1 Sia ediwak owo ema ekesin ubọk ndiwet mbuk mbaña kpukpru mme ñkpọ emi eketibede ke otu ñnyin, 2 ukem ukem nte ekeyakde enọ ñnyin eto ubọk mmọ oro ekedide mme akpa ntiense emi ekekutde kpukpru ñkpọ ke enyin mmọ, ekenyuñ edide mme andikwọrọ ikọ Abasi. 3 Ndien sia ami mma ñkọduñọde kpukpru ñkpọ suñsuñ ọtọñọde ke editọñọ, otim ọfọn ñko ami ndiwet nnen nnen mbuk oro nnọ fi, Odotukpono Tiofilọs, 4 man afo otim ọdiọñọ akpanikọ abaña mme ukpepñkpọ emi afo ọkọbọde.

5 Ke eyo Erọd edidem Judia, oku kiet ama odu emi ekekerede Sakaraya, emi okotode iduọk mme oku Abiya, ñwan esie ñko okoto ke ubon Erọn, emi ekedide ubon mme oku. Enyiñ esie ekedi Elisabet. 6 Sakaraya ye ñwan esie Elisabet ekedi mme ndinen owo ke iso Abasi, enyuñ enam kpukpru mme ewuhọ ye mme mbet Abasi, inyeneke ndo. 7 Edi mmọ ikenyeneke eyen koro Elisabet ekedi ada; mmọ ñko ema eka anyan ke isua emana.

8 Usen kiet, ke ini ikpehe utom mme Sakaraya ekenamde utom ke itie ukpono Abasi, enye ñko okonyuñ adade itie oku ke iso Abasi, 9 ema emek enye eto usin afia nte ido ubon ñkpọ mme oku esidide nte enye enyene ndiduk edisana ebiet Jihofa, ñnyuñ mfọp uwa (enem ufuọñ ñkpọ). 10 Ndien ke ini ufọp uwa enem ufuọñ ñkpọ ama ekekem, kpukpru mme mmọ emi ekedide ndituak ibuot ekebono ke añwa esien ebọñ akam.

11 Do ke enjel Abasi ọkọwọrọ enye ke iso ada ke ubọk nnasia ke itie ufọp uwa. 12 Ke ini emi Sakaraya okokutde enye, enye ama edighe, ndik ama onyuñ omum enye.

13 Edi enjel oro ama ọdọhọ enye ete, "Kufehe ndik, Sakaraya, ema ekop akam fo, ndien ñwan fo Elisabet eyeman eyen eren owo ọnọ fi, ndien afo enyene ndisio enye enyiñ Jọn. 14 Mbufo eyedara enyuñ ekop inemesit ke usen emana esie, ndien ediwak owo ñko eyedara ye mbufo. 15 Koro enye eyekpon ke iso Abasi. Enye inyeneke ndiñwọñ wain mme ọkpọsọñ mmin ekededi, ndien eyeyọhọ enye ye Edisana Spirit toto ke idibi eka esie. 16 Enye eyenyuñ ada ata ediwak nditọ Isrel afiak ọsọk Abasi mmọ. 17 Ndien enye eyebem Ọbọñ iso ke spirit ye odudu Elaiya, man enye ọwọñọde esit mme ete ọnọ nditọ, onyuñ akabarede mbon nsọñibuot anam mmọ esaña ke ifiọk ndinen owo, eyenyuñ enam mmọ emi edide eke Ọbọñ ebeñe idem ebet Enye."

18 "Didie ke ami ndiyuhọ nte eyedi ntre? Ami ndi akani owo, ñwan mi nde aka anyan ke isua."

19 Enjel ama ọbọrọ enye ete, "Ami ndi Kebrel emi ndade ke iso Abasi, ndien ekedọñ mi ndi nditiñ ikọ ye afo ñnyuñ nnọ fi eti mbuk emi. 20 Ndien ọtọñọde ke emi afo udusioroke aba uyo, ndien eyekabade edi imum tutu osim usen emi ñkpọ emi editibede, koro afo munimke mme ikọ mi ke akpanikọ, emi ediwọrọde isu ke ñkem ñkem ini mmọ."

21 Kaña ke ini emi, mme owo ke ekebebet Sakaraya ndiwọrọ ndi, ndien mmọ etọñọ ndiyo ke ekikere kabaña emi enye ekebighide ntre ke Edisana Ebiet (Temple). 22 Ke enye ama ọkọwọrọ edi, enye ikekemeke nditiñ ikọ ye mmọ, edi mmọ, ema ediọñọ eto ke usuñ nte enye akanamde ñkpọ, ete ke Enye ama okut ñkukut ke esit Edisana Ebiet, edi ikekemeke nditiñ. 23 Ke ini utom Esie ke Edisana Ebiet ama ekekure, enye ama ọnyọñ ufọk. 24 Ke emi ama ekebe, Elisabet añwan esie ama oyomo idibi, onyuñ odu ke esa ke ọfiọñ ition.

25 Enye ama ọdọhọ ete, "Abasi anam emi ọnọ mi, ke mme usen emi enye owut mi mbọm Esie onyuñ emen ñkpọ obut mi ke otu mme owo efep."

26 Ke ọyọhọ ọfiọñ itiokiet, Abasi ama ọdọñ kpasuk enjel Kebrel aka ke Nasaret, obio kiet ke Kalili, 27 ebine eyenọwọñ añwan emi akanam mikpereke erenowo emi ekeñwọñọde ndinọ owo emi ekerede Josef ke ndọ. Enyiñ eyen añwan oro ekedi Meri.

28 Enjel ama aka ebine enye onyuñ ọkọdọhọ Enye ete, "Mọkọm fi, afo emi Abasi amade eti eti! Abasi odu ye afo."

29 Mme ikọ Enjel emi ama etimede Meri esit eti eti. Enye ama onyuñ ekere abaña se uduot ekọm oro ọkpọwọrọde.

30 Edi Enjel ama ọdọhọ enye ete, "Kufehe ndik Meri, koro Abasi, enende iso ye afo. 31 Idibighike afo eyeyomo onyuñ aman eyen eren, ndien afo eyesio Enye enyiñ Jisọs. 32 Enye eyekpon eti eti ndien eyekot Enye eyen ñkoññkan Abasi. Ọbọñ Abasi eyenọ Enye ebekpo ubọñ Ete Esie Defid. 33 Ndien Enye eyekara ofuri ufọk Jekọb ke nsinsi; Obio Ubọñ Esie idinyuñ inyeneke utit."

34 Meri ama obup enjel ete, "Ami ndikeme didie ndinyene eyen ke ini ami ndide eyenọwọñ añwan, emi mendiọñọke erenowo kaña?"

35 Enjel ama ọbọrọ enye ete, "Edisana Spirit eyedoro fi ke idem. Ndien odudu Abasi eyeyama akanade fi okuk, ntre ke edikot edisana owo emi edimanade kpa Eyen Abasi. 36 Kpa ye idem Elisabet iman fo, eyenyene eyen ke ini usọñ esie, ndien kpa enye emi ekedọhọde ete ke edi ada odu ke idibi, ọyọhọ ọfiọñ itiokiet edi emi. 37 Koro, baba ñkpọ ndomokiet isọñke ke ubọk Abasi."

38 Meri ama ọbọrọ ete, "Ami ndi eyen utom Ọbọñ, yak edi ye ami kpa nte afo ama eketiñ." Do ke enjel okosop.

39 Ke ñkpọ nte usen ifañ ama ekebe, Meri ama adaha iwiwa aka ke ekpri obio kiet ke Judia, ndise Elisabet, 40 onyuñ oduk ke ufọk Sakaraya ndien ọkọm Elisabet.

41 Ke Elisabet ama okokop uyo ekọm Meri, nsekeyen ọfrọ enye ke itie nna eyen, ndien Elisabet ama ọyọhọ ye Edisana Spirit.

42 Elisabet ama ofiori ke ọkpọsọñ uyo ete, "Emediọñ fi ke otu mme iban, emenyuñ ediọñ eyen emi afo edimande. 43 Ami nsaña didie ñnyene utọ mfọniso emi, tutu eka Ọbọñ mi edi edem mi? 44 Ndo ndo emi uyo ekọm fo osimde mi, eyen emi esinede ke idibi mi ọfrọ ọnọ inemesit. 45 Ọfọfọn ọnọ eyen añwan emi onimde ke akpanikọ nte ke se Abasi eketiñde ọnọ enye eyewọrọ osu."

46 Ndien Meri ama ọdọhọ, ete,

"Ukpọñ mi otoro Ọbọñ,

47 Ndien spirit mi adara ke Abasi emi anyañade mi,

48 koro Enye ama otim ese

usuhọde itie ofin añwan Esie,

ọtọñọde ke emi kpukpru emana eyedọhọ ete, ọfọfọn ọnọ mi.

49 Koro Enye emi enyenede odudu akan, amanam ikpọ ñkpọ ọnọ mi;

Enyiñ Esie edi, Edisana.

50 Mbọm Esie ebe esim kpukpru emana

akpanakpan emana mmọ emi ebakde Enye.

51 Enye amanam mme ikpọ ñkpọ odudu ke ubọk Esie,

Enye onyuñ asuan mme mmọ emi etañde idem ke ekikere mmọ.

52 Enye odoñode mme ada ukara ke ebekpo mmọ efep

edi emenerede mbon nsuhọde idem ke enyọñ,

53 Enye onyuñ ọyuhọ mbon ọbiọñ ye mme nti ñkpọ,

edi enam mme enyene ñkpọ enyọñ ubọk ubọk,

54 Enye ama añwam ikọt Esie Isrel,

ke editi mbọm Esie

55 mbaña Ebraham ye ubon Esie ke nsinsi,

kpa nte Enye eketiñde ọnọ mme ete ete ñnyin."

56 Meri ama odu ye Elisabet ke ñkpọ nte ọfiọñ ita, ndien enye ọnyọñ ufọk.

57 Ke ini ama ekekem nte Elisabet aman akpa eyen esie, enye ama aman eyen eren owo. 58 Mme mbọhọiduñ ye mme iman esie ema ekop ete ke Abasi ama owut enye akwa mbọm, ndien mmọ ebuana ye enye ke ndidia idara.

59 Ke ini ekpri eyen emi ekesimde usen itiaita, kpukpru iman ye mme ufan esie edi man edinam usọrọ unim mbobi. Kpukpru mmọ ekeyom ndisio eyen emi enyiñ ndian Ete Esie Sakaraya.

60 Edi Elisabet eka esie ama ọdọhọ ete, "Baba; enyene ndikot enye Jọn." 61 Mmọ ema efaña ye enye ete, idughe baba owo ndomokiet ke ofuri ekpuk mbufo emi ekerede enyiñ oro. 62 Ntre ke mmọ ekenam idiọñọ enọ ete esie, ndidiọñọ se enye edimade ekot eyen esie.

63 Enye ama anam idiọñọ ọnọ mmọ ete eda ikpa ñwed esọk imọ: ndien ke ñkpaidem kpukpru owo, enye ama ewet ete, "Enyiñ esie edi Jọn". 64 Ndo ndo oro, inua esie ama okubọde, enyuñ edeme esie atara, ndien enye ama ọtọñọ nditiñ ikọ ñnyuñ ntoro Abasi. 65 Ndik ama omum kpukpru mme mbọhọiduñ esie, ndien ke ofuri obio obot Judia mme owo eketiñ ebaña kpa mme ñkpọ ntibe emi. 66 Ndien kpukpru mmọ emi ekekopde ema ekere ebaña ñkpọ emi, mmọ enyuñ ebup ete, "Nso ndien ke eyen emi edidi, ke emi ubọk Abasi odorode enye ke idem?"

67 Ete esie Sakaraya ama ọyọhọ ye Edisana Spirit ndien enye asiak uduak Abasi ete;

68 "Etoro Ọbọñ, Abasi nditọ Isrel,

koro Enye emedi ndise ikọt esie ndien omonyuñ anyaña mmọ.

69 Onyuñ emenede akamba Andinyaña ọnọ ñnyin,

ke ufọk owo esie Defid.

70 Kpa nte Enye ọkọñwọñọde oto ke inua mme ndisana oku Esie ke eset,

71 ndinyaña ñnyin nsio ke ubọk mme asua ñnyin,

ye ke odudu mme mmọ emi esuade ñnyin,

72 nditua mme ete ñnyin mbọm,

ñnyuñ nti edisana ediomi Esie,

73 kpa uñwọñọ oro Enye ọkọñwọñọde ọnọ ete ñnyin Ebraham.

74 Ke edifak ñnyin mbọ ke ubọk mme asua ñnyin,

ñnyuñ nnọ ñnyin ukeme ndinam ñkpọ nnọ Enye uko uko,

75 ndinam ñkpọ nnọ ke edisana ido ye ke edinen ido, ke iso esie ke ofuri eyo uwem ñnyin.

76 Ndien afo ekpri eyen mi eyekot fi, Asiak Uduak Ñkoññkan Abasi,

koro afo edidiọñ ọkpọusuñ unim unọ edidi Andinyaña,

77 ndinọ ikọt Esie ifiọk nte mmọ ekemede ndinyene edinyaña

nto ke edifen mme idiọkñkpọ,

78 oto ke esit mbọm Abasi ñnyin,

emi anamde utin edinyaña asiaha oto ke enyọñ osim ñnyin mi ke isọñ,

79 man ọnọ mmọ emi etiede ke ekim

ye ke itighede mfut ñkpa uñwana,

onyuñ ada ikpat ñnyin esin ke usuñ emem."

80 Ndien ekpri eyen oro ọkọri, onyuñ edi enye emi okopde odudu ke spirit. Ndien enye okodu ke akpa utatan tutu esim ini emi enye owutde nditọ Isrel idem añwa añwa.