbubik," kpa nte ekewetde ete, "Mbon emi ekpono mi ke ñkpọkinua mmọ, edi esit mmọ ada nsan nsan ọkpọñ Mi. 7 Mmọ ekpono mi ke ikpuikpu, koro ukpepñkpọ emi mmọ ekpepde edi mme item owo. 8 Koro mbufo etrede ndinim ata mbet Abasi, edi emum ido ukpono mbufo ekama." 9 Mbufo emenyene ediye usuñ emi esinde mbet Abasi, enyuñ edighi mmọ ke ikpat oto ke ntak edu ukpono Abasi mbufo.

10 Nte uwutñkpọ, Moses ama owuk mbufo ete, "kpono usọ ye uka," ndien owo ekededi emi etiñde idiọk ikọ adian ete mme eka esie, enye enyene ndikpa. 11 Edi mbufo edọhọ ete ke otim ọfọn owo nditre ndise ñkpọ mbaña ete ye eka esie emi minyeneke ñkpọ, ñnyuñ ndọhọ enye nte, "Mbọm, ñkemeke ndiñwam fi, koro mmemen se ñkpọnọde fi nnọ Abasi. 12 Ntem ke mbufo ebiat ibet Abasi oto ke mme ido eset emi mbufo enamde ọsọñọ ada. 13 Emenyuñ enam mme ediwak ñkpọ efen emi etiede ntem."

14 Ntem ke Jisọs ọkọtọñọ ntak okot otu owo ete edi onyuñ ọdọhọ mmọ ete, "kpukpru mbufo ekpañ utọñ, enyuñ etim efiọk se ñyomde nditiñ emi. 15 Baba ñkpọ kiet emi otodeto oduk owo idem ikemeke ndisabade owo, edi akam edi se itode owo ke idem iwọrọ asabade owo. 16 Ekpañ ndien utọñ edieke enyenede utọñ ndikop."

17 Ntem ke Enye ama akadaha okoduk ufọk man ọkpọñ otu owo, ndien mme mbet Esie ema ekebup Enye se ikọ emi Enye eketiñde ọwọrọde.

18 Enye ama obup mmọ ete, "Nte mbufo nde idiọñọke? Nte mbufo ikemeke ndikut ite ke se mbufo ediade ikemeke ndisabade ukpọñ mbufo. 19 Koro udia ikemeke ndituk esit mbufo, edi enye asaña ebe ke nsia ye akpa ke idibi mbufo." (Ke editiñ ntem, Enye ama ọdọhọ ete ke kpukpru udia esana).

20 Ndien Enye afiak adian do ete, "Edi se iwọrọde owo ke idem esabarede owo. 21 Koro mme ndiọi ekikere emi edide idiọk udọñ, inọ, uwot owo, use eto ke esit owo ewọñọ edi. 22 Ediyom ñkpọ emi enyenede mbon efen ye oburobut ido, ye abiaña ye obukpo ido ye efibe ye iseri ye ntañidem ye mme ndisime ido efen. 23 Kpukpru mme ndiọi ñkpọ emi eto owo ke idem ewọñọ; mmọ edi se isabarede mbufo enyuñ enam mbufo ekudot ndidi eke Abasi."

24 Ntem ke Enye ọkọkpọñ Kalili onyuñ adaha aka ke ñkanñkuk Taya ye Sidọn, ndien Enye ama oduk ke esit ufọk onyuñ añwana ndinam edidu Esie do edi ndibe, edi ikekemeke.

25 Kpa idaha oro ñwan emi ekpri eyen añwan esie emi ndedehe spirit okomumde ama ebine Jisọs. Koro enye ama okop abaña Jisọs ndien ke ntem, enye ama ediduọ Enye ke ukot. 26 Ñwan oro okoto Gris ke Sirofonisia, ndien enye ama ekpe Jisọs ubọk ete yak Enye edibin ndedehe spirit oro osio eyen imọ añwan ke idem.

27 Jisọs ama ọdọhọ enye ete, "Ke akpa ifet Ami ñnyene ndiñwam mbon ubon mme Ju. Ifọnke ndimen udia nditọ ntop nnọ mme ebua."

28 Enye ama ọbọrọ ete, "Oro edi ata akpanikọ ete, edi kpa idem nditọ ebua emi edude ke idak okpokoro ekeme ndinọ mmọ ndusuk mbeñe udia emi otode usan nditọ."

29 Jisọs ama ọbọrọ enye ete, "Afo omotim ọbọrọ ọfọn eti, ntem amanam mi nnam idem eyen fo ọsọñ; nyọñ ufọk, koro ndedehe spirit oro ọmọkpọñ enye."

30 Ndien ke ini enye ekesimde ufọk, ekpri eyen añwan esie do ana suñ-ñ ke ñkpana esie ndien ndedehe spirit ama ọwọrọ ọkpọñ enye.

31 Ke ọkpọñde Taya, Enye ama adaha aka Sidọn ndien afiak ọsuhọde ọnyọñ inyañ Kalili ke usuñ mme ikpọ obio duop eken. 32 Ema eda inan emi mikekemeke nditiñ ikọ ọfọn esọk Enye, ndien kpukpru owo ema ekpe Jisọs ubọk ete yak Enye odori enye ubọk ke idem onyuñ ọkọk enye udọñọ.

33 Jisọs ama ada enye adaha ọkpọñ otu owo ndien esin enye nnuen ubọk Esie ke utọñ, onyuñ afiari etap, (ndien ada etap oro) otuk edeme owo oro. 34 Ntem ke Enye ekemenerede enyin ese enyọñ ndien ye ndodobi nsiama, Enye ama ọdọhọ ete "sirerede". 35 Idaha oro owo oro ama ekeme ndikop ñnyuñ ntiñ ikọ nte ọfọnde.

36 Jisọs ama oduri otu owo utọñ ete mmọ ekuyak mbuk emi asuana, edi nte Enye okosuk akpakpan mmọ, ntre ke mbuk oro eketetim asuana. 37 Kpukpru mmọ emi ekekopde se iketibede ye Enye ema edu ke ọyọhọ ñkpaidem. Mmọ ema edọhọ ete se nte Enye akanamde kpukpru ñkpọ ọfọñ. Enye anam idem inan okop ikọ, imum onyuñ etiñ ikọ.