1 Ke usen ikọ Abasi mme Ju ama ekebe, Meri Makdalin ye Meri eka Jems ye Salome ema edep enem utebe aran man mmọ eda ekeyet ke okpo Jisọs. 2 Ke tughi tughi usen ubọk Ederi, mbemiso utin asiaha, mmọ ema emen aran oro eka ke udi. 3 Edi ke usuñ, mmọ ema ebup kiet eken ete, mme anie edikeme ndikpat ndodobi itiat oro nsio ke inua udi.

4 Edi kadaña emi mmọ ema ekesim do, mmọ ema emenede enyin ese enyuñ ekut ete ke ema ekpat ata ndodobi itiat oro efep, ndien ke inua udi akana iñwañ. 5 Ke mmọ ema ekesaña esim udi, mmọ ema ekut akparawa emi ekesinede afia ọfọñidem nte etiede ke mben ñkañ ubọk nnasia, lban emi ema ekop ọkpọsọñ ndik. 6 Edi enjel oro ama ọdọhọ mmọ ete, "Ekuyak idem akpa mbufo, mmọdiọñọ nte mbufo eyom Jisọs emi otode Nasaret, emi ekekọñde ke Krọs. Enye iduhọ mi, Enye ama eset ke ñkpa! Ese ebiet emi ekenimde Enye mi. 7 Idahaemi enyọñọ enyuñ eda etop emi eketiñ enọ mme mbet Esie ye Pita ñko. Enye eyebem mbufo iso aka Kalili. Mbufo eyekut Enye do, nte Enye ọkọdọhọde mbufo mbemiso Enye akpa."

8 Iban oro ema efeñe ekpọñ udi oto ke ọkpọsọñ ñnyekidem ye ñkpaidem, ndik ama anam mmọ tutu ikekemeke ndisioro uyo ntiñ ikọ nnọ owo ndomokiet.

9 Ke akpa usen ke urua, ke ini Jisọs ama ekeset ke ñkpa, Enye ama ebem iso ayarade idem Esie owut Meri Makdalin, ñwan emi Enye ekebinde ndiọi spirit itiaba osioño ke idem. 10 Enye ama okobuk ọnọ mmọ emi ekedude ye Jisọs. Kpukpru mmọ ekedu ke mfuhọ ye ntuaña. 11 Ke ini mmọ ekekopde ete ke Jisọs ama eset ke ñkpa, ñko ke Meri ama okut Enye, mmọ ikenimke ke akpanikọ.

12 Ke ñkpọ nte esisit ini ama ekebe kpa ke usen oro, Jisọs ama ayarade idem Esie ke usuñ efen, ọnọ owo iba emi eketode Jerusalem edi idut oro.

13 Edi ke mmọ ema ekediọñọ Enye ke akpatre, mmọ ema efiak efehe eka Jerusalem man eketiñ enọ mbon eken. Edi baba owo kiet ikenimke se mmọ eketiñde ke akpanikọ.

14 Ke akpatre ndien, Enye ama ayarade idem esie ọnọ mbet Esie duopekiet ke ini emi mmọ eketiede ọtọ kiet edia ñkpọ. Enye ama asua ọnọ mmọ ke unana mbuọtidem ye nsọñibuot mmọ ke editre ndinim ke akpanikọ se mme owo emi ekekutde Enye esetde ke ñkpa eketiñde.

15 Ndien ntem ke Enye ọkọdọhọ mmọ ete, "Mbufo enyene ndisaña nduk ofuri ererimbot, ñnyuñ ñkwọrọ Eti Mbuk nnọ kpukpru owo, ke kpukpru ebiet. 16 Mmọ emi enimde ke akpanikọ enyuñ enade babtisim, eyebọ edinyaña. Edi ama edi mmọ emi etrede ndinim ke akpanikọ eyebiere ikpe ñkpa enọ mmọ.

17 Ndien mme idiọñọ emi eyetiene mme andinim ke akpanikọ: mmọ eyebin ndiọi spirit esioño ke Enyiñ Mi, mmọ eyesem usem ke mme esen edeme. 18 Mmọ ñko eyekeme ndimum urukikọt edi ñkpọ idinamke mmọ, ekpeñwọñwọñ bọisin kiet ekededi, enye idinamke mmọ baba ñkpọ ndomokiet, ndien mmọ eyenyene odudu ndidori mbon udọñọ ubọk ke idem, ndien enam udọñọ mmọ okure."

19 Kini Ọbọñ Jisọs ama eketiñ ikọ ye mmọ ama, ema emen Enye edọk ke enyọñ ndien Enye ọkọsuhọde etie ke ubọk nnasia Abasi. 20 Ndien mme mbet Esie ema esaña ekanade kpukpru ebiet ekwọrọ ikọ Abasi, ndien Ọbọñ ama asaña ye mmọ onyuñ ọsọñọ se mmọ eketiñde ke edinam ediwak mme utibe ñkpọ ye mme idiọñọ.