1 Usen kiet Jisọs ọkọbọñ akam ke ebiet kiet. Ke ini emi Enye ama ekekure, kiet ke otu mme mbet Esie ama ọdọhọ Enye ete, "Ọbọñ, kpep ñnyin nte ebọñde akam, kpa nte Jọn ekekpepde mme mbet esie."

2 Jisọs ama ọdọhọ mmọ ete, etiñ ntem ke ini mbufo ebọñde akam,

"Ete, yak ekpono edisana Enyiñ Fo,

yak Obio Ubọñ Fo edi;

3 Nọ ñnyin udia emi ekemde ñnyin ke usen ke usen.

4 Daha do nọ ñnyin ke mme idiọkñkpọ ñnyin,

koro ñnyin ñko idahade do inọ mmọ emi enamde ñnyin idiọk ñkpọ.

Ndien kuda ñnyin usin ke idomo."

5 Ndien Enye obup mmọ ete, "Edieke owo mbufo kiet enyenede ufan, ndien enye aka ebine ufan oro ke ufọt okoneyo, onyuñ ọdọhọ ete, ‘Ufan buọt mi ebok uyo ita, 6 koro ami mmenyene ufan emi otode anyan isañ edi edem mi, ndien ami ñnyeneke ñkpọ ndinọ enye adia.’

7 Edieke ufan esie esinede ke esit ufọk ọbọrọ, ete, ‘Kufina mi, Ami mmọkọbi usuñ ufọk mi, nditọ mi enena ye ami ke mbri ke ede, ami ñkemeke ndidaha nda ndinọ fi baba ñkpọ ndomokiet.’

8 Yak ntiñ emi nnọ mbufo, okposuk edi enye mididahake ida idinọ enye uyo ke ntak enye edide ufan esie, edi ke ntak ediyire owo oro, enye eyedaha ada onyuñ ọnọ enye ibat nte enye oyoyom." 9 Ntre ke Ami ndọhọ mbufo nte, ebup, ndien eyenọ mbufo; eyom, ndien eyekut; ekọñ, ndien eyeberede enọ mbufo. 10 Koro owo ekededi emi ebeñede, eyebọ; enye emi oyomde, okut, ndien eyeberede enọ enye emi ọkọñde.

11 "Anie ke otu mbufo mme ete, ke eyen esie ekpebeñe enye iyak, enye ọkpọnọ enye urukikọt? 12 Mme edieke enye ekpebeñede enye nsen unen, ọkpọnọ enye ikpeyen?

13 Edieke mbufo emi edide mme oburobut owo, ediọñọde nte enọde nditọ mbufo nti enọ, adaña didie ke Ete mbufo ke enyọñ edinọ mme mmọ oro ebeñede Enye Edisana Spirit."

14 Jisọs ekebin idiọk spirit emi ekedide spirit imum, kadaña emi spirit oro ọkọwọrọde owo oro ke idem enye ama ọtọñọ nditiñ ikọ, idem ama akpa otu owo eti eti. 15 Edi ndusuk owo ema edọhọ ete, "Edi Belsibọb, etubom mme ndiọi spirit ọnọ Enye odudu ndibin mme spirit nsioño owo ke idem." 16 Mme mmọ eken ema edomo Enye ke mmọ ndibup Enye owut mmimọ idiọñọ emi otode Enyọñ.

17 Jisọs ama ọdiọñọ ekikere esit mmọ kiet kiet, do ke Enye ọkọdọhọ mmọ ete, "Obio edidem ekededi emi abaharede ada onyuñ añwana ekọñ ye idem esie iditreke ndiduk ke nsobo, kpa ntre, ufọk eke ababahade añwana ye idem esie iditreke ndiduọ. 18 Ntre, edieke Setan abaharede añwana ye idem esie didie ke obio ubọñ esie edida? Ami ntiñ emi koro mbufo edọhọde ete, ke Ami nda odudu Belsibọb mbin mme ndiọi spirit. 19 Ntem edieke Ami ndade odudu Belsibọb mbin mme spirit, mme mmọ emi etienede mbufo eda odudu anie ebin mmọ esioño? Ke ntre, edi mmọ oro edikpe ikpe ye mbufo. 20 Edi, edieke Ami mbinde mme ndiọi spirit nsioño oto nnuen ubọk Abasi, emi owut ete Obio Ubọñ Abasi edi ọnọ mbufo."

21 "Ke ini ọkpọsọñ owo emi ọbọbọde mbọbọ ekọñ ekpemede ufọk esie, mme inyene esie edu ke ifure. 22 Edi edieke owo efen emi okopde odudu akan enye esinde eñwan ye enye onyuñ akande enye, enye eyebọ owo emi mme mbọbọ ekọñ emi enye ọkọbuọtde idem ke esit, onyuñ edeme inyene esie nte mbumeekọñ."

23 "Owo ekededi emi midaha ye Ami, ada ndiñwana ye ami, ndien enyemi ñko mitañke ibok ye Ami, ada ndisasuan."

24 "Ke ini emi ndedehe spirit ọwọrọde owo ke idem, enye oyo akabade mme nsat ebiet oyom nduọk odudu, edi enye ikwe. Ndien enye ọdọhọ ete, ‘Ami ñyefiak ñnyọñ ke ufọk emi ñkọwọrọde.’ 25 Ndien ke ini enye edide edisim, enye okut ufọk oro nte ekpọride asana enyuñ etimde kpukpru ñkpọ ebon ke itie. 26 Ndien enye aka akada ndedehe spirit itiaba efen emi ediọkdediọk ekan enye, mmọ eduk enyuñ eduñ do. Ndien ukpere edem itie owo oro ọdiọk akan akpa itie esie."

27 Nte Jisọs okosuk etiñde ikọ, ñwan kiet ke otu owo ama ofiori ete, "Ọfọfọn ọnọ eka emi akamande, onyuñ ọbọkde Fi."

28 Jisọs ama ọbọrọ ete, "Akam ọfọfọn ọnọ mmọ emi ekopde ikọ Abasi enyuñ enamde se ikọ etemede."

29 Nte otu owo ekekade iso nditọt, Jisọs ama ọdọhọ ete, "Emi edi oburobut emana, enye obup oyom idiọñọ mme utibe ñkpọ, edi idinọhọ enye ndomokiet ke ebede idiọñọ Jona. 30 Koro nte Jona ekedide idiọñọ ọnọ mbon Ninefe, kpa ntre ñko ke Eyen Owo edidi idiọñọ inọ emana emi.

31 Ke usen ikpe Ọbọñañwan Sheba emi otode usuk eyedaha ada etiñ ikọ nsuannọ adian emana emi, koro enye akasañade oto anyan usuñ nte ekpebaharede ererimbot ke mbak iba, aka ndikop mme ukpepñkpọ eti ibuot Sọlọmọn. Ndien sese, Ami ndọhọ mbufo nte, ke owo mi emi okponde akan Sọlọmọn.

32 Mbon Ninefe ñko eyedaha eda enyuñ ebiom emana emi ikpe, koro mmọ ema ekabade esit ke ini Jona ọkọkwọrọde ikọ, ndien ke emi, owo emi okponde akan Jona mmọ mi."

33 "Baba owo ndomokiet idomoke utueneikañ ndien emen edip, mme ndimen nsin ke idak akwa usan, utu ke oro, enye emen utueneikañ oro odori ke udori utueneikañ man oto do mme mmọ emi edukde edi, ekut uñwana. 34 Enyin edi utueneikañ. Adaña nte mme enyin fo efọnde, ofuri idem fo ñko ọyọhọ ye uñwana. Edi edieke mme enyin fo ediọkde, ofuri idem fo edidu ke ekim. 35 Ntre, kpeme mbak uñwana emi odude fi ke idem ediduk ekim. 36 Ntem edieke afo ọyọhọde ye uñwana ke esit idem fo, unyeneke baba ebiet kiet emi ekim odude, ofuri idem fo emi ekutde ke enyin eyeyọhọ ye uñwana nte ekpedọhọde ete uyama utueneikañ ayama fi ke idem."

37 Ke ini Jisọs ama okokure nditiñ ikọ, owo Farisi kiet ama okot Enye udia, do Enye ama aka eketie ke okpokoro udia ye enye. 38 Idem ama akpa mme Farisi emi ke emi Jisọs mikeyereke ubọk mbemiso Enye etie ke itie udia nte ido mmọ mme Ju edide.

39 Do ke Jisọs ọkọdọhọ enye ete, "Ke emi mbufo mme Farisi eyet idem ñkpọ uñwọñ-mmọñ ye usan udia asana edi ke esit, esit mbufo ọyọhọ ye idiọk itọñ ye oburobut ido. 40 Mbufo mme ndisime owo! Nte idighe enye emi akanamde edem akanam esit nde? 41 Edi emen kpukpru se idude ke esit enọ mme ubuene, ndien kpukpru ñkpọ eyesana ọnọ mbufo."

42 "Ọdọdiọk ọnọ mbufo mme Farisi, koro okposuk edi emi mbufo enọde Abasi ubak kiet ke mbak duop ke mme enem utebe ikọñ mbufo, nte ikọ ye etinyuñ ye kpukpru mme ikọñ iñwañ emi mbufo etọde, edi mbufo efumi unen ye ima Abasi. Mbufo ekpekam enam mme ukperedem ñkpọ emi ndien ye mme akpa oro."

43 "Ọdọdiọk ọnọ mbufo mme Farisi koro mbufo emade mme ñkoñkoñ itie ke ufọk akam ye ekọm ke añwa urua. 44 Ọdọdiọk ọnọ mbufo, koro mbufo ebiet udi emi owo minimke idiọñọ emi mme owo edọkde esaña ke esit ke unana edifiọk."

45 Kiet ke otu mme ata ekpep ibet ama ọbọrọ Jisọs, ete, "Andikpep, ke ini Afo etiñde mme ikọ emi Afo omomiom ñnyin ñko."

46 Jisọs ama ọbọrọ ete, "Ndien ọdọdiọk ọnọ mbufo mme ntaifiọk mbet, koro mbufo ebuñde mme owo itọñ ye mbiomo emi mmọ mikemeke ndibiom, ndien mbufo isinke ndomo nnuen ubọk kiet ndiñwam mmọ." 47 "Ọdọdiọk ọnọ mbufo, koro mbufo ebọpde ndiye itiat udi enọ mme Asiak Uduak Abasi emi mme ete mbufo ekewotde.

48 Emi edi ndinam ñwut nte ke mbufo emesọñọ edinam emi mme ete mbufo ekenamde; mmọ ekewot mme Oku Abasi ndien mbufo ebot mme udi enọ mmọ.

49 Emi akanam Abasi etiñ ke ñyọhọ nduọi ifiọk Esie, ete, ‘Ami ñyedọñ mme Asiak Uduak Abasi ye mme Asañautom Abasi nnọ mmọ, mmọ eyewot ubak enyuñ esin mmọ eken ke ukut.’

50 Ke ntem, iyip mme Asiak Uduak Abasi emi ekewotde toto ke editọñọ ererimbot ọkọbọ emana emi. 51 Ọtọñọde ke iyip Ebel tutu osim eke Sakaraya emi ekewotde ke ufọt itie uwa ye edisana ebiet. Ih, yak ntiñ nnọ mbufo, emana emi eyebọrọ mbume ke kpukpru mme ñkpọ emi."

52 "Ọdọdiọk ọnọ mbufo mme nta ọfiọkibet, koro mbufo ememen ukpọhọde ufọk ifiọk efep, mbufo ke idem mbufo idukke, ndien enyuñ ebiọñọ mme mmọ emi ekeñwanade ndiduk."

53 Ke ini Jisọs ama akadaha do, mme Farisi ye mme ekpep mbet mme Ju ema etọñọ ndituaha ye Enye idiọk idiọk, enyuñ eñwaña mme mbume efuk Enye, 54 ebet ndimum Enye ke se Enye editiñde.