1 Inikiet efen, Jisọs ama ọtọñọ ndikpep ñkpọ ke mben ñkpọdiọhọ mmọñ Kalili. Otu owo emi ekebohode ekanade Enye ama okpon eti eti, anam Enye ama oduk ke ubom onyuñ ọsuhọde etetie. Ubom ama asaña ọwọrọ ọkpọñ mben ke ini otu owo ekedade ke obot ke mben mmọñ. 2 Enye ama ekpep mmọ ediwak ñkpọ ke ñke, ndien ke ukpepñkpọ Esie, Enye ama ọdọhọ mmọ ete:

3 "Ekpañ utọñ! Ọtọ iñwañ ama ọwọrọ aka ndisuan ñkpasip esie. 4 Nte enye akasuande ñkpasip ke iñwañ, ndusuk mmọ ema eduọñọ ke mben ọkpọusuñ ndien mme inuen enyọñ ema editañ mmọ eta. 5 Ndusuk ema eduọñọ ke isọñ itiat, ebiet emi ntan ekedide esisit. Mme ñkpasip oro ema etọñọ ndikọri usọp usọp koro ntan okodude enyọñ enyọñ. 6 Ndien ke ini utin akasiahade, ama ọfọp mmọ, ndien sia mme oruñ mmọ mikọsuhọkede iduk isọñ nte ekemde, mmọ ema eyemede ekpaña. 7 Ndusuk ñkpasip ema eduọñọ ke otu mme ñkukim emi ekekọride enyuñ efuk mmọ anam mmọ ikoñwumke mfri. 8 Edi ndusuk ñkpasip ema eduọñọ ke eti isọñ, mmọ ema etibe, ekọri enyuñ eñwum mfri. Ndusuk ikedip ye duop, ndusuk ata ye ndusuk eken utim ikie ikie. 9 Edieke mbufo enyenede utọñ, ekpañ utọñ."

10 Ke oro ama ekebe ke ini emi Enye okodude ikpọñ ye mbet Esie duopeba ye mme mmọ efen eken (ọdiọñọ Esie), mmọ ema ebup Enye ete, "Ñke Fo ọwọrọ nso?"

11 Enye ama etiñ ọnọ mmọ ete, emeyarade ndibe ñkpọ Obio Ubọñ enọ mbufo ndifiọk, edi ama edi mmọ emi minyeneke udeme ke Obio Ubọñ Abasi, etiñ kpukpru ñkpọ enọ ke ñke. 12 Man oto do mmọ ekpekaiso ese, edi ikemeke ndikut, enyuñ ekaiso ndikokop edi ifiọkke se ọwọrọde. Ke ebede oro, mmọ ekpewọñọde etiene Abasi, ndien ekpedahado enọ mmọ. 13 Ndien Jisọs ama obup mmọ ete, "Nte mbufo ifiọkke se ñke emi ọwọrọde? Didie ndien ke mbufo edifiọk se ñke kiet ekededi ọwọrọde?

14 Ọtọ iñwañ emi edi owo kiet ekededi emi emende Etop Abasi ọsọk mbon efen, osuk añwanade nditọ nti ñkpasip ke uwem mmọ.

15 Mben ọkpọusuñ emi ndusuk ñkpasip ekeduọñọde ada ọnọ esit ndusuk owo emi ekopde ikọ Abasi, ndien Setan edisioño kpukpru ikọ oro efep ke esit mmọ. 16 Isọñ itiat ada ọnọ esit mmọ emi ekopde ikọ Abasi enyuñ ebọ inikiet ye ata idaraesit. 17 Edi sia mmọ minyeneke oruñ, ebighi ke esisit ini. Ke ini mfina ye ukọbọ edide ke ntak ikọ oro, mmọ eduọ ekpọñ usuñ inikiet.

18 Isọñ ñkukim ada ọnọ esit mmọ emi ekpañde utọñ enọ Eti Etop Obio Ubọñ Abasi ndien ebọ. 19 Edi mfina uwem emi, ima inyene, ye udọñitọñ edinyene ediwak mme nsio nsio ñkpọ eken ekọri efuk ikọ Abasi, anam mmọ ikemeke ndiñwum mfri ndomokiet.

20 Edi eti isọñ ada ọnọ esit mmọ emi ekopde ikọ Abasi ndien eñwum ediwak mfri enọ Abasi ke itie edip ye duop ye itie ata mme edide idem itie ikie ke adaña nte eketọde enye ke esit mmọ." 21 Ndien Jisọs obup mmọ ete, "Nte owo ekeme ndidomo utueneikañ ñnyuñ mmen nsin ke edem abañ? Nte enye idimenke idori ke ñkpọ udori utueneikañ?

22 Koro eyeyarade kpukpru se idibede, enyuñ efuhọde kpukpru se ekefukde eda ewọrọ ke uñwana. 23 Edieke enyenede utọñ, ekop." 24 Enye ama onyuñ ọdọhọ mmọ ete, "Etim ekere eti eti se ekopde, koro kpa udomo emi edade edomo enọ mbon efen ke edida idomo inọ mbufo, akan idem nte mbufo ekedomode." 25 Ama edi enye emi enyenede, eyedian ediwak enọ enye enyuñ ebọ eto enye emi minyeneke se enye ekenyenede.

26 Enye ama onyuñ etiñ ete, "Obio Ubọñ Abasi etie nte ọtọ iñwañ emi asuande ñkpasip ke iñwañ esie. 27 Ndien enye adaha ọnyọñ ufọk esie ndien ke ñkpọ nte ediwak usen ama ekebe, ñkpasip oro etibe enyuñ ekọri edi ibọhọ uñwam ndomokiet ito enye. 28 Koro edi isọñ akanam ñkpasip oro ọkọri. Ebem iso etibe nsehe ikọñ, ndien editop idem, ndien ke akpatre mfri oro adat. 29 Akpa ifet emi mfri oro adatde, ọtọ iñwañ emen ofut esie ọtọñọ utom koro ini ukpeñe ekem."

30 Jisọs ama obup mmọ ete, "Nso ke ndikeme ndida ndomo Obio Ubọñ Abasi añwaña mbufo, mme nso oruk mbuk ñke ke ñkeme ndida ndomo nte Obio Ubọñ Abasi etiede man añwaña? 31 Enye etie nte ñkpasip eto emi ekotde mọstad, okposuk edi emi enye edide kiet ke otu mme ñkpasip emi ekpride akan, edi ke ini owo emende enye ọtọ ke isọñ, 32 enye ọkọri, onyuñ akabade edi akwa eto, emi okponde akan kpukpru mme eto, ye mme ikpọ ñkọk nte mme inuen enyọñ ekemede ndibọp efọk ñnyuñ nduñ ke esit."

33 Enye ama ada mme nsio nsio mbuk ñke efen ntre ekpep mme owo ñkpọ ediwak ini adaña nte mmọ ekekemede ndifiọk. 34 Enye esitiñ kpukpru ikọ ọnọ mmọ ke ñke. Edi kadaña emi Enye esidude ikpọñ, Enye esinyene ndinam mmọ efiọk se mbuk Esie ewọrọde.

35 Ke mbubreyo usen oro, Jisọs ama ọdọhọ mbet Esie ete, "Eyak ñnyin iwat ibe inyañ ika edem inyañ oko." 36 Ntre ke mmọ ekeda Enye kpasuk nte Enye eketiede ke ubom ndien etọñọ uwot isañ, ekpọñ otu owo ke edem (okposuk edi emi mme ubom efen eketienede mmọ ke edem); 37 Edi ikebighike ọkpọsọñ oyobio ama otibe. Ọkpọsọñ mbufut mmọñ ama ọtọñọ ndidaha ñnyuñ nduk esit ubom tutu mmọñ ekpere ndiyọhọ esit ubom ñnyuñ nnam enye osip ke inyañ ibom. 38 Jisọs akana ke etak ubom ede idap, odori ibuot ke udori ibuot. Ke ata esit ndik, mmọ ema eketuak enyuñ edemere Enye ke idap ete, "Eteufọk, nte Afo ukereke ete ke ñnyin imọñ itak ke inyañ?"

39 Ntem ke Enye akadahada asua ọnọ ofim onyuñ ọdọhọ inyañ ete, "Na suñ-ñ-ñ!" Ndien ofim ye inyañ edobo, oyobio ye mbufut mmọñ ñko edop ena.

40 Enye obup mbet Esie ete, "Nso idi ntak emi mbufo efehede ndik? Nte mbufo isuk inyeneke mbuọtidem ke idem Mi?"

41 Ndien kpukpru mmọ ema eyọhọ ye ọkpọsọñ ndik enyuñ etiñ ke otu mmọ ete, "Anie edi owo emi; emi kpa ofim ye mbufut inyañ ibom, ekopde uyo Esie?"