1 Nte Jisọs ekemenerede enyin, Enye ama okut mbon inyene nte esinde mme enọ mmọ ke ekebe usin mme enọ ke Edisana Ebiet. 2 Enye ñko ama onyuñ okut ebekpa kiet nte ekesinde anini iba.

3 Jisọs ama ọdọhọ ete, "Ami ntiñ akpanikọ nnọ mbufo, ubuene ebekpa emi esin enọ akan kpukpru mme mmọ eken. 4 Koro mmọ eken ekenọde oto ke nsuhọ inyene mmọ, edi ubuene nte ñwan emi edide, ọkọnọ kpukpru se enye akpadade odu uwem."

5 Ndusuk mbet Esie ema etọñọ nditiñ mbaña nte edade ndiye itiat ebana Edisana Ebiet ye mme enọ emi ekeyakde enọ Abasi. Edi Jisọs ama ọdọhọ ete,

6 "Kabaña kpukpru se mbufo ekutde emi mi, ini eyedi emi midiyakke itiat ndomokiet odoro ke kiet eken; eyedoñode mmọ kiet kiet eduọñọ."

7 Mmọ ema ebup ete, "Andikpep, mme ñkpọ emi editibe ini ewe? Ñko, nso ididi idiọñọ ndiwut nte ke mmọ emọñ etibe?"

8 Enye ama ọbọrọ ete, "Ekpeme, ekuyak owo abiaña mbufo. Koro ediwak owo eyedi ke enyiñ Mi, enyuñ edọhọ ete, ‘Ami ndi Enye! ndien ini ñko ke ekpere!’ Edi mbufo ekutiene mmọ. 9 Ndien ke ini mbufo ekopde ebaña ekọñ ye mme ndutime, ekukop ndik. Mme ñkpọ emi enyene ndibem iso nda itie, edi utit ididighe ke ndo ndo oro." 10 Enye ama aka iso nditiñ ete, "Mme idut eyeñwana ye kiet eken, ndien mme obio edidem eyetuaha kiet ye eken. 11 Ndien ọkpọsọñ unyekisọñ eyedu, akañ, ye mme ndiọi udọñọ ke kpukpru ebiet, mme enyene ndik ñkpọ ye ikpọ idiọñọ eyewọrọ ewut idem ke ikpa enyọñ."

12 "Edi mbemiso kpukpru emi etibe, mmọ eyemum mbufo, enyuñ etuhọde mbufo ndien eyeyak mbufo enọ ekpe ikpe ke ufọk mbono mme Ju, enyuñ ekọbi mbufo, ndien eyeda mbufo ewọrọ ke iso mme mbọñ ye ada ibuot ukara ke ntak Mi. 13 Emi edidi eti ifet inọ mbufo ndikwọrọ Eti Mbuk Obio Ubọñ. 14 Ebiere idahaemi ke esit mbufo, ete mmimọ idibemke iso ifina idem mmimọ ke ndikere se editiñde ke ndinyaña idem mbufo. 15 Koro Ami ñyenọ mbufo nti ikọ ye ifiọk utiñ ikọ emi baba mme asua mbufo ndomokiet midikemeke ndibọrọ mbiat. 16 Koro edieke nditọ ete mbufo, mbon ekpuk mbufo ye mme ufan mbufo, eyetap mbufo, enyuñ enam emum mbufo, ndien eyewot ndusuk mbufo.

17 Ndien kpukpru owo eyesua mbufo, koro mbufo edide okim enyuñ ekotde mbufo enyiñ edian Mi. 18 Edi baba idet ibuot mbufo kiet idibeheke. 19 Koro edieke mbufo esọñọde eda, mbufo eyenyaña idem mbufo."

20 "Edi ke ini mbufo ekutde akwa udim ekọñ akanarede Jerusalem okuk, mbufo eyefiọk ete ke nsobo esie ekpere. 21 Do yak mme mmọ emi edude ke Judia efeñe edọk mme enyọñ obot, yak mme mmọ emi edude ke esit obio ewọñọ ndien yak mme mmọ emi ekekpọñde esit obio, ekufiak ekeduk ke esit. 22 Koro emi edi ini ufen man okposu nte ekewetde enim. 23 Edidi ñkpọ ndik eti eti ke mme usen oro ọnọ mme iban idibi, ye mme iban emi ekamade nditọ ke ubọk. Mmum ye ukut eyedu ke ofuri isọñ Jerusalem ye iyaresit Abasi emi etienede mme mmọ emi. 24 Ekese eyekpaña ke ofut, eyenyuñ emum ubak nte mbuot ekọñ enyuñ esuan mmọ edọñ ke mme idibi mme idut efen. Mme mmọ emi minimke Abasi ke akpanikọ eyedighi Jerusalem ke ikpat tutu ini mme mmọ emi midighe mme Ju ọyọhọ."

25 "Mme idiọñọ eyedu ke utin, ọfiọñ ye mme ntantaọfiọñ. Mi ke isọñ mme idut eyedu ke ntaedet ye ñkpeñeyeñ ebaña uyom akpa ye mbufut inyañ. 26 Mme owo eyeyemede oto ke ndik ke edibet nse se iyomde ndisim ofuri ererimbot, koro eyenyeñe mme odudu ikpa enyọñ esioño ke mme ñkañ mmọ. 27 Edi ke ini oro ke Eyen Owo ediwọrọ iwut idem, onyuñ edi ke obubit enyọñ ye akamba odudu ye Ubọñ.

28 Ke ini mme ñkpọ emi etọñọde nditibe, edaha eda enyuñ emenede ibuot mbufo ke enyọñ, koro edinyaña mbufo ke asaña ekpere."

29 Do Jisọs ama obuk mbuk emi ọnọ mmọ, "Ese eto sokoro ye mme eto mmọ eken.

30 Ke ini ikọñ mmọ esehede, mbufo emekeme ndikut ke idem mbufo ndien efiọk ete ke ndaeyo ekpere. 31 Kpasuk ntre ñko, ke ini mbufo ekutde nte mme ñkpọ emi ndọhọde mi etibede, mbufo eyediọñọ ete ke Obio Ubọñ Abasi ke asaña ekpere.

32 Ami ntiñ akpanikọ nnọ mbufo nte, ke emana emi idibehe ifep tutu mme ñkpọ emi etibe. E 33 Enyọñ ye isọñ eyebe efep, edi ikọ Mi idibehe ifep."

34 Ekpeme idem mbufo, ekuyak ọkpọsọñ usọrọ, ye ọkpọsọñ uñwọñ mmin, ye mme mfina uwem emi ada ini mbufo, ke midighe ntre usen oro eyebabuat mbufo, nte afia. 35 Koro eyebuat mme andiduñ ke ofuri ererimbot. 36 Eka iso ndikpeme kpukpru ini, enyuñ ebọñ akam kpukpru ini, man mbufo ekeme ndinyene ukeme ndibe ke ifure ke kpukpru mme ñkpọ ntibe emi editibede, ñnyuñ ñwọrọ nda ke iso Eyen Owo.

37 Ke usen ke usen Jisọs ama aka iso ndikpep ñkpọ ke Edisana Ebiet, ndien ke kpukpru mbubreyo, Enye enyene ndiwọrọ ñka ñkabiat okoneyo ke enyọñ obot emi ekotde Ọlif. 38 Ndien kpukpru mme owo ema edi ke tughi tughi usen ubọk ndikop ikọ Esie ke Edisana Ebiet ukpono Abasi.